2 Timothy 2 - Chishemanituu Utayimuwin: Kaa Uskaach Testament

Jesus Christ umiyuumaascheuiiniim

¹ Chiya, nikusihkaatimaawin Timothy, suuhk wii suuhkaatisiih Christ Jesus uchishewaatisiiwinihch uhchi.

² Chichii pehtuun taan kaa ishi chiskutamaacheyaan anite mekwesiinuu e mihchetinaanuuhch. Uu maak kaa ishi chiskutamaacheyaan che pachishtinekuch anichii kaa taapweucheyihtaakusitwaau chechii aashuu chiskutamuwaatwaau kutak aweyuuh.

³ Suuhk wii siipiiwesiih e aayimuhuyinh mwehch Christ Jesus umiyuu maasihcheu iiniimh kaa ihtiyich.

⁴ Wesh maasihcheu iinuu suuhk kuchihtaau chechii nahiiwehaat aniyuu kaa niikaanishkaakut kaye namui mitun aapateyihtamihiikuu chechii wiichihiiwet taan e ihtinaanuyich utah aschiihch.

⁵ Pimaatisiih taan e ishi nitaweyimisk Chishemanituu chechii ishi pimaatisiyuut. Wesh awen kaa wiichihiiwet e chihchipahtaanuyich namui chika uhchi kaaniyuu paatish yaakwaau nanaakataweyihtahke aniyuu taan e ishi ihtakuniyich chipaa ishi nanaakataweyihtam.

⁶ Kaye maak nihtaauchihchesuu suuhk kaa aapatisit iteyihtaakuniyuu wiya niishtam chechii pahkwenimaasut aniyuu taan kaa ishi nihtaauchihtaat.

⁷ Maamituneyihtah uu taan kaa ishi waawiihtamaataan wesh Utipeyihchikeu chika ihtuutaakw chechii nisituhtaman misiwe chekwaan.

⁸ Muush kaye che chischisiyin taan kaa ishi waawiihtamaan miywaachimuwin e aayimuumak Jesus Christ e chii wanishkaanaakanuut nipuwinihch uhchi kaye maak David e ihtaayich e chii uhchi aanische pimaatisiit.

⁹ Wesh e waawiihtamaan uu miywaachimuwin eukuu wehchi nanehkaateyimuyaan, kaye mwehch awen e chii wanahpisut kaa chii maamaahchikwaapiskahwaakanuut ekun e ihtuutaakuyaan, mikw maak namui chika chii maamaahchikwaapiskahiikanuuyuu Chishemanituu utayimuwin.

¹⁰ Ekw maak e suuhchipayihch misiwe chekwaan chechii shaakuuchihtaayaan taan che ishi nanehkaachihiikuwaane, e pukuseyimuyaan aniyuuh Chishemanituu kaa wiyaapamaat che utiiniimit che ayaayich pimaachihiikusiiwiniyuu kaye kaachiche chisteyihtaakusuwiniyuu Christ Jesus e ihtaayich kaa uhchipayiyich.

¹¹ Wesh taapwemakan uu kaa chii iinaanuuhch, “Che wiich nipiimaauhkwe, chika wiich pimaatisiimaanuu kaye.

¹² Kanawaach che siipiiwesiistamuwaauhkwe nanehkaateyimuwin, chika wiich tipeyihchikemaanuu. Kaye maak itweyihkwe ekaa chischeyimahkw, kaye wiya chika iteu ekaa chischeyimitahkw.

¹³ Ekaa maak kuiskw ihtiihkwe, yaapach kuiskw chika ihtuu wiya Christ, wesh namui aahchiiuh chika chii iteyihtaakusuu taan e iteyihtaakusit.”

E ishi niheyihtaakusit atuschesuu

¹⁴ Muush maak chischisuumach chitiiniimach uyeyuu kaye uhchishkuu Chishemanituu e ihtaayich yaakwaamimach ekaa chechii mamachipayihkahtaatutwaau ayimuwiniyuu uhchi, wesh namui mitun miyu wiichihiiwemakan uu e ihtinaanuuhch. Ihtakuniyuu taan e ishi machituutaakutwaau anichii kaa nituhtahkwaau.

¹⁵ Suuhk muush ihtuut an maauch e kaschihuyin e ihtuutaman chekwaan aniyuu che naheyihtamahiikut Chishemanituu, mwehch awen suuhk kaa aapatisiit ekaa ihtakuniyich taan che ishi pimaamihiikut utaapatisuwin. Awen kuiskw kaa ishi chiskutamaachet taan e ishi taapwemakaniyich Chishemanituu utayimuwin ekun chipaa ihtin.

¹⁶ Ekaawii papiskaateyihtamihiikw nitamukw ayimuwin ekaa aayimuumaakanuut Chishemanituu, kaye ekaa kachihkaawaastaakuhch chekwaan e aayimituutaakanuuch wesh namui wiichihiikuu awen uyuu e ishi ayiminaanuyich. Ihtuutaakuu mikw etituu chechii ayaawaapamaat Chishemanituu.

¹⁷ Uu e ishi ayiminaanuuhch muyaam kaa muwech ahkusuwin ekun mwehch e iteyihtaakuhch. Anichii maak Hymenaeus ekw maak Philetus ekun e ihtitwaau e chiskutamaachetwaau.

¹⁸ Chii nakatamuch taapwewiniyuu, ekw kaa ihtuutawaatwaau pasch aniyuu kaa taapwehtamiitwaauh ekaa chechii ati saapeyihtamiyich e taapwehtamiyich, wesh chii chiskutamaacheuch e itwetwaau shaash e chii wanishkaanaakanuyich kaa taapwehtamiitwaau.

¹⁹ Mikw maak aniyuu Chishemanituu uchiskutamaachewin taan e ishi taapwemakaniyich namui chika chii aahtinikanuuyuu e ishpish yaaitaniyich, kaye an kaa itashtech, “Utipeyihchikeu chischeyimeu aniyuuh aweyuuh wiya tepiyeusiit” kaye “Misiwe awen Utipeyihchikeu e ihtaayich kaa ishi tipeyihtaakusit chipaa nakatam machaatisiiwiniyuu.”

²⁰ Anite mista waaskaahiikanihch ihtakun nanaahkuu e ishinaakuhkwaauh wiyaakanh. Pasch aniyuuh wiyaakanh ushaaushuuliyaawaapiskuunh ekw kutak waaseyaapiskaauh. Pasch mistikuhch chii uhchi ushihtaakanuuh ekw kutak sischuuhch. Aniyuuh kaa shuuliyaauhkwaau namui naashch aapatanh ekw aniyuu ekaa kaa shuuliyaauhkwaau eukunh aniyuuh eshikum chiishikaauh yaapatahkwaauh.

²¹ Michihpin maak awen payehchihiisute e nanaakatuweyihtahk ekaa chechii wiinihiikut machaatisiiwiniyuu, kata ihtakuniyuu aniyuu naashch e chisteyihtaakuniyich che ishi aapachihaakanuut, mitun tekash kata pachishtinisuu chechii miywaapachihiikut aniyuu kaa wii aapachihiikut e ihtuutahk mikw taan e itashumikut.

²² Kuchihtaah ekaa chechii papiskaateyitamihiikuyin taan aniyuuh niyaanikutehch e ishi mushteneyihtahk chechii itaatisiit uschiniichuu. Uste iteyihtamihiikuh kuiskutaatisiiwin, taapwehtamuwin, saachihiiwewin kaye maak chiyaameyihtamuwin, e wiicheutwaau anichii kaa tepwaataatwaau Utipeyihchikeu chechii wiichihiikutwaau e payehkaniyikwaau utehiiwaauh.

²³ Ekaawii nanituhta nitamukw ayimuwin kaye chiishkwe ayimuwin, wesh ekut wehchipayihch chechii uhchi machipayihkahtaatunaanuuhch.

²⁴ Wesh an kaa aapachihiikut Utipeyihchikeu namui chipaa uhchi ayaashitemuweu. Chipaa chistimaacheyimeu misiwe aweyuu kaye maak aniyuu e miyu chiskutamaachesuut chipaa siipiiwesiistuweu aweyuuh.

²⁵ Kaye chiyaam chipaa ihtuutaweu e wii kuiskunaat aniyuu kaa naniskuustaakut aweyuuh. Chek maa chipaa chii ihtuutaakuyuuh Chishemanituu chechii kweskaatisiyich kaye chechii chischeyihtamiyich taapwewiniyuu.

²⁶ Kaye chechii chischeyihtamiyich taanite chechii uhchi wiihkuchihuutwaau e chii nakwaatikutwaau machimanituu e chii ihtuutaakutwaau mikw chechii ishi nanihiihtuwaatwaau taan e itashumikutwaau.