2 John 1 - Chishemanituu Utayimuwin: Kaa Uskaach Testament

¹ Niya peyakw kaa niikaanishkuwaat umaamuuayimihaauh chimasinahamaatin chiya kaa wiyaapamikuyin uchimaashkweu kaye maak Chitawaashiimach nimasinahamuwaauch. Eukw chiyawaau taapwe kaa saachihiitakuch. Namui maak mikw niya chisaachihiitinaawaau. Misiwe kaye anichii kaa chischeyihtahkwaau taapwewiniyuu chisaachihiikuwaauch.

² Wesh chikanuweyihtenaanuu kaye chinanihiihtenaanuu taapwewin chitehiinaahch kaye maak ekut muush che ihtakuhch kaachiche.

³ Chishemanituu Uhtaawiimaau ekw maak Jesus Christ aniyuuh Uhtaawiimaau Ukusisa chika chishewaatutaakunuuch, chika chistimaacheyimikunuuch kaye chika miikunuuch chiyaameyihtamuwiniyuu. Taapwe ekun che ishi ayaayihkw e chischeyihtamuhkw taapwewin kaye saachihiiwewin.

Taapwewin ekw maak saachihiiwewin e aayimuutaakanuuhch

⁴ Naashch taapwe nichii muuchicheyihten iskutak chescheyihtamaan pasch chitawaashiimach taapwewinihch e ishi pimaatisiitwaau mwehch aniyuu kaa itashumitahkw Uhtaawiimaau chechii ishi pimaatisiyuuhkw.

⁵ Anuhchiish maak chinitutamaatin chiya uchimaashkweu chechii saachihiituyihkw. Namui chimasinahamaatinaawaau e wiihtamaatakuch e uskaach kacheskwewin, muush chichii itikunaanuu chechii saachihiituyihkw iskunaak kaa pehtamuhkw miywaachimuwin.

⁶ Mwaau maak saachihiiwewin, chechii ihtuutamuhkw taan e itashumitahkw Chishemanituu. Eukw maak uu itashuwewin kaa miikuyihkw maauch niishtam kaa pehtamuhkw miywaachimuwin, chechii ishi pimaatisiihkw taan e ishi pimaatisiitwaau anichii kaa saachihaatwaau Chishemanituuh kaye wiichishaanuwaauh.

Anichii kaa uhkaataatwaau Christ

⁷ Mihchetu kaa wiyeshihiiwetwaau shaash papaamaachimuuch utah aschiihch e aanuwehtahkwaau taapwe e chii takushiniyich Jesus muhch naapeu e chii iteyihtaakusiyich. Uyuu maak e iteyihtaakusit awen eukw uu kaa suuhcheyimututawaat Christ kaye muush kaa wiyeshihiiwet.

⁸ Yaakwaamiikw maak ekaa chechii wanihtaayekw an tipahamaakusiiwin kaa aapatisiihkahtamekw chechii ayaayekw, taapwe chechii miskamekw misiwe taan e ishi ayeskuushtamaataakw Chishemanituu.

⁹ An awen ayiwaak kaa ishi chiskutamaachet taan e ishi Chiskutamaacheyich Christ kaye ekaa kaa nanihiihtuwaat taan kaa ishi chiskutamaacheyich namui ayaaweu Chishemanituuh. Ekw an awen muush yaakwaau kaa naanaakachihtaat taan e ishi Chiskutamaacheyich Christ taapishkun Uhtaawiimaau ekw maak Ukusisimaau wiicheweu.

¹⁰ Nituwaapamiske maak awen ekaa chiskutamaachet taan e ishi Chiskutamaacheyich Christ ekaawii piihtakahii chiichihch. Ekaawii mechim chika uhchi waachiyemaau.

¹¹ Wesh an awen kaa waachiyemaat aniyuuh nitamukw kaa ishi chiskutamaacheyich wiichiheu e machituutamiyich.

Maahchishtai e ati itwet John

¹² Aat eshkw mistahii e ihtakuhch taan waa ititakuch, namui niwii masinahen taan waa itweyaan. Teyakuch nipukuseyihten chechii nituu chiyuutamitakuch wechiihch chechii ayimihiituyihkw ekw maak taapwe che miyeyihtamuhk.

¹³ Utawaashiimh an chiichishaaniskwemuwaau Chishemanituuh kaa wiyaapamikut chiwaachiyemikuwaauch.