ᐊᐸᔅᑕᓚᒡ 1 - Chishemanituu Utayimuwin: Kaa Uskaach Testament

¹ Chiya Theophilus chimasinahamaatin. Niishtam masinahiikan kaa masinahamaacheyaan ekut kaa wiihtamaan misiwe taan kaa aihtit Jesus kaye taan kaa ishi chiskutamaachet uskach kaa chihchipayihtaat utaapatisuwin piihiim maak kaa pechi utinaakanuut kihchikiishikuhch ishi.

² Eshkw maak ekaa uhchi nakatahk uyuu aschiiyuu Jesus Kaa payehchisiyich Ahchaahkwa uhchi chii wiishumeu Apastalh e wiihtamuwaat taan che ihtiyich.

³ Iskutak kaa chiishi nanehkaateyimut Jesus aashiteyaahtikuhch kaa nipit mihchetwaau chii nuukushiishtaweu aniyuu Apastalh nemitanuu chiishikaauh ishpish, e wii cheshtinaateyihtamihaat taapwe miin kaau e pimaatisiit, kaye chii aayimuutamuweu Chishemanituu uchisheuchimaawiniyuu.

⁴ Iskutak maak kaa nishtuwiitwaau Jesus chii iteu aniyuu Apastalh, “Ekaawii nakatamukw Jerusalem. Ashuwaapahtamuwaahkw aniyuu miiwewiniyuu Nuuhtaawii cheshtinaash kaa itwet che miitaakw, eukw uu shaash kaa pechi aayimuutamaatakuch.

⁵ Wesh John chii siikahaahtaacheu nipiiyuu chii aapachihtaau. Ekw maak shaash wiipach chika siikahaahtaakunaawaau Kaa payehchisiyich Ahchaahkw.”

Jesus kihchikiishikuhch kaa ishi utinaakanuut

⁶ Ekw maak miin peyakwaau e nishtuwiitwaau anichii apastalach chii kakwechimeuch Jesus e itaatwaau, “Utipeyihchikeu, shaash aa utihchipayuu che miitwaau Jewa iinuuch wiyawaau miin chechii pimipayihtwaasutwaau misiwe chekwaayuu anite utaschiiwaahch.”

⁷ Jesus maak chii iteu, “Namui chiyawaau chipaa uhchi naanituu kachescheyihtenaawaau taan che ispayihch anite niishtamihch. Aniyuu e tipeyihchiket Nuuhtaawii shaash chii wiyeyihtam taan che ishpish utihchipayiyich uyuu.

⁸ Chika saakaschineshkaakunaawaau suuhkaatisiiwin, iskutak Kaa payehchisiit Ahchaahkw chii utihtikuyekwe. Ekw maak che papaamaachimiyekw anite Jerusalemihch, misiwe Judea aschiihch, Samariahch kaye misiwe e ispichiskamikaach aschii.”

⁹ Iskutak Jesus uyuu kaa itaat aniyuu apastalh mekwaach e kanawaapamikut ishpimihch chii ishi uhpipayuu. Kaskawanishkwa kaa aakuuhukut ekw namui uhchii waapamikuu.

¹⁰ Mekwaach maak anite ishpimihch e iitaapitwaau e wii kanawaapamaatwaau e ati uhpipayiyich chiihtihtawii chii uhchi wiichikaapuushtaakuuch niishu naapeu e waapaaspisuyich.

¹¹ Ekw kaa itikutwaau, “Chiyawaau naapeutikw Galileehch kaa uhchiyekw, chekwaan wehchi niipuuyekw utah, ishpimihch e iitaapiyekw. Uu Jesus taan kaa ishi pechi utinaakanuut kihchikiishikuhch ishi, kaa ishi waapamekw e ituhtet kihchikiishikuhch ekun mwehch che ishinaakusit miin takushihke.”

Matthias kaa miiskuchishkuwaat Judas

¹² Ekw anichii apastalach kaa chistuhtetwaau anite aniyuu wachiyuu Olives kaa ishinihkaateyich kaau kaa chiiwetwaau anite Jerusalemihch. Wiyesh aapihtuu aschiiyuu tipahiikan chii ishpishinaakuniyiche uyuu ihtaawiniyuu anit kaa uhchi chistuhtetwaau.

¹³ Iskutak maak tekushihkwaau anite Jerusalemihch chii piihcheuch aniyuu waaskaahiikaniyuu che ihtaatwaau. Chii ihtakuniyuu e pischisaayich ishpimiihtakuhch aniyuu waaskaahiikaniyuu. Ekute kaa ishi kushpaahtawiitwaau. Eukunich uchii kaa ihtaatwaau, Peter, John, James, Andrew, Philip, Thomas, Bartholomew, Matthew, James Alphaeus ukusisa, Simon kaa ayimihewaatisiit kaa ishinihkaataakanuut, ekw maak Judas, James ukusisa.

¹⁴ Misiwe maak chii naheyihtamuch muush chechii peyakuminehiitutwaau e maamuu ayimihaatwaau. Ekut kaa chii ihtaatwaau kaye anichii iskweuch kaye Jesus ukaawii kaye maak Jesus uwiichisaan kaa naapewiyich.

¹⁵ Peyakwaau maak e nishtuwiitwaau anichii kaa taapwehtahkwaau, Peter chii pisikuu ekw kaa ayimihaat aniyuu kaa pechi nishtuwiitwaauh. Wiyesh mitaahtumitanuu miin niishtunuu chii tashiichen.

¹⁶ Ekw kaa itaat, “Niichishaanitikw, an kaa ishi niikaan wiihtaakuhch anite Chishemanituu utayimuwinihch yaaitei chii nituweyihtaakun misiwe chechii ispayihch. Eukw uyuu Kaa payehchisiit Ahchaahkw kaa ishi miyaat aniyaa David chechii niikaan wiihtamiyich taan che ihtiikupanenh Judas. Eukw uu Judas kaa ituhtahaat shimaakanisha Jesus e ihtaayich chechii maakunaayich.

¹⁷ Chichii wiichaapatisiimikunuu Judas, wesh Jesus chii wiyaapamikuu kaye wiya apastal chechii itapit.”

¹⁸ Aniyuu maak kaa ishi machituutahk Judas chii chiishiihkawaakanuu shuuliyaayuu. Ekw kaa utinahk nihtaauchihchikan aschiiyuu. Ekut utah kaa nipit, chii pukuchesinuu e pahchishinit mitun e chii kuihkuhtiniyikwaau utachisiih.

¹⁹ Misiwe maak anite Jerusalemihch chii chischeyihtaakunuuyuu taan kaa ispayit Judas ekw mihkw aschii kaa ati ishinihkaataakanuyich aniyuu nihtaauchihchikan aschiiyuu anite kaa miskawaakanuut. Wiyawaau maak e ishi ayimitwaau Akeldama chii ishinihkaatamuch uyuu aschiiyuu.

²⁰ Wesh itashteyuu anite aniyaa David unikamuwinihch, Namui chika uhchi ihtaanuuyuu anit kaa chii ihtaat, ekaawii awen chika uhchi wiichuu anit. Eyuu maak itashteu, Kutak aweyuu chika miiskuchishkaakuu aniyuu kaa chii itaapatisit.

²¹ Kaa ati itwet miin Peter, “Ekw maak chipaa wiyeyimaanuu peyakw awen che wiichihiitahkw e waawiihtamuuhkwaau iinuuch Utipeyihchikeu Jesus miin e chii wanishkaayich.

²² Uu maak awen che miiskuchishkuwaat Judas utah uu e peyakuminehiituyihkw chika uhtinaanuu kaye shaash anite e chii uhchi wiicheukuyihkw uskach kaa chihchi papaawiicheukw Jesus. Kaye e chii wiicheukuyihkw iskutak kaa siikahaahtaakut Jesus aniyuu John, piihiim maak Jesus kaa wanishkaanaakauut Jesus nipuwinihch uhchi.” Eukw uyuu kaa itwet Peter.

²³ Ekw maak niishu naapeu kaa wiihaatwaau. An peyakw naapeu Joseph chii ishinihkaasuu. Niyaanikutehch Justus maak Barsabbas chii ishinihkaataakanuyiche. Ekw an kutak naapeu Matthias chii ishinihkaasuu.

²⁴ Ekw kaa ayimihaatwaau e itwetwaau, “Utipeyihchikeu, chichischeyimaau misiwe awen taan chihchiwe e iteyihtaakusit. Pechi waapahtiinaan taan an weyaapamat uchii naapeuch e niishitwaau

²⁵ chechii utinahk uyuu aapatisuwiniyuu apastal e itapit, aniyuu Judas kaa nakatahk iskutak kaa ituhtet anite kaa ishinaakuniyich che ituhtekupane.”

²⁶ Ekw kaa wiyeyimaatwaau aniyuu e niishiyich naapeu taan aniyuuh eukw che utinaatwaau, e uchipitamuwaatwaau utishinihkaasuwiniyuu. An maak awen kaa taaunikanuyich utishinihkaasuwin eukw Matthias. Eukw maak an kaa utinaakanuut Apastal chechii itapit. Ekw maak miin kaa niishuushaapuutwaau anichii Apastalach.