2 Peter 2 - Chishemanituu Utayimuwin: Kaa Uskaach Testament

Kaa wiyeshihiiwetwaau chiskutamaachesuuch

¹ Chii pechi ihtaauch maan anite utaahch naspaach uchischiwehiichesuuch. Ekun maak yaapach che ispayihch anite niishtaamihch. Chika ihtaauch nitamukw kaa ishi chiskutamaachetwaau mekwesiinuu anit Chishemanituu utiiniim e ihtaayich. Nitamukw chika ishi chiskutamaacheuch, kaye naashch taapwe chika wanihtahiiwemakaniyuu taan che ishi chiskutamaachetwaau. Waawaach aniyuu kaa nipistamaakutwaau tekash chika aataweyimeuch. Ekut maak anit che uhchi ihtuutaasutwaau sischikuuch chechii wanaatisiitwaau.

² Yaapach maak mihchetu aweyuu chika chischinuwaapamikuuch aniyuu nitamukw e itaatisiitwaau. Ekw maak uyuu e itaatisiitwaau ekut che uhchi machaayimuutaakanuuhch taapwewin meskanuu.

³ Aniyuu maak che ishpish wii weyuuch ayaatwaau uchii naspaach chiskutamaachesuuch nitamukw tipaachimuwin chika waawiihtamaakuwaauch. Ekut maak niyaanitam aniyuu nitamukw e itaachimushtaataakuch che uhchi wii itaapachihiitaakuch chechii uhchi ushuuliyaamihkaasutwaau. Eukunich maak uchii shaash weskach kaa ayeskushteyich taan che ishi waweshihaakanuutwaau kaye muush chii cheshtinaachisteyuu taan che ishi wanaatisiitwaau.

⁴ Taapaa yaapach uhchi manaachiheu Chishemanituu aniyuu enchil kaa wanituutamiyich, yaapach machi ishkutehch chii itishahuweu. ekute maak anite mekwaach e ihtaayich. Maahchikwaapiskahwaakanuyuu anite e ukaashteyaayich. ekute maak anite che ihtaayich che ishpish ekaa utihchipayiyich taanit che wiyaaskunaakanuyich.

⁵ Kaye maak, aniyuu niishtam aschiiyuu namui uhchi manaachihtaau Chishemanituu. Ekun kaa ishi aschiputaat kaa ishpish wesaa chii machaatisiinaanuyich anit aniyuu mekwaach. Mikw yaanaaneu aweyuu chii pimaachiheu, eukw uu Noah an kaa aayimuutahk chechii kuiskw itaatisiinaanuyich ekw maak aniyuu niishwaashch e tashiyich anit e peyakuteusiit.

⁶ Chishemanituu kaye chii wanaachihtaau aniyuu ihtaawinh Sodom ekw maak Gomorrah kaa ishinihkaateyikwaauh ishkuteyuu e chii aapachihtaat. Ekut kaa uhchi waapahtiiwet taan che ihtuutawaat aniyuu ekaa mitun kaa aapateyimikut.

⁷ Chii wiihkuchiheu maak aniyuu Lot kaa ishinihkaasuyich. Kuiskw chii ishi pimaatisiyuu uu Lot. Kaye maak naashch chii misimiskaakuu utehiihch taan kaa ishpish chii machi pimaatisiinaanuyich anit aniyuuh ihtaawinh.

⁸ Wesh ekut kaa ihtaat Lot an kuiskw kaa ishi pimaatisiit naapeu. Eshikum chiishikaau maak chimisimiskaakuu utahchaahkuhch taan kaa ishi pehtahk kaye taan kaa ishi waapahtahk e ishi pimaatisiinaanuyich.

⁹ Cheshtinaash kaschihtaau Chishemanituu chechii wiihkuchihaat ukuiskutaatisiiu taan e ishi nachishkamiyich kaye maak nanaakataweyihtamihiikuu wesh Chishemanituu taan e ishi machaatisiinaanuyich e chischeyihtahk peyakwaau e chiishikaayich misiwe aweyuu che wiyaaskunaat.

¹⁰ Etituu maak cheshtinaateyihtaakuniyuu che wiyaaskunaakanuutwaau anichii mikw e ishi machi nitaweyihtamuumakaniyikwaau uwiiyaasu pimaatisiiwinawaau kaa ishi nuuspinitahkwaau, anichii kaa uhkaateyihtahkwaau tipeyihchichewiniyuu. Naasch taapwe suuhchimaayeyihcheuch eukunich uchii, namui mitun nanaakataweyimeuch taan e itaatwaau maak taan e ihtuutawaatwaau aweyuu e maayeyimaatwaau. Namui neshta sechisuuch chechii machi aayimuutahkwaau chisteyihtaakusuwiniyuu. Taapaa mechim nakaawiyuuch chechii maayeyimaatwaau aniyuu aweyuuh uchimaawiniyuu kaa ayaayich.

¹¹ Enchilich maak wii, aat e ishpish etituu suuhkaatisiitwaau kaye e ishpish etituu suuhcheyihtaakusitwaau yaapach namui kachiihkaameuch e mamishimaatwaau aniyuu nitamukw kaa ishi chiskutamaacheyitwaau uhchishkuu Utipeyihchikeu e ihtaayich.

¹² Mikw waa ihtitwaau ihtuuch awesiisach. Uchii maak naspaach chiskutamaachesuuch ekun mwehch e iteyihtaakusitwaau kaye wiyawaau. Mamachaayimuutamuch aniyuuh chekwaayuuh ekaa kaa nanesituhtahkwaau. Mwehch maak kaa ishihaakanuut kutak awesiis mikw chechii kaahchitinaakanuut kaye chechii nipahaakanuut ekun mwehch e ishinaakuniyich taan che ishi waweshihaakanuutwaau uchii naspaach chiskutamaachesuuch.

¹³ Wiyawaau maak niyaanitam chika taapishtuwaakanuuch taan kaa ishpish chii pechi ayaahkuhaatwaau aweyuu. E chiishkweyaatisiinaanuyich maak, mikw e mamachi muuchikahtaakanuyich e mekwaau chiishikaayich, eukun uyuu e iteyihtahkwaau muuchikan. Namui nihiinaakusuuch kaye wiyawaau maauch pimaaminaakusuuch anit maan e wiichi miichisuumitaakuch. Anit aniyuu mekwaach e wiichi miichisuumitaakuch ekut niyaanitam memachi muuchiteyihtamihiisutwaau e chischeyihtahkwaau taan e ishi wawiyesimitaakuch.

¹⁴ Namui wiiskaat puunipayuu nitawiin e ishi kanawaapamaatwaau iskweu. Namui chii puunihtaauch machituutamuwiniyuu. Wawiyesimeuch kaye aniyuu aweyuuh ekaa kaa yaaichikaapuyich taapwehtamuwinihch. Saakaschineyuu utehiiwaahch mushtenamaachewiniyuu. Maayaatisiyuuch uchii uyuu kaa iteyihtaakusitwaau,

¹⁵ shaash chii nakatamuch kuiskw e ishi pimuhtaanuyich Chishemanituu ishi e ihtaayich. Chii paschehteuch chechii nuuspinatamuwaatwaau taan kaa ishi pimuuteyich Balaam, Bosor ukusisiyuu. Uu Balaam kaa ishinihkaasut chii iteyihtamihiikuu chekwaayuu chechii utinamaasut wanihtuwinihch uhchi.

¹⁶ Chii ihtakuniyuu maak taan kaa ishi chistahamuwaakanuut uu Balaam taan kaa ishpish chii chiishkwet. Uhkaanh muyaam kaapalakaskweu kaa ishinaakusiyich chii aapachihaakanuuyuu chechii ayimihiikut, eukun uyuu uhkaan kaa chistahamaakut uu uchischiwehiichesuu ekaa etituu chechii chiishkwet.

¹⁷ Uchii maak awenichii mwehch uhtahiipaan e paahkupayihkuwaauh iteyihtaakusuuch, maak mwehch kaskawanishkuch e papaamaasitwaau. Anite maauch e ukaashteyaayich ekute e ayeskuushtwaakutwaau Chishemanituu chechii ihtaatwaau.

¹⁸ Wesh naashch taapwe chistaachimisuuch kaye chiishkwe ayimuuch. Taan e ishi machi nitaweyihtamuumakaniyich maak wiyaasuu pimaatisiiwiniyuu ekut wehtaapachihuutwaau chechii kaahchitinaatwaau aniyuu aweyuu anuhchiish kaa uhchii wiihkuchihuyich anite e waanipayinaanuyich e chii ishi wiichihiiweyich.

¹⁹ Aayimuutamuweuch aweyuuh wiihkuchihiikusiiwiniyuu. Wiyawaau maak naashch taapwe ihtakuniyuu taan e ishi maahchikwaapihkaatikutwaau machi ihtuwiniyuu, wesh mikw chekwaayuu e shaakuuchihiikut awen eukun aniyuu tepeyimikut.

²⁰ Chiishpin kaa wiihkuchihuuwaakwenich awenichii taan e ishi machituutaachemakaniyich uyuu aschiiyuu aniyuu taan e ishi chischeyimaatwaau ekw Jesus Christ e Tipeyichikeyich kaye e Pimaachihiiweyich miin maak kaau e kaahchitinikutwaau kaye e shaakuuchihiikutwaau uyuu chekwaayuu etituu iteyihtaakuniyuu taanit e ihtaatwaau anuhchiish ishpishaat wii taanit kaa pechi ihtaatwaau niishtam.

²¹ Uste chipaa miywaayikupane ekaa mechim uhchi chischeyihtakwaau taapwewiniyuu ishpishaat wii chechii chischeyihtahkwaau ekw maak kaau chechii nakatahkwaau aniyuu kaa ishi chischeyihtamihaakanuutwaau.

²² Aniyuu maak kaa ispayitwaau eukw uyuu kaa chii iinaanuyich: “Atim kaau naatam upaakumuwin ekw maak kuuhkuush e chii chistaapauyaakanuut, miin tihtipishimuu anite e iipataniyich.”