2 Peter 3 - Chishemanituu Utayimuwin: Kaa Uskaach Testament

Che takushihk Utipeyihchikeu

¹ Niiwiichewaakanitikw eukw uu niishwaa che masinahamaatakuch. Taapishkun anit kaa masinahamaatakuch suuhk nichii kuchihtaan chechii wiichihiitakuch chechii payehchi maamituneyihtamihiikuyekw misiwe chekwaan e chischisuumitakuch uyuu chekwaayuu.

² Chiwii chischisuumitinaawaau taan kaa itwetwaau aniyehkaa uchischiwehiichesuuch kaa payehchi pimaatisiitwaau kaye maak taan kaa itashumitaakw Utipeyihchikeu chipimaachihiiweminuu aniyuuh wii tipiiwe utapastalimh uhchi.

³ Niishtam maak chekwaan waa ititakuch, che wii chischisiyekw iskutak ati peshunaakuhche che takushihk Utipeyihchikeu chika ihtaauch maayeyihchesuuch, naashch chika tipeyimikuuch umachinituweyihtamuwinawaauh uchii. Chika maayeyimikuwaauch.

⁴ Chika itweuch maak e maayeyimitaakuch, “Taan maak uu che takushihk Utipeyihchikeu muush kaa pechi aayimuumekw. Kaa ishpish chii pechi ihtakuhch uu aschii misiwe chekwaan muush peyakunihch ishpish mamiyuupayuu.”

⁵ Ihtakuniyuu maak taan aniyuuh uhchistuu ekaa yaapateyihtahkwaau uyuu e ihtitwaau kaye uyuu e itwetwaau uchii. Weskach anite taapwe Chishemanituu mikw chii ishi itweu chechii ihtakuniyich aschiiyuu kaye misiwe anite chiishikuyuu ekun maak nihaau kaa ishinaakuniyich. Wesh nipiihch chii uhchi ushihtaakanuu aschii kaye maak nipii chii aapatan kaa uweyiskamitinikanuuhch.

⁶ Kaye maak nipiihch chii uhchi wanaachihtaakanuu aniyene weskach aschii.

⁷ Uyuuh maak chiishikw kaye an nete etituu ishi ispimihch, ekw maak uu aschii anuhchiish kaa waapahtamukw, yaapach Chishemanituu utayimuwin uhchi kanuweyihtaakanuu che ishpish utihchipayihch anit che wanaachihtaakanuuhkwaau. Kanuweyihtaakanuu an e chiishikaach anichii ekaa kaa aapateyimaatwaau Chishemanituu upimaatisiiwiniwaahch che wiyaaskunaakanuutwaau kaye che wanaachihaakanuutwaau ishkutehch.

⁸ Peyakw chekwaan ekaawii chika uhchi wanichischisinaawaau niichishaanitikw. Peyakun yaapach iteyihtamihiikuu Utipeyihchikeu peyakw chiishikaau taan e iteyihtamihiikut peyakwaau chishemitaahtumitanuu pipunh.

⁹ Taapaa pwaashtawiyuu Utipeyihchikeu chechii ihtuutahk taan aniyuuh kaa itwet che ihtuutahk. Pwaashtawiyuu iteyimeuch maak kutakach awenichii. Chisiipiiwesiistaakuwaau wesin, ekaa waachi peyakw aweyuu nitaweyimaat chechii wanaatisiyich, wesh misiwe aweyuuh nituweyimeu chechii nakatamiyich umachaatisiiwiniyuu.

¹⁰ Mikw maak namui niyaakan chika uhchi muushihtaakanuyuu Utipeyihchikeu uchiishikaam, muyaam e iteyihtaakuhch chimutisk taanit waa piihchech waaskahiikaniyuu e wii kachemutit ekun che iteyihtaakuhch. Anit maak aniyuu Utipeyihchikeu uchiishikaam utihchipayiche uyuuh chiishikw chika paasikunaakun. Naasch taapwe chika chishewepayuu ati paasikunaakuhkwaawenh. Misiwe taan e ishi ihtakuhch chiishikuhch kata atihtiteuh che ishpish mista chishitech. Aschii kaye maak misiwe chekwaan utah kaa ihtakuhch, chika ati mestaahkahteu.

Siihchimuwewin chechii payehchi pimaatisiinaanuuhch

¹¹ E chischeyihtamekw maak uu che ispayihch, taanite chipaa ishi pimaatisiinaawaau chititeyihtenaawaau. Namui aa payehchisiiwinihch chipaa ishi pimaatisiinaawaau, tekash e ishi pachishteyihtamihiikuyekw chipimaatisiiwinawaauh Chishemanituu ishi e ihtaat,

¹² kaye e pukuseyihtamekw Chishemanituu uchiishikaam che utihchipayiyich. Suuhk chipaa atuskuwaatwaau Chishemanituu che ishpish utihchipayiyich aniyuu uchiishikaam. Wesh an e chiishikaach misiwe chiishikuh kata atihtiteuh kaye kata wanaatanh. Ekw misiwe aniyuu waashtewin anite chiishikuhch kaa ihtakuhkwaauh kata atihtiteuh che ishpish wesa mistihkuyepayihch ishkuteu misiwe anite chiishikuhch.

¹³ Chiyaanuu maak wii, aniyuu taan kaa itwet Chishemanituu cheshtinaash che ihtuutahk eukun an e ashuwaapahtamuhkw, eukuu che uskaakwaauh chiishikuh kaye aschii. ekute maak anite kuiskutaatisiiwin che ihtakuhch.

¹⁴ Ekw maak niichishaanitikw mekwaach uu e ashuwaapahtamekw an e chiishikaach kwaast e ishpish chii ihtiyekw wii payehchi pimaatisiikw kaye ekaawii chekwaan chika uhchi wii ataameyihtaakusinaawaau Chishemanituu ishi e ihtaat. Suuhk kata wii kuiskunaakunh chipimaatisiiwinawaauh ekw maak che ihtakuhch chiyaameyihtamuwin anit mekwesiinuu e ihtaayekw.

¹⁵ Aniyuu wehchi ekaa eshkw takushihk Utipeyihchikeu etituu wii taunam taanite eshkw chechii pimaachihuyich aweyuu, eukw uu wiishi kanawaapahtamuwaahkw aniyuu eshkw ekaa takushihk. Ekun wesh uyuu kaye wiya kaa ishi aayimuutahk chiichishaanuu Paul anit kaa masinahamaataakw taan kaa ishi miikut kaye wiya Chishemanituu kachehtaaweyihtamuwiniyuu.

¹⁶ Ekun wesh e ishi aayimuutahk kaye wiya misiwe anit kaa mamasinahamaachet. Ihtakuniyuuh kiipaa e wii aayimihtaakuniyikwaau pasch chekwaayuu taan e ishi aayimuutahk. Eukunh maak uyuuh chekwaayuuh nitamukw waa ishi itweshtamuwaatahkwaau anichii ekaa kaa nisituhtahkwaau Chishemanituu utayimuwiniyuu kaye anichii ekaa kaa suuhchikaapuutwaau. Ekun kaye e ihtuutahkwaau nanaahkuu taan e ishi aayimuuteyich Chishemanituu utayimuwinihch. Wiyawaau maak niyaanitam ati wanaachihiisuuch uyuu e ihtitwaau.

¹⁷ Chiyawaau maak wii niichishaanitikw shaash chichischeyihtenaawaau misiwe uu. Yaakwaamiikw maak ekaa chechii wanihtahiitutaakuch anichii ekaa kaa ayaapateyihtahkwaau taan e ishi wiishuwaanuyich. Wesh chiishpin uu ispayihche chika wanihtahiikunaawaau taanite an e ihtaayekw mekwaach, an e chii cheshtinaateyihtaakuhtaakanuuhch taanite naapuuyekw.

¹⁸ Suuhk etituu wii ishi nihtaauchikw ushaweyihchichewinihch chitipeyihchikeminuu kaye chipimaachihiiweminuu Jesus Christ, kaye suuhk etituu wii chischeyimaahkw chipimaatisiiwiniwaahch. Wiya maak katawii chisteyihtaakuhaakanuu anuhchiish kaye kaachiche. Amen.