2 Peter 1 - Chishemanituu Utayimuwin: Kaa Uskaach Testament

¹ Niya Simon Peter. Jesus Christ nitatushkuwaau, wiya nichii wiyaapamikw apastal chechii itaapatisuuch. Chimasinahamaatinaawaau chiyawaau kaa ayaayekw taapwehtamuwin mwehch an e iteyihtaakuhch niyaan kaa ayaayaahch. Eukw uyuu taapwehtamuwiniyuu chipimaachihiiweminuu kaye Chichishemanituuminuu Jesus Christ kaa miitahkw. Wiya chitihtuutaakunuu chechii kuiskunaakusiyuuhkw Chishemanituu ishi e ihtaat.

² Shaweyihchichewin kaye chiyaameyihtamuwin chika wii ayahchihtamaakunaawaau an uhchi e chischeyimekw Chishemanituu kaye Jesus Chitipeyihchikeminuu.

Chishemanituu e wiyaapamaat neshta e tepwaataat aweyuuh

³ Chichischeyimaanuu ekw Jesus Christ chipimaatisiiwinaahch, an awen kaa tepwaatitahkw chechii chischeyihtamihiitahkw wiya tipiiwe uchisteyihtaakusuwin kaye uchishemanituuwaatisiiwin. Ekut maak uu uhchi, uyuu e chischeyimakw Jesus, Chishemanituu wiya usuukaatisiiwinihch uhchi shaash misiwe chichii miikunuu taan e ishi nitaweyihtaakuniyich chipimaatisiiwinaahch taapwe wiya e ihtaat chechii ishi pimaatisiyuuhkw.

⁴ Ekut maak kaye uyeyuu uhchi, uyuu taan shaash kaa ishi miitahkw chipimaatisiiwinaahch, ekut kaa uhchi miitahkw aniyuu miiwewinh naashch kaa chisteyihtaakuniyikwaau kaye naashch kaa miywaashiyikwaau. Eukun wesh kiipaa aniyuuh miiwewinh kaa ashutamuwaat misiwe aniyuu che taapweyimikut. Uyuuh maak miiwewinh kaa ashutamaatahkw eukw uyuuh che wiichihiikuyihkw ekaa chechii shaakuuchipitikuyihkw kaa nishuuwanaachihiiwemakahkwaau machi nituweyihtamuwinh utah aschiihch kaa ihtakuhkwaauh. Ekut kaye chechii uhchi wetaach iteyihtaakusiihkw taan e iteyihtaakusit wiya Chishemanituu.

⁵ E waapahtamekw maak uu kaa ishpish wesa chii miyutuutamaakuyihkw, suuhk kuchihtaakw kuiskutaatisiiwin chechii nuukuhch an e taapwehtamekw. Ekw maak chikuiskutaatisiiwiniwaahch suuhk che wii ati ayaayekw chischeyihtamuwin, wetaach che wii miyu chischeyimekw Chishemanituu kaye utayimuwin wetaach che wii ati miyuu chischeyihtamuwekw.

⁶ Miin maak chekwaan che wii ati ayaayekw eukw uu chechii miyu nanaakataweyimisuyekw chipimaatisiiwiniwaahch. Iskutak maak e ati miyu nanaakataweyimisuyekw ekw che ati suuhchikaapushtamekw nanaahkuu chekwaan. Uu maak e ati suuhchikaapuuyekw ekw che ati manituuwaatisiyekw.

⁷ An maak e ati manituuwaatisiyekw, ekw che ati chishewaatutawekuch chiichishaanuwaauch. Iskutak maak e ati chishewaatutawekuch chiichishaanuwaauch ekw che ati ayaayekw saachihiiwewin.

⁸ Eukw maak uyuu chekwaayuu wetaach chipaa weyuuch ayaanaawaau chipimaatisiiwiniwaahch. Wesh chiishpin taapwe weyuuch ayaayekwe chika ihtuutaakunaawaau taapwe chechii weyuuch atuskuwekw Chitipeyihchikeminuu Jesus Christ aniyuu taan e ishi chischeyimekw chipimaatisiiwiniwaahch. Kaye naashch taapwe chika miyu atuskawaawaau.

⁹ Ekw maak an awen ekaa mitun kaa ihtakuniyikwaauh uyuu chekwaayuu upimaatisiiwinihch mwehch ekaa mitun waahiyuu kaa ishi waapahtahk awen ishinaakusuu, waawaach awen ekaa kaa waapahtahk iteyihtaakusuu, wanichischisiitutam kaye taan kaa ishi payehchihaakanuut umachihtwaawinihch uhchi, taan kaa ishi wepeyihtamuwaakanuut.

¹⁰ E maamituneyihtamekw maak misiwe uu kaa ishi ihtuutamaakuyihkw, nichishaanitikw, suuhk etituu kuchihtaakw taapwe chechii nuukuhch, taapwe chechii nishituunaakuhch chipimaatisiiwiniwaahch e chii wiyeyimitaakw Chishemanituu kaye e ihtakuniyich taan kaa ishi tepwaatitaakw chechii itaapatisuwekw. Wesh chiishpin uu ihtiyekwe namui wiiskaat chika uhchi pahchishinaawaau chitaapwehtamuwinawaach uhchi.

¹¹ Ekut kaye chechii uhchi mikw ishi piihtakahiikuyekw Chitipeyihchikemanuu kaye Chipimaachihiiweminuu Jesus Christ uchimaawinihch, aniyuu kaachiche che ihtakuniyich.

¹² Eukw wesh kiipaa kaye uu che uhchi muush wii chischisuumitakuch uyuu chekwaayuu aat shaash e chischeyihtamekw kaye shaash e cheshtinaateyihtamihiikuyekw taan e ishi taapwehtamekw anuhchiish.

¹³ Ekun kiipaa taapwe e ishi miyawaach chechii ihtuutaatakuch nititeyihten, muush chechii chischisuumitakuch uyuu chekwaayuuh eshkw mekwaach e pimaatisiyaan.

¹⁴ Wesh nichischeyihten shaash wiipach che puunipimaatisiyaan utah wii uu aschii, muyaam taan kuiskw kaa ishi pechi wiihtamuut Chitipeyihchikeminuu Jesus Christ.

¹⁵ Ekun maak che uhchi kwaast ihtiyaan chechii nisituhtamihiitakuch uyuu chekwaayuu muush chechii chischisiyekw iskutak ekaa pimaatisiyaane.

Anichii kaa waapahtamuwaatwaau Christ uchisteyihtaakusuwiniyuu

¹⁶ Taapaa namayeu wii e chii ushihtaakanuuhkwaau tipaachimuwin kaa aapachihtaayaahch iskutak kaa wii chischeyihtamihiitaahch taapwe che takushihk Chitipeyihchikeminuu Jesus Christ ushuukaatisiiwinihch. Niyaan wesh tipiiwe nischiisikuunaanihch nichii waapaamaanaan e chisteyihtaakuhaakanuut.

¹⁷ Nichii ihtaawaanaan anit kaa chiihkaayeyihtaakuhiikut kaye kaa chisteyihtaakuhiikut Chishemanituu Uhtaawiimaau, anit kaa pehtamaahch pehtaakusuwin anite maauch e chisteyihtaakuch uhchi e itwet Uhtaawiimaau, “Eukw uu Nikus naashch kaa saachihiik kaye naashch kaa nahiiwehiit.”

¹⁸ Niyaan tipiiwe nichii pehtenaan uu pehtaakusuwin kihchikiishikuhch uhchi mekwaach anite kaa ihtaayaahch aniyuu wachiyuu kaa chisteyihtaakuhaakanuut.

¹⁹ Ekut maak wehchi etituu cheshtinaateyihtamihiikuyaahch taan kaa ishi aayimuutahkwaau uyuu miywaachimuwiniyu aniyehkaanaanich uchischiwehiichesuuch. Chika miywaau maak taapwe yaakwaau chechii ishi nanaakatuweyihtamihiikuyekw uu miywaachimuwin, wesh mwehch taapwe waashtenamaakan e chiihkaayaastech anite e ukaashteyaach ekun e iteyihtaakuhch. Ekun maak e ishinaakuhch che ishpish ekaa utihchipayihch an e chiishikaach che takushihk Utipeyihchikeu. Wiya maak uwaashtewin muyaam e ishpish chiihkaayaashtuwet chechishepaayaau achahkush ekun che ishpish waashtenamaakuwekw chitehiiwaahch.

²⁰ Maauch maak e ishi nitaweyihtaakuhch chechii nishituhtamekw eukw uu ekaa waachi peyakw chischiwehiichewin anite Chishemanituu utayimuwinihch kaa ihtakuhkwaau chechii itweshtamaatahk naapeu mikw wii e payakushit.

²¹ Wesh taapaa waachi peyakw chischiwehiichewin naapeu utiteyihtamuwinihch uhchi uhchipayuu. Kaa payehchisiyich Ahchaahkwa chii ihtuutaakuuch uchii naapeuch chechii wiihtahkwaau taan kaa ishi nitaweyimikutwaau Chishemanituu chechii ishi wiihtahkwaau.