2 Timothy 3 - Chishemanituu Utayimuwin: Kaa Uskaach Testament

Maahchistai echiishikaakwaau

¹ Che wii chischeyihtaman kaye uu, iskutak anite maahchishtai ati chiishikaakwaawenh naashch taapwe kata ihtakun taan che ishi aayimipayihch.

² Uste wiya kata iteyimisuu awen, kaye naashch taapwe kata saachihtaauch shuuliyaayuu. Naashch kata mamiywaachimisuuch, naashch chihchiwe kata iteyimisuuch e paashtaamutwaau, kaye naashch kata maamaayeyihcheuch. Kaye namui kata uhchi nanihiihtuweuch uniichihiikuwaauh. Namui mitun kata uhchi nanaaskumuuch chekwaayuu kaye namui mitun kata uhchi aapateyimeuch Chishemanituu.

³ Namui kata uhchi kachistimaacheyimeuch aweyuu kaye namui mitun kata uhchi wii wepeyihtamaacheuch. Kata wii naanituu ayaahkuheuch aweyuu taan e itaatwaau, kaye naashch kata aahkuyuwesuuch, kaye naashch kata wiihchi chishuwaasuuch kaye naashch kata uhkaateuch aniyuu kaa miyutuutamiyitwaauh.

⁴ Naashch kata wiihchi wawiyeshiheuch uwiichewaakanawaauh, namui mitun kata uhchi nanaakataweyihtamuch taan e ihtitwaau, kaye naashch taapwe mistahii kata iteyimisuuch. Uste kata saachihtaauch aniyuu wiyawaau e ishi muuchicheyihtamihiikutwaau chekwaayuu ishpish wii Chishemanituuh etituu chechii saachihaatwaau.

⁵ Muyaam naashch e ayimihewaatisiitwaau kata wii ishinaakuhiisuuch mikw maak namui kata uhchi aapateyihtamihiikuuch aniyuu suuhkaatisiiwiniyuu chipaa wiichihiikuuch chechii nanihiiwehaatwaau Chishemanituu. Ekaawii papiskaasich uyuu kaa iteyihtaakusitwaau awenichii.

⁶ Papiihcheuch waaskaahiikanh ekw aniyuu iskweuh kaa shaakuuchihiikuyich machituutamuwiniyuu kaye pisikw nitamukw kaa wii itaatisiyich eukunh aniyuuh naashch waa tipeyimaatwaau.

⁷ Uyuuh iskweuh muush kuchihtaayuu chechii chischeyihtamiyich nanaahkuu chiskutamaachewinh mikw maak namui chii miskamiyuuh taapwewiniyuu.

⁸ Nishkuushtamuch taapwewiniyuu uchii naapeuch mwehch taan kaa ihtiyich aniyehkaanaanh Jannes ekw maak Jambres e chii nishkuushtuwaayich Moses. Naashch taapwe namui kuiskukuteyuuh umituneyihchikanawaauh kaye utaapwehtamuwinawaau namui kuiskw ishinaakuniyuu.

⁹ Namui maak uste chika chii ihtuutamuch uyuu taan e ihtitwaau, wesh kata waapahtamiyuuh misiwe aweyuu taan e ishpish nitamukw ihtitwaau, muyaam taan kaa ishi chischeyihtaakusiitwaau aniyuuh niishu naapeuh Jannes ekw maak Jambres.

Maahchistai kaa ishi wiishumaakanuut Timothy

¹⁰ Chiya maak Timothy nicheshtinaahun che nuushunehaman nichiskutamaachewin, kaye kaa ishi pimaatisiyaan, kaye nititeyihtamuwin. Chichii waapahten taan kaa ishi taapwehtamaan, taan kaa ishi siipiiwesiyaan, kaye nisaachihiiwewin, kaye chichii waapahten taan kaa ishi siipiiwesiistamaan taan kaa ishi nanaahkuu nachishkamaan.

¹¹ Kaye maak chichii waapahten taan kaa ishi nanehkaachihiikuyaan kaye taan kaa ishi waawiisacheyihtamaan. Wesh misiwe chichischeyihten taan kaa ishi ihtuutaakuyaan anite Antioch, Iconiumihch kaye maak anite Lystrahch. Taapwe nuwach chii aahkwaateyihtaakun taan kaa ishi nachishkamaan. Mikw maak Utipeyihchikeu wiya nichii wiihkuchihiikw chechii shaapushkamaan misiwe taan kaa ihtuutaakuyaan.

¹² Ehe, taapwe, misiwe awen kuiskw kaa wiishi pimaatisiit kaye tekash kaa pachishtinisut e wiichewaat Christ Jesus, kata ihtakuniyuu taan che ishi nanehkaachihaakanuut,

¹³ ekw anichii kaa machaatisiitwaau kaye anichii nitamukw kaa ishi chiskutamaachetwaau wetaach etituu kata iteyihtaakusuuch, e wiyeshimaatwaau aweyuu kaye wiyawaau e wiyeshimaakanuutwaau.

¹⁴ Chiwii ititin maak chiya, taapwehta kaye suuhk nanaakataweyihta an taapwewin kaa chiskutamaakuyin e chischeyimatwaau anichii awenichii kaa chiskutamaaskwaau.

¹⁵ Wesh chichischisinaache mekwaach e awaashiiwiyin shaash chichii chiskutamaakuun taan kaa ishi masinahiikanuyich Chishemanituu utayimuwinihch. Ekut kaa uhchi ayaayin kachehtaaweyihtamuwin chechii chischeyihtaman e taapweyimaat awen Christ Jesus ekut chechii uhchi pimaachihut.

¹⁶ Misiwe taan e itashtech Chishemanituu utayimuwinihch wiya aniyuu tipiiwe utayimuwin Chishemanituu. Miywaapatan kacheschimuwewinihch, chistahamaachewinihch, kuiskuniwewinihch, kaye kuiskutaatisiiwin chischinuhamaachewinihch ishi.

¹⁷ Ekw maak an awen kaa atushkuwaat Chishemanituu che mitunesiit, mitun e ayeskuwiit chechii miyu atushkuwaat Chishemanituu.