2 Corinthians 9 - Chishemanituu Utayimuwin: Kaa Uskaach Testament

E ihtakuhch shaweyihchichewin e miiwaanuuhch

¹ Namui petinaasch nitaweyihtaakun chechii aayimuutamaatakuch e pachishtinikaanuuhch anit e uhchi wiichihaakanuutwaau anichii kaa taapwehtahkwaau Judeahch kaa ihtaatwaau.

² Chichischeyimitinaawaau kiipaa naashch e aashihcheyihtamekw chechii wiichihekuch. Chichii aayimuumitinaawaau maak anite Macedoniahch kaa itakwaau anichii iinuuch, “Chiichishaanuuch Achaia kaa ishinihkaateyich aschiiyuu kaa ihtaatwaau, shaash pepuniyich chii ayeskuwiyuuch chechii pachishtinichetwaau shuuliyaayuu,” nichii itaauch. Kaa pehtahkwaau uyuu naashch chii iteyihtamuch kaye wiyawaau chechii pachishtinichetwaau.

³ Ihtaauch uchii chiichishaanuuch e itishahamaatakuch chechii utinahkwaau aniyuu shuuliyaayuu kaa pachishtinamuwekw e wiichihaakanuyich aniyuu kaa taapwehtamiitwaauh anite Jerusalemihch kaa ihtaayitwaauh. Waapahtiiwekw taapwe e ishinaakuhch taan kaa itaachimitaahch naashch e aashihcheyihtamekw chechii wiichihiiweyekw kaye chiyawaau.

⁴ Eshkw maak ekaa che ayeskuwiiwekwe chechii pachishtinamekw shuuliyaau utihtitaahche, kiipaa nawaach che shaakweyimuhiyaahch kaye chiyawaau maak nawaach chika pimaameyimunaawaau. Wesh naashch taapwe nichii cheshtinaahun mikw che ishi pachishtinicheyekw.

⁵ Eukw uu wehchii niikaan itishahamaatakuch uchii niichishaanich, chika chii wiichihiikuwaauch chechii ayeskuunamuwekw aniyuu shuuliyaayuu kaa itwewekw che pachishtinamuwekw. Waapahtamaane maak shaash e chii ayeskuunamekw an chipachishtinichewinawaau takushiniyaane ekut che nisituunaakuhch ekaa aayihkam uhchi pachishtinicheyekw maak e chii sichiyesiyekw chechii miiweyekw.

⁶ Maau che wii chischisiyekw, an mikw apishiish kaa nihtaauchihchihchet mikw apishiish chekwaayuu chika nihtaauchiniyuu ekw an mistahii kaa nihtaauchihchet mistahii chekwaayuu kata nihtaauchiniyuu.

⁷ Misiwe paahpeyakw awen mikw taan kaa iteyihtahk utehiihch che ishpish pachishtinichet ekun chipaa ishpish pachishtinicheu. Namui chipaa uhchi maaisiyuu kaye namui aaisaach chipaa uhchi pachishtinicheu. Chishemanituu naashch saachiheu aniyuu aweyuu kaa miyeyihtamiyich e pachishtinicheyich.

⁸ Chika chii ihtuutam Chishemanituu paashich chechii ishpish miitaakw tahtwaau e shaweyimitaakw, ekw maak muush che ayaayekw taan che ishi nitaweyihtamuwekwe. Paashich chika ishpish miikuwaau kutakach awenichii chechii wiichihekuch.

⁹ Itashteu Chishemanituu utayimuwinihch, An awen kaa weyuuch wiichihaat aniyuu kaa chistimaatisiyich kaachiche kata chischisinaanuyuu umiyuutuutamaachewin.

¹⁰ Chishemanituu eukw maayaat nihtaauchihchesuu chekwaayuu che nihtaauchihtaayich. Wiya kaye ashameu misiwe aweyuuh. Kaye chiyawaau maak chika weyuuch miikuwaau mihchetu awenichii chechii wiichihekuch. Ekw maak uu e ishi miyutuutamaacheyekw mihchetu awenichii mistahii chika miyutuutamaakuuch Chishemanituu.

¹¹ Kaye chiyawaau maak naashch taapwe nanaahkuu chika ishi weyuuch miikuwaau Chishemanituu ekw maak nanaahkuu chechii ishi miyekuch kutakach. Ekw maak che mihchetitwaau anichii che nanaaskumaatwaau Chishemanituu iskutak miskahkwaawenich aniyuu chipachishtinichewinawaayuu.

¹² Uyuu maak e ishi miyutuutamuwekuch kaa taapwehtahkwaau e miyekuch taan e ishi nuuhtepayitwaau ekut wehchipayiyich mistahii chechii nanaaskumaatwaau Chishemanituu.

¹³ Eyuu maak kata chishtaachimeuch Chishemanituu waapahtahkwaawenich e nuukuniyich taapwe e taapwehtamuwekw kaye e nanihiihtamuwekw Jesus Christ umiywaachimuwin. Kaye maak kata chishtaachimeuch Chishemanituuh aniyuu taan kaa ishpish wiichihekuch kaye taan kaa ishpish wiichihiimekw kutak aweyuuh.

¹⁴ Kaa ishpish chii weyuuch shaweyimitaakw Chishemanituu chika saachihiikuwaauch kaye maak chika ayimiheshtamaakuwaauch.

¹⁵ Nanaaskumaataau Chishemanituu aniyuu umiiwewin. Namui nihaau chii wiihtaakanuuyuu e ishpish miyeyihtaakuniyich.