2 Timothy 1 - Chishemanituu Utayimuwin: Kaa Uskaach Testament

¹ Niya Paul, kaa masinahamaataan. Jesus Christ utapastalimh niya, wesh eukw uyuu kaa ishi wiyaapamit Chishemanituu. Wiya Chishemanituu nichii itishahuukw chechii aayimuutamuch aniyuu pimaatisiiwiniyuu taan kaa ishi cheshtinaachishtaat che ayaayich aweyuu taapweyimaayichen Jesus Christ.

² Chiya Timothy chimasinahamaatin, chiya nikusihkaatimaawin kaa saachihiitaan. Chishemanituu uhtaawiimaau kaye Utipeyihchikeu Jesus Christ chika miyutuutaakw, chika chistimaacheyimukw kaye chika miikw chiyaameyihtamuwiniyuu.

Nanaaskumuwin nesht kaachiichihiiwewin

³ Ninanaaskumaau Chishemanituu e cheshtinaateyimuyaan e kuiskupimaatisiyaan e atushkuuk, mwehch aniyehkaanaanich aanische niwaahkumaakanich kaa ishi atushkuwaatwaau. Kaye maak ninanaaskumaau Chishemanituu e chischisiitutaataan tahtwaau e ayimihaayaanh e chiishikaach kaye e tipiskaach.

⁴ Nichischisin taan kaa ishi uhchikuwaapiyin maahchishtai kaa waapamitaan. Taapwe nipaa miyeyihten miin waapamitaan wesh naashch chiwii waapamitin.

⁵ Nichischisin naashch suuhk e chii iteyihtamihiikuyin e taapwehtaman. Ekun kaa ishinaakuniyich chikaawii Eunice ekw maak chuuhkuum Lois utaapwehtamuwinawaau. Nicheshtinaateyihten maak ekun e ishinaakuhch kaye chiya chitaapwehtamuwin.

⁶ Eukw maak uu wehchi wii chischisuumitan suuhk muush chechii aapachihtaawat aniyuu miiwewiniyuu Chishemanituu kaa miisk iskutak kaa saaminitaan e ayimiheshtamaataan.

⁷ Wesh aniyuu ahchaahkwa Chishemanituu kaa miitahkw eukw an che waachihiitahkw ekaa chechii kushtaachiihkw. Suuhkaatisiiwiniyuu chimiikunuu uu Ahchaahkw, kaye maak saachihiiwewiniyuu kaye chiwiichihiikunuu chechii nanaakataweyihtamuhk taan e ihtiihkw.

⁸ Ekaawii maak chika uhchi pimaamishiishtamuwaan Chitipeyihchikeminuu umiywaachimuwin chechii aayimuutamut. Kaye maak aat uu mekwaach e chipahukuyaan Christ uhchi ekaawii chika uhchi shaakweyimun e uwiichewaakanitutaataan. Ayeskawiishta teyakuch taan che ishi nanehkaateyimuyin e waawiihtaman miywaachimuwin wesh chika miikw Chishemanituu maskuusiiwiniyuu.

⁹ Chishemanituu chichii pimaachihiikunuu kaye chichii tepwaatikunuu chechii payehchisiihkw e utiiniimitutaatahkw. Namui wii aniyuu taan kaa ishi atushcheuhkw uyuu wehchi ihtuutaatahkw. Eshkw ekaa uhchi ihtakuniyich uyuu aschiiyuu shaash chii wiyeyihtam uyuu che ihtuutaatahkw Chishemanituu. Chichii wii waapahtiikunuu uchishewaatisiiwin Christ e ihtaayich uhchi.

¹⁰ Iskutak maak chipimaachihiiweminuu Jesus Christ kaa pechi nuukuhaakanuut utah aschiihch ekut kaa uhchi chischeyihtamuhk chishewaatisiiwin. Wiya Jesus chii shaakuuchihtaau nipuwiniyuu kaye maak chichii waapahtiikunuu miywaachimuwinihch uhchi e ihtakuhch kaachiche pimaatisiiwin.

¹¹ Chishemanituu nichii wiyaapamukw chechii waawiihtamaan uu miywaachimuwin, kaye Apastal chechii itaapatisiyaan kaye chechii chiskutamaacheyaan uu miywaachimuwin.

¹² Eukw maak uu niyaanikutehch wehch nanehkaateyimuyaan, mikw maak namui ihtakun taan chechii ishi pimaamishiitutamaan uu miywaachimuwin, wesh nichischeyimaau an awen kaa taapweyimak kaye maak mitun nicheshtinaateyihten chechii miyu kanuweyihtahk aniyuu taan kaa ishi pachishteyihtamuuk paatish utihchipayiyiche aniyuu e chiishikaayich miin che takushihk.

¹³ Suuhk yaakwaau nanaakataweyihta kaye muush nuushuushkah taan kaa ishi chiskutamaataan, taapwehtamuwinihch kaye saachihiiwewinihch chechii ishi pimaatisiyin e wiichewat Christ Jesus.

¹⁴ Kaa payehchisiit Ahchaahkw maak usuuhkaatisiiwin e ishi piihchishkaakuwat, suuhk yaakwaau ishi nanaakataweyihtah miywaachimuwin taapwewin taan an kaa pachishtinamaakuyin che waawiihtaman.

¹⁵ Wesh chichischeyihtenaache misiwe anichii kaa kweskaatisiitwaau anite Asia kaa ihtaatwaau e chii nakasitwaau, Phygelus ekw maak Hermogenes namui mitun nitaapateyimikuch.

¹⁶ Nitayimiheshtamuwaayuu Onesiphorus anit aniyuu e peyakuteusiit kaa ihtaayich chechii chistimaacheyimikutwaau Chishemanituuh wesh muush chii ihtakuniyuu taan kaa chii ishi pechi waawiichihiit Onesiphorus, namui mitun uhchi shaakweyimuhiikuu e chipahukuch.

¹⁷ Iskutak kaa takushinit Romehch tiiwehch nichii naanituwaapamukw paatish kaa miskuut.

¹⁸ Kamaa chii nuukuhtwaakut Utipeyihchikeuh e chistimaacheyimikut anit aniyuu e chiishikaayich Christ miin takushiniyichen. Kaye maak chichischeyihtamuwaan taan kaa ishpish chii miyutuutamuut anite mekwaach Ephesus kaa ihtaawach.