2 Thessalonians 2 - Chishemanituu Utayimuwin: Kaa Uskaach Testament

Kaa maayaatisiit che nuukuhaakanuut

¹ Niichishaanitikw, chika aayimuutamaatinaawaau taan che ispayihch Utipeyihchikeu Jesus Christ takushihke maamuuyihkwe anite wiya e ihtaat. Chinituweyimitinaawaau niichishaanitikw,

² ekaa chechii wiyeshihiitaakuch awenichii e itwetwaau shaash e utihchipayiyich Utipeyihchikeu che takushiniyich. Ekaawii taapwehtamukw aat itwete awen Chishemanituuh e chii chischeyihtamihiikut uyuu, maak itwete awen niyaan e chii wiihtamuwachiht uyuu maak itwete e chii ayimihtaat masinahiikaniyuu niyaan e chii masinahiichewachiht uyuu e aayimuutamuchiht.

³ Yaakwaamiikw ekaa mitun chechii wiyeshihiitaakuch awenichii. Eshkw ekaa utihchipayihche an e chiishikaach mihchetu awenichii maahchishtai chika suuhcheyimutuweuch Chishemanituuh. Kaye kata nuukuhaakanuu an awen kaa maayaatisiit ekaa mitun kaa aapateyihtamuwaat Chishemanituuh uwiishuwewiniyuu, eukw uyuu Chishemanituu anite machi ishkutehch che itishahwaat chechii wanaatisiyich.

⁴ Misiwe chekwaayuu kaa ihtuutaakuyich aweyuu chechii nuuchiishtuwaayich Chishemanituu maak Chishemanituu e ihtaayich e uhchipayihch e iteyihtaakuniyich chika maasihtaau. Eukw uyuu che ihtit e nitaweyihtahk wiya maauch chechii chisteyihtaakuhaakanuut. Waawaach chika piihcheu anite Chishemanituu uchisheayimiheukamikuwiihch ekw che itwet wiya e Chishemanituut.

⁵ Namui aa chichischisinaawaau shaash misiwe e chii wiihtamaatakuch uu mekwaach anite e ihtaayekw kaa ihtaayaan.

⁶ An awen kaa aayimuumak ekaa mitun kaa aapateyihtamuwaat Chishemanituu uwiishuwewiniyuu, chichischeyihtamuwaanaawaau chekwaayuu miyemechiminikut wehchi ekaa eshkw pachishtinaakanuut chechii nuukusit.

⁷ Wesh an machaatisiiwin kaa maamishkaateyihtaakuhch shaash atushchemakan mikw maak an taan eshkw che ispayihch namui pitamaa kata uhchi ispayuu paatish chii iichenaakanuute an kaa utamihiiwet.

⁸ Ekw maak che nuukuhaakanuut awen chihchiwe e aawiyit an ekaa mitun kaa aapateyihtamuwaat Chishemanituuh uwiishuwewiniyuu. Mikw maak iskutak takushihke Utipeyihchikeu Jesus wiya chika nipaheu uyehewin e aapachihtaat. Mitun tekash chika wanaachiheu iskutak takushihke uchisteyihtaakusuwinihch.

⁹ Eshkw maak ekaa ispayihch uu an ekaa mitun kaa aapateyihtamuwaat Chishemanituu uwiishuwewiniyuu machimanituu chika miikuu suuhkaatisiiwiniyuu. Maamishkaach waapahtiiwewinh chika waapahtiiweu kaye maak e maamishkaateyihtaakuniyikwaauh chekwaayuuh chika ihtuutam. Eukw uyuu che ihtit chechii uhchi wiyeshihaat aweyuuh.

¹⁰ Misiwe nanaahkuu kata ishi machi wiyeshiheu aniyuuh che wanaatisiyich. Chika wanaatisiyuuh ekaa uhchi wii saachihtaayich taapwewiniyuu anit chechii uhchi pimaachihuyich.

¹¹ Eukw maak uyuu wehchi pachishtinahk Chishemanituu chechii suuhcheyihtaakuniyich e ishi wiyeshihaakanuutwaau anit chechii uhchi taapwehtahkwaau nanatayuwiniyuu.

¹² Ekw maak misiwe awenichii ekaa uhchi taapwehtahkwaau taapwewiniyuu, uste kaa miyeyihtahkwaau e machaatisiitwaau eukunich uchii che nishuuwanaachimaakanuutwaau.

Chishemanituu chichii wiyaapamikuwaau chechii pimaachihiikuyekw

¹³ Iteyihtaakun muush chechii nanaaskumachiht Chishemanituu chiyawaau uhchi, chiyawaau kaa saachihiitaakw Utipeyihchikeu. Wesh shaash chichii wiyaapamikuwaau Chishemanituu chechii pimaachihuwekw eshkw ekaa mechim uhchi ushihtaat uyuu aschiiyuu. Chika pimaachihunaawaau maak wesh Chishemanituu kaa suuhcheyihtaakusiyich Utahchaahkwa chika ihtuutaakuwaau Chishemanituu chechii utiiniimitutaataakw wesh chitaapwehtenaawaau taapwewin.

¹⁴ Chishemanituu chichii wiyaapamikuwaau chechii taapwehtamekw taapwewin iskutak kaa wiihtamaataahch miywaachimuwin. Chichii wiyaapamikuwaau chechii ayaawekw Chitipeyihchikeminuu Jesus Christ uchisteyihtaakusuwin.

¹⁵ Ekw maak niichishaanitikw, suuhk suuhchikaapuukw chitaapwehtamuwiniwaahch kaye mamechiminamukw taan kaa ishi chiskutamaataahch kaa kacheschimitaahch kaye taan kaa ishi masinahamaataahch.

¹⁶ Chishemanituu Kuuhtaawiinuu neshta Chitipeyihchikeminuu Jesus Christ chisaachihiikunuuch kaye chichii miikunuuch kaachiche kaachiichihiiwewiniyuu kaye aspeyimuwiniyuu shaweyihchichewinihch uhchi.

¹⁷ Nitutamuwaanaanich chechii kaachiichihiikuyekw kaye chechii suuhchikaapuuyekw misiwe taan e ishi miyutuutamekw kaye taan e ishi ayimiyekw.