2 Corinthians 6 - Chishemanituu Utayimuwin: Kaa Uskaach Testament

E ishi aayimuhut awen Christ e atushkuwaat

¹ An maak e maamuu atushkuwachiht Chishemanituu Chinitutamaatinaan ekaa chechii ishinaakusiyekw ekaa e aapateyihtamekw taan e ishi chishewaatutaataakw Chishemanituu.

² Wesh Chishemanituu utayimuwinihch itashteu e chii itwet, Anit kaa iteyihtamihiikuyaan chechii nituhtaataan chichii nituhtaatin e ayimihaayin. Anit kaa nituweyihtaman wiichihiikusiiwin ekut kaa pimaachihiitaan. eukw uyuu kaa itwet Chishemanituu ekw maak niya waahtamaataan, anuhchiish nihiipayuu chechii pimaachihuyin. Anuhchiish pimaachihiiweu Chishemanituu.

³ Namui nitaweyihtenaan nitamukw chechii ishi pachishtinikanuuhch taan e ishi atushkuwachiht Chishemanituu ekw maak suuhk kwechihtaayaahch ekaa chechii ishi pimaatisiyaahch chechii chipishkaakut awen chechii pimaachihut.

⁴ Mikw taan e ihtuwaahche suuhk niwii nisituunaakuhiisunaan taapwe e atushkuwachiht Chishemanituu. Suuhk nisiipiiwesiistenaan taan e ishi aayimihuyaahch. Ninanehkaateyimuhiikunaan. Ninanehkaachihiikunaan.

⁵ Nichii pishishtehukunaan. Nichii chipahukunaan chipahutuukamikuhch. Nichii kusiihkaakunaanich awenichii e mihchetitwaau. Nichii ayeskusiinaan e ishpish mistaapatisiyaahch. Niyaanikutehch namui nuuhchi nipaanaan. Kaye nichii siiweyinaan maanh.

⁶ Nichii nuukuhtaanaan taapwe e atushkuwachiht Chishemanituu e payehkaatisiyaahch, taan e ishi miyu nisituhtamaahch taapwewin, e siipiiwesiyaahch taan e ishi nachishkaamaahch, e miyutuutuwachihtwaau awenichii. Kaa payehchisiit Ahchaahkw kaye niwiichihiikunaan kaye maak ninuukuhtaanaan taapwe e saachihiichiht misiwe awen.

⁷ Taan e ishi kuiskw wiihtamaahch taapwewin kaye taan kaa ishi miikuyaahch Chishemanituu suuhcheyihtaakusuwiniyuu ekut miin wehchi chischeyihtaakusiyaahch taapwe e atushkuwachiht. E ishi kuiskw pimaatisiyaahch ekut mikw wehchi nakahamaasuyaahch taan waa ishi machi aayimuumikuyaahch kaye taan waa ishi maayeyimikuyaahch awen maak wiyesh e wii ihtuutaakuyaahch.

⁸ Ihtakun e ishi miyu aayimuumikuyaahch. Ihtakun e ishi aatuweyimikuyaahch. Kutakach nimiywaachimikunaanich. Kutakach nimaayeyimikunaanich. Kutakach unanatayuuch nititeyimikunaanich mikw maak muush taapwewin niwiihtenaan.

⁹ Aat maak e miyu chischeyihtaakusiyaahch yaapach mwehch ekaa nihaau chischeyihtaakusitwaau awenich nititeyimukunaan. Muush nipeshuwaapahtenaan nipuwin. Nipimaatisiinaan maak. Aat e ihtakuhch maanh e ishi waweshihiikuyaahch namui nuuhchi nipahiikunaan.

¹⁰ Ihtakun e ishi misimeyihtamaahch. Yaapach maak nimiywaatenaan. Namui niweyuutisiinaan. Yaapach maak nitihtutawaanaanich awenichii chechii ayaatwaau chihchiwe weyuutisiiwiniyuu. Aat ekaa chekwaan tipiyeusiyaahch, yaapach misiwe chekwaan e tipiyeusiyaahch nitishinaakusinaan.

¹¹ Chiyawaau niwiichewaakanaanich anite Corinth kaa ihtaayekw mitun nitehiinaahch kuuhchi ayimihiitinaan. Mitun tekash chiwiihtamaatinaan maanh taan waa ititaahch.

¹² Namui mitun ihtakun e ishi nakaawiyaahch chechii waapahtiitaahch kaye chechii wiihtamaataahch taan e ishpish saachihiitaahch. Chiyawaau maak wii, muyaam e ihtakuhch taan e ishi nakaawiyekw chititeyihtaakusinaawaau.

¹³ Mwehch nitawaashiimach ekun e ishi ayimihiitakuch. Ekun maak mwehch ishi chishewaatutuunaan kaye chiyawaau.

Yaakwaamiistuwaahkuch anichii ekaa kaa taapwehtahkwaau miywaachimuwiniyuu

¹⁴ Ekaawii chika uhchi asitihpisunaawaau anichii ekaa kaa taapwehtahkwaau e ihtaatwaau. Chika chii aa miyu wiicheweu awen e kuiskutaatisiit naashch e maayaach pimaatisiyich aweyuu. Chika chii aa miyu wiicheutuuch awenichii niishuyich e ishi pimuhtetwaau, peyakw waashtewinihch e ishi pimuhtet ekw an kutak anite e ukaashteyaayich e ishi pimuhtet.

¹⁵ Ihtakuniyuu aa chekwaayuu peyakunich e ishi kanawaapahtahkwaau Christ ekw maak Machimanituu. Namui kiipaa. Taanit peyakunihch e iteyihtaakusitwaau kaa taapwehtahk ekw maak an ekaa kaa taapwehtahk.

¹⁶ Namui chika chii tayaakanuuch manituuhkaanich anite Chishemanituu utayimiheukamikuwiihch. Chiyaanuu wesh Chishemanituu kaa pimaatisiit utayimiheukamikw. Mwehch Chishemanituu kaa itwet, Nika piihchishkuwaauch kaye muush nika wiichewaauch. Niya nika Uchishemanituumitutaakuch. Wiyawaau nika utiiniimitutuwaauch.

¹⁷ Ekw maak e itwet Utipeyihchikeu, Nakataahkuch anichii ekaa kaa taapwehtahkwaau. Pahkaanihiisukw. An chekwaan e iteyihtaakuhch e wanaahiikut awen e ayimihaat kaye e nuuchiishtuwaat Chishemanituu ekaawii piskaatamukw. Nika miyeyihten maak pechi naasiyekwe, itweu Utipeyihchikeu.

¹⁸ Chika uhtaawiimaaututaatinaawaau. Nikusach ekw maak nitaanisach chika ishi kanawaapamitinaawaau, itweu Utipeyihchikeu an maauch siyuuhkaatisiit.