ᐊᐸᔅᑕᓚᒡ 10 - Chishemanituu Utayimuwin: Kaa Uskaach Testament

Peter kaa nituwaapamaat Cornelius

¹ Chii ihtaau naapeu Cornelius e ishinihkaasut anit ihtaawinihch Caesarea kaa ishinihkaateyich, Rome nitupayuuchimaau e itapit e niikaanishkuwaat shimaakanisha anite Italy aschiihch e uhchiyich.

² Chii ayimihewaatisiyuu maak kaye misiwe anit e peyakuteusiit chii nuuchiishtuweuch Chishemanituu. Mistahii maak chii wiichiheu aniyuu kaa chistimaatisiyich Jewa iinuu. Kaye muush chii ayimihaau.

³ Peyakwaau e chiishkwaapihtaachiishikaayich wiyesh nishtu e ispayiyich, chii waapahtiyaakanuu waapahtiiwewiniyuu, mitun e chii waapamaat Chishemanituu utenchilamiyuu e pechi piihcheyich, e itikut maak, “Cornelius.”

⁴ Chii mistakanuwaapameu maak aniyuu enchil e sechisit ekw kaa itaat, “Chekwaan, Utipeyihchikeu.” Ekw kaa itikut aniyuu enchil, “Chishemanituu chii naheyihtamihiikuu taan kaa ishi ayimihaayin, kaye taan kaa ishi miyu wiichihiitwaau kutakach awenichii, namui maak chika uhchi wanchischisiitutaakw.

⁵ Itishahuuch maak naapeuch anite Joppahch chechii wiishaamaatwaau Simon aniyuu naapeu Peter kaa ishinihkaataakanuyich.

⁶ Anite ihtaau aniyuu kaa chiishinicheyich Simon kaa ishinihkaasuyich peshuch yaayeu chihchikamiihch kaa wiichiyich.”

⁷ Iskutak maak ekaa e ihtaayich aniyuu enchil kaa ayimihiikut ekw Cornelius kaa wiishaamaat niishu utaapachihaakan, kaye peyakw shimaakanisha e ayimihewaatisiyich aniyuu muush kaa chii naanaakatuweyimikut.

⁸ Cornelius kaa wiihtamuwaat misiwe taan kaa itikut aniyuu enchil ekw maak kaa itishahwaat anite aniyuu ihtaawiniyuu Joppa kaa ishinihkaateyich.

⁹ Miin maak wiyaapaniyich wiyesh e aapihtaachiishikaayich ekw chii peshuwaapahtamiyichenich aniyuu ihtaawiniyuu Joppa kaa ishinihkaateyich. Ekut maak wiyesh kaa nituu ayimihaat Peter tahkuhch aniyuu waaskaahiikaniyuu kaa ihtaat.

¹⁰ Chek maak chii siiweyuu ekw kaa wii miichit chekwaayuu, mekwaach maak e ishpishiinaanuyich e piminuutaakanuut chii waapahtiyaakanuu waapahtiiwewiniyuu.

¹¹ Chii waapahtam chiishikuyuu e aapahiipayiyich, ekw kaa waapahtahk chekwaayuu muyaam ashpimiichisuyaaniyuu e ishinaakuniyich anite e kachiihcheyekaniyich e uhchi pechi aashinikanuyich anite ishi aschiihch.

¹² Anit maak uyuu kaa pechi aashinikanuyich nanaahkuu awesiisa e ishinaakusiyich kaye manichuusha kaye piyeshiisha chii ihtaayuuh anit.

¹³ Ekw kaa uhchi pehtawaat aweyuu e itikut, “Peter, pisikuuh, che nipahtaacheyin, che miichisuyin maak.”

¹⁴ Ekw Peter kaa itwet, “Namui nika uhchi ihtuuten uu Utipeyihchikeu. Namui wiiskaat nuuhchi miichin chekwaan ekaa chipaa uhchi miichinaanuu kaye e wiinaach.”

¹⁵ Ekw miin kaa uhchi pehtawaat aweyuu e itikut, “Ekaawii itweh e wiinaach aniyuu Chishemanituu e chii itwet e payehkaniyich.”

¹⁶ Nishtwaau maak chii itihtam e pehtawaat aweyuu e ayimihiikut ekw kaye aniyuu ashpimiichisuyaanihch kaa ishinaakuniyich miin kaau chii uhpipayiniyuu anite ishi ishpimihch.

¹⁷ Mekwaach maak Peter e maamituneyihtahk taan chipaa chii ishi wiihtamaachemakaniyich uyuu kaa waapahtiyaakanuut, anichii naapeuch Cornelius kaa pechi itishahukutwaau chii miskamuweuch Simon taanit waachiyich ekw maak anit e uhchi piihtukaanuyich kaa pechi niipuutwaau,

¹⁸ kaa tepwetwaau e itwetwaau, “Ekut aa utah waachit Simon Peter.”

¹⁹ Peter maak eshkw mekwaach chii maamituneyihtam taan chipaa chii ishi wiihtamaachemakaniyich aniyuu kaa waapahtiyaakanuut. Ekw kaa itikut Kaa payehchisiyich Ahchaahkwa, “Nituhta maa, nishtuuch utah naapeuch e pechi naanituweyimiskwaau.

²⁰ Maachiih niihtaahtawiih che nituu ayeskuwiyin, kaye ekaawii uhchi nakaawii chechii wiicheutwaau. Wesh niya nichii pechi itishahwaauch.”

²¹ Ekw Peter kaa niihtaahtawiit, ekw kaa itaat aniyuu naapeuh, “Eukw niya aawiyaan kaa naanituwaapamiyekw. Chekwaan maak uu wehch takushiniyekw.”

²² Chii iteuch maak, “Nuuchimaaminaan Cornelius kaa niikaanishkuwaat Rome shimaakanisha nichii pechi itishahukunaan. Miyeyihtaakusuu uu naapeu, kaye chisteyimeu Chishemanituu, misiwe kaye Jewa iinuuh iteyimikuu e miyeyihtaakusit. Peyakw Chishemanituu kaa payehchisiyich utenchilamiyuu chii itikuu chechii wiishaamisk anite wiichihch ekw maak chechii pehtahk taan waa ishi wiihtaman.”

²³ Ekw maak Peter kaa wiishaamaat aniyuu naapeuh chechii piihcheyich wiichihch. Miin maak wiyaapaniyich ekw kaa ayeskuwiit che wiichewaat, kaye maak pasch aniyuu wiichishaanimaauh anit Joppahch kaa uhchiyich chii wiicheukuuch.

²⁴ Miin wiyaapaniyich ekw kaa takushihkwaau anite aniyuu ihtaawiniyuu Caesarea kaa ishinihkaateyich, ekut maak anit kaa ashuwaapamikuwaakupanenich Cornelius kaye aniyuu kaa wiishaamaayich uwaahkumaakaniyuu kaye uwiichewaakaniyuu chechii nituhtuwaayich Peter.

²⁵ Iskutak maak Peter e ati piihchewaat Cornelius uwaaskaahiikanimiyuu chii pechi nituwaapamikuu, e niipiskuupayihuyich uhchishkuu e ihtaat e nuuchiishtaakut.

²⁶ Mikw maak Peter chii pisikuuneu e itaat, “Pisikuuh, mikw wesin naapeu kaye niya.”

²⁷ Chii ayimiheu maak aniyuu Cornelius e ati piihchetwaau aniyuu waaskaahiikaniyuu. Kaa waapamaat mihchetu iinuu e chii maauchihiituyikupananen anit.

²⁸ Ekw kaa itaat aniyuu iinuu, “Chika aayimuutamaatinaawaau chekwaan. Chimiyuchischeyihtenaawaau anite Jewa ayimihewin wiishuweusinahiikanihch e itashtech awen e Jewa iinuut ekaa chechii chiiutamaat aweyuu ekaa Jewa itiskaanesiyich kaye ekaa chechii wiichewaakanitutawaat. Chishemanituu maak nichii waapahtiikw ekaa chechii aataweyimak awen, chechii iteyimak ekaa payehchisiit maak e machisit chechii iteyimak.

²⁹ Kaa pechi wiishaamiyekw maak, namui ekaa nuuhchi wii pechi ituhten wesh tiiwehch nichii nisituhten taan kaa ishi waapatiikuyaan ekw maak kaa pechi takushiniyaan. Ekw maak waa chischeyihtamaan, chekwaan wehchi pechi wiishaamiyekw.”

³⁰ Ekw Cornelius kaa itaat, “Neu chiishikaau utaahch utah ekun wiyesh chii ishpish chiishikaache e chii ayimihaayaan anite niichihch nishtu e ispayihch e chiishkwaapihtaachiishikaach. Chek sischikuuch naapeu e waashtuweyikwaau uchekwaanim chii uhchi niipuu anit e ihtaayaan.

³¹ Ekw kaa iishit, ‘Cornelius, Chishemanituu chii pehtam taan kaa ishi ayimihaayin kaye chii waapahtam taan kaa ishi wiichihiitwaau kutakach awenichii,’ nichii itikw.

³² Ekw miin kaa iishit, ‘itishahuuch awenichii anite Joppa chechii wiishaamaatwaau aniyuu naapeu Simon Peter kaa ishinihkaasuyich. Anite ihtaau Simon e ihtaayich an kaa chiishinichet kaa ishinihkaataakanuut, anite yaayeu chihchikamiihch kaa wiichit,’ nichii itikw an enchil.

³³ Tiiwehch maak nichii itishahwaauch anichii naapeuch chechii wiishaamiskwaau, miywaashuu maak kaa takushiniyin. Ekw maak misiwe e ihtaayihkw utah, Chishemanituu kaye ekut e ihtaat, ekw maak che pehtamaahch taan kaa itashumisk Utipeyihchikeu che itweut.”

Peter taan kaa ishi wiihtamuwaat Cornelius

³⁴ Ekw maak Peter kaa ati ayimit, e itwet, “Ekw maak nesituhtamaan Chishemanituu peyakunihch misiwe e iteyimaat aweyuuh.

³⁵ Namui wiyeshiniyuu taan e itiskaanesiyich aweyuu. Wesh an awen kaa nuuchiishtuwaat Chishemanituu kaye kaa ihtuutahk taan e ishi kuiskunaakuniyich eukw an che naheyimikut Chishemanituu.

³⁶ Chichischeyihtenaawaau Chishemanituu e chii ihtakuniyich taan kaa ishi ayimihaat Israel iinuuh, e chii wiihtamuwaat miywaachimuwiniyuu anit chechii uhchi ayaayich chiyaameyihtamuwiniyuu Jesus e ihtaayich uhchi. Wesh wiya Jesus misiwe ayaau tipeyihchichewiniyuu.

³⁷ Chichischeyihtenaawaau kaye taan kaa ispayihch misiwe anite Israel aschiihch. Anite Galileehch chii uhchi chihchipayuu uu iskutak John kaa siikahaahtaachet kaa chiishi kacheskwet e itaat iinuuh chechii siikahaahtuwaakanuyich.

³⁸ Chichii pehtenaawaau Jesus Nazareth kaa uhchiit e chii tuumiskunikut Chishemanituu kaye e chii miikut suuhkaatisiiwiniyuu kaye Kaa payehchisiyich Ahchaahkwa. Mikw maak taanite kaa ati aihtaat chii miyutuutamaacheu kaye chii miinuwaachiheu aniyuu iinuu machimanituu kaa nanehkaachihiikuyich wesh muush chii wiicheukuu Chishemanituu.

³⁹ Nitipaatutenaan misiwe wesh niyaan tipiyeu nischiishikunaahch nichii waapahtenaan taan kaa ihtit anite ihtaawinihch Jerusalem kaa ishinihkaatech kaye anite kutak ihtaawinh kaa ihtakuniyikwaauh anite aniyuu Jewa iinuu aschiiyuu. Chii nipahaakanuu maak e chiistaaskuhwaakanuut aashiteyaahtikuhch.

⁴⁰ Chishemanituu maak chii wanishkaanikuu nipuwinihch uhchi kaa nishtuchiishikaayich, ekw kaa ihtuutawaat chechii nuukuhiisuyich miin.

⁴¹ Namui kiipaa misiwe aweyuuh uhchi nuukushiishtaweu Jesus, mikw aniyuuh aweyuuh Chishemanituuh kaa wiyaapamikuyich chechii tipaachimikut. Kaye nichii wiichimiichisuumaanaan paatimaa kaa wanishkaat nipuwinihch uhchi.

⁴² Ekw maak kaa itashumiyimiht Jesus chechii waawiihtamuumachiht iinuuh miywaachimuwiniyuu kaye chechii wiihtamuuchihtwaau awenichii wiya Jesus e chii wiyaapamikut Chishemanituu chechii wiyaaskunaat aweyuu kaa pimaatisiyich kaye aniyuu kaa nipiyich.

⁴³ Chii tipaachimikuu misiwe aniyehkaanaan uchischiwehiichesuuh kaa itweyich, ‘misiwe awen kaa taapwehtahk chika wepeyihtamuwaakanuu umachihtwaawinh e ishpish suuhcheyihtaakuniyich utishinihkaasuwin.’ ”

Kaa payehchisiit Ahchaahkwa chii miyaakanuuch anichii ekaa Jewa kaa itiskaanesitwaau

⁴⁴ Mekwaach maak Peter e ayimihaat aniyuu iinuuh, Kaa payehchisiyich Ahchaahkwa chii pechi aashiyuu anit anichii misiwe kaa nituhtahkwaau e ihtaatwaau.

⁴⁵ Anichii maak Jewa iinuuch kaa taapwehtahkwaau, anichii kaa pechi wiichewaatwaau Peter, chii kushkupayuuch Chishemanituu e miyaayich Kaa payehchisiyich Ahchaahkwa aniyuu iinuuh ekaa Jewa kaa itiskaanesiitwaauh.

⁴⁶ Chii chischeyihtamuch e chii miyaakanuyich kaa payehchisiyich ahchaahkwa, wesh chii pehtaweuch e kweschayimiyich kaye e maamihchimaayich Chishemanituu. Ekw Peter kaa itwet,

⁴⁷ “Uchii iinuuch chii miyaakanuuch Kaa payehchisiyich Ahchaahkwa muyaam kaye chiyaanuu kaa ishi miikuyihkw kaa payehchisiit ahchaahkw. Ekw maak namui awen chipaa uhchi chipihchiheu chechii siikahaahtuwaakanuyich nipiihch.”

⁴⁸ Chii itashuweu maak Peter chechii siikahaahtuwaakanuyich uyuuh Jesus Christ utishinihkaasuwiniihch. Uchii maak kaa taapwehtahkwaau chii kakwechimeuch Peter weipishchiish miin chechii ihtaayich anite e ihtaatwaau.