2 Corinthians 8 - Chishemanituu Utayimuwin: Kaa Uskaach Testament

E siihchimaakanuut awen chechii weyuuch miiwet

¹ Niwiichewaakanitikw, chinituweyimitinaan chechii chischeyimekuch taan kaa ishi miyutuutamaakutwaau Chishemanituuh anichii umaamuuayimihaauch anite Macedonia kaa ishinihkaateyich aschiiyuu kaa ihtaatwaau.

² Naashch taapwe chii pechi aayimihuuch. Aat aniyuu e ishpish naashch chistimaatisiitwaau yaapach naashch taapwe mistahii chii pachishtinicheuch. Kaye maak naashch taapwe chii miyeyihtamuch e pachishtinichetwaau.

³ Chii pachishtinamuch taan kaa ishi nihiipayiyich chechii ishpish pachishtinahkwaau, nichii waapamaauch wesin, ayuwaak maak yaapach chii ishpish pachishtinicheuch, wiyawaau mitun e chii iteyihtamihiikutwaau chechii ishpish pachishtinichetwaau.

⁴ Naashch nichii siihchimikunaanich chechii pachishtinachahtwaau kaye wiyawaau chechii pachishtinichetwaau chechii wiichihaakanuyich aniyuuh kaa chistimaatisiyich kaa taapwehtamiitwaauh.

⁵ Paashich maak chii ihtuutamuch taan kaa iteyimachihtwaau che ihtitwaau. Niishtam Chishemanituuh chii pachishteyimitisuustaweuch ekw niyaan kaa pachishteyimitisuustaakuyaahch mwehch taan kaa ishi nitaweyimikutwaau Chishemanituu chechii ihtitwaau.

⁶ Kaa waapahtamuwachiht maak aniyuu e ishi miiwetwaau nichii itashumaanaan Titus chechii shiihchimitaakw chechii pachishtinichewekw wesh wiya niishtam chichii aayimuutamaakuwaau e pachishtinichaanuyich.

⁷ Misiwe chekwaan naashch taapwe chikaschihunaawaau. Suuhcheyihtaakun chitaapwehtamuwinawaau. Chikaschihunaawaau e aayimuutamekw taan e ishi taapwehtamekw. Mistahii chichischeyihtamuwaanaawaau Chishemanituu utiteyihtamuwin. Naashch taapwe suuhk chititeyihtenaawaau chechii wiichihekuch kutakach awenichii kaye maak naashch taapwe chisaachihiinaan. Chipaa wii miyu miiwenaawaau maak.

⁸ Namui chiwii wiishuwaatitinaawaau uu kaa itweyaan. Mikw chiwii nituu chischeyimitinaawaau taapwe siyaachihiiwekwe e waawiihtamaatakuch taan e ishi aasihcheyihtahkwaau e pachishtinichetwaau kutakach awenichii.

⁹ Chichischeyimaawaau taan kaa ishi miyutuutamaachet Chitipeyihchikeminuu Jesus Christ. Chii weyuutisiyuu yaapach maak chii ihtuutaasuu chechii chistimaatisiit chiyaanuu uhchi. Chii nakatam wiya misiwe uweyuutisiiwin.

¹⁰ Eukw maak e iteyimitakuch chipaa ihtinaawaau. Pepuhch chiyawaau niishtam naashch chichii iteyihtenaawaau chechii pachishtinicheyekw, chichii chihchipayihtaanaawaau maak e pachishtinicheyekw.

¹¹ Ekw maak, chiishihtaakw taan kaa ishi chihchipayihtaayekw. Taan kaa ishpish suuhk chii aascheyihtamekw uskach kaa wii chihchipayihtaayekw chechii pachishtinicheyekw peyakun yaapach chipaa ishi aascheyihtenaawaau anchiish e pachishtinicheyekw.

¹² Nuukuhche naashch e aasihcheyihtamekw chechii pachishtinicheyekw eukw uyuu che naheyihtamihiikut Chishemanituu. Taapaa aniyuu ekaa e ayaawat kata uhchi kanawaapahtam. Aniyuu taan e ishi ayaawat eukw aniyuu che kanawaapahtahk.

¹³ Namui chititashumitinaawaau chechii aayimihiisuyekw anit chechii uhchi wehchihuutwaau kutakach.

¹⁴ Chiweyuuch ayaanaawaau chekwaan chechii wiichihekuch anichii awenichii kaa nuuhtepayitwaau. Ekw maak chek ishinaakuhche chiyawaau e nuuhtepayekw kutakach maak e weyuuch ayaatwaau ekw maak wiyawaau kweschiipan chechii wiichihiitaakuch. Ekw maak che taapituupayihch misiwe awen taan e ishi ayaat.

¹⁵ Mwehch e itashtech Chishemanituu utayimuwinihch, “An awen mistahii kaa maauchihtaat namui wesaa mistahii uhchi ayaau, ekw an mikw apishiish kaa maauchihtaat namui uhchi nuuhtepayuu.”

Titus Corinthihch kaa itishahwaakanuut

¹⁶ Ninanaaskumaau Chishemanituu e chii miyaat Titus mwehch niya e ishi saachihiitakuch chechii ishi saachihiitaakw.

¹⁷ Namui mikw aniyuu e chii wii itishahuchiht anite e ihtaawekw wehchi ituhtet, naashch wesin chichii wii nituwaapamikuwaau.

¹⁸ Ihtaau utah kutak chiichishaanuu naashch e miyu chischeyimikut misiwe taanite e ati ihtaayitwaauh umaamuuayimihaauh taan e ishi miywaapatisit e waawiihtahk miywaachimuwiniyuu. Eukun uyuu che pechi wiicheukut Titus.

¹⁹ Eyuu maak umaamuuayimihaauh chii wiyeyimikuu chechii wiicheukuyaahch e ituhtatawachihtwaau anichii kaa chistimaatisiitwaau kaa taapwehtahkwaau aniyuu Chipachishtinichewinawaayuu. Utipeyihchikeu maak niwii chisteyihtamihaanaan uu kaa ihtuutamaahch. Ekut che nuukuhch e wii wiichihiiweyaahch.

²⁰ Namui kaye nitaweyihtenaan nitamukw chechii ishi ataameyimikuyaahch e pimipayihtaayaahch uu pachishtinichewin.

²¹ Chishemanituu nichischeyimikw muush kuiskw e ihtuuch. Nipukuseyihten maak muush kuiskw chechii ihtiyaan naapeu kaye e kanawaapamit.

²² Eukw maak wehchi itishahuchiht uu chiichishaanuu chechii wiichewaat aniyuu Titus. Mihchetwaau nichii waapahtiikunaan taapwe kaye wii e wii wiichihiiwet. Aniyuu maak taan e ishi taapweucheyimitaakw ekw etituu waa wiichihiitaakw.

²³ Uu maak Titus eukw uu waachaapatisiimit e wiichihiitakuch. Ekw anichii kutakach chiichishaanuuch umaamuuayimihaauh chii itishahukuuch. Chisteyihtaakuheuch maak Christ chekwaayuu e ihtuutahkwaau.

²⁴ Suuhk maak waapahtiyaahkuch uchii naapeuch e saachihekuch chechii waapahtahkwaau umaamuuayimihaauch chisaachihiiwewinawaayuu kaye chechii chischeyihtahkwaau chekwaan wehchi naashch maamihchihiyaahch.