2 Corinthians 4 - Chishemanituu Utayimuwin: Kaa Uskaach Testament

Chishemanituu uchisteyihtaakusuwin sischuu atuchipaanihch e ihtakuniyich

¹ Naashch taapwe nichii shaweyimikunaan Chishemanituu uyuu aapatisuwiniyuu e chii miiyimiht. Eukw maak wehchi ekaa wii puuniyaahch.

² E waawiihtamaahch uu miywaachimuwin namui chekwaan nichiimuuch ihtinaan. Muush kuiskw kaye muushe niwiihtenaan chekwaan. Namui niwii wiyeshimaanaan awen chechii uhchi taapwehtahk. Namui kaye nichiikuunenaan kutach chekwaan e waawiihtamaahch Chishemanituu utayimuwin. Kuiskw niwiihtamuwaanaan misiwe awen taapwewiniyuu ekw maak che chischeyihtahkwaau taapwe chechii taapwehtahkwaau taan e ishi waawiihtamuchiht. Nichischeyimikunaan maak Chishemanituu e taapwewachiht.

³ Ihtaauch awenichii e iteyihtahkwaau ekaa misiwe chekwaayuu wiihtamuchiht e waawiihtamuchiht uyuu miywaachimuwiniyuu ekw maak namui chii nisituhtamuch. Wanishinuuch anichii awenichii ekun maak wehchi ekaa chii nisitutahkwaau.

⁴ Namui taapwehtamuch wesh ihtaayuuh aniyuuh kaa machimanituyich kaa uchimaahkahtamiyich uyuu aschiiyuu. Eukunh maak aniyuuh e ihtuutaakutwaau ekaa chechii waapahtahkwaau aniyuu waashtewiniyuu anit chechii uhchi pimaachihutwaau. Namui chii nisituhtamuch aniyuu miywaachimuwiniyuu ati wehchi waapahtiikuyihkw Jesus Christ uchisteyihtaakusuwin. Wesh mwehch e ishi chisteyihtaakusit Chishemanituu ekun mwehch e ishi chisteyihtaakusit Jesus.

⁵ Iskutak e kacheskweyaahch namui niyaan nitaayimuumisunaan. Jesus Christ nitaayimuumaanaan wiya e Utipeyihchikeut. Jesus nichii pechi itishahukunaan chechii atushkaataahch.

⁶ Itashteu Chishemanituu utayimuwinihch e chii itwet Chishemanituu, “Chika waashteu anite uhchi wanitipiskusiiwinihch.” Eukw uu yaapach Chishemanituu kaa ihtuutahk chechii waashteyich chitehiinaahch. Ekut maak wehchi kaschihupayihch chechii wiichihiihkwaau kutakach awenichii chechii waapahtahkwaau uyuu waashtewiniyuu. Uu maak waashtewin eukw aniyuu Chishemanituu uchisteyihtaakusuwin. Jesus Christ maak e ihtaat ekut wehchi nuukuniyich aniyuu uchisteyihtaakusuwin.

⁷ Mwehch sischuu atuchipaanh Chishemanituu chechii aapachihtaat ekun e ishinaakusiyaahch. Ekute anite e ihtakuniyich uchisteyihtaakusuwin chechii chischeyihtaakanuuhch wiya e ihtaat e uhchiimakahch uu maauch kaa suuhcheyihtaakuhch suuhkaatisiiwin kaa ayaayaahch, namui wii niyaan e ihtaayaahch uhchiimakan.

⁸ Mihchetwaau nanaahkuu nit ishi mista aayimihunaan. Mikw maak namui tekash nimikushkaatiskaakunaan taan e ishi nachishkamaahch. Niyaanikutehch niwawaaneyihtenaan mikw maak namui wii nihtaa tekash chechii wawaaneyihtamaahch.

⁹ Ninanehkaachihiikunaan, mikw maak muush niwiicheukunaan Chishemanituu. Niyaanikutehch niniihchiwepahukunaan, mikw maak namui niwanaachihiikunaan.

¹⁰ Muush kaye ninachishkenaan e wii nipihiikuyaahch mwehch Jesus muush kaa ishi nachishkahk. Ekut maak wehchi waapahtahkwaau awenichii utah niyuunaahch aniyuu pimaatisiiwiniyuu Jesus kaa wiihkuchihtamuuyamiht kaa wanishkaat nipuwinihch uhchi.

¹¹ Nipimaatisiinaan kiipaa anuhchiish mikw maak muush kushpanaateyihtaakun chechii wanihtaayaahch nipimaatisiiwinaanh e taapweyimachiht Jesus. Ekw maak chechii nisituunaakuniyich Jesus upimaatisiiwin utah uyuuh niyuunaahch che nipiimakaniyikwaauh.

¹² Ekw maak e ishinaakuhch e wiichihiikuyekw Chipimaatisiiwiniwaahch an e nanehkaateyimuhiikuyaahch.

¹³ Itashteu anite Chishemanituu utayimuwinihch, “Nichii taapwehten ekw maak kaa ayimiyaan.” Kaye niyaan maak ekun e ishi taapwehtamaahch ekw maak e ayimiyaahch.

¹⁴ Nichischeyihtenaan Chishemanituu e chii wanishkaanaat Jesus nipuwinihch uhchi, nichischeyihtenaan kaye chiyaanuu che wanishkaanitahk nipuwinihch uhchi wii Chishemanituu e ihtaat chechii ihtaauhkw.

¹⁵ Chiyawaau maak eukuu wehchi ihtuutamaahch uu. Wesh wetaach e chischeyihtamihaakanuutwaau awenichii Chishemanituuh uchishewaatisiiwiniyuu ekw wetaach che ihtakuniyich e nanaaskumaakanuut Chishemanituu kaye e chishtaachimaakanuut.

Taapwehtamuwinihch e ishi pimaatisiinaanuuhch

¹⁶ Ekun maak wehchi ekaa nihtaa wii puuniyaahch. Aat uschich utah chiiyuunaahch wetaach e ati wanaatisiihkw, eshikum chiishikaau maskuuhaakanuuch chitahchaahkunuuch.

¹⁷ Namui naashch chekwaan iteyihtaakun taan e ishi nachishkamuhkw kaye maak an taan e ishi nachishkamuhkw namui chineush chika uhchi pimipayuu. Wesh Chiwiichihiikunaanuu chechii ayaayihkw kaachiche chisteyihtaakusuwin. Etituu maak mistahii iteyihtaakun uu ishpishaat taan e ishi nachishkamuhkw.

¹⁸ Wesh taapaa aniyuuh muhch kaa nuukuhkwaau chekwaayuuh chikanawaapahtenaanuu. Aniyuu ekaa kaa nuukuhkwaau eukun aniyuuh kenawaapahtamuhkw. An muhch kaa nuukuhch weipishchiish mikw ihtakun. Ekw an ekaa kaa nuukuhch eukw kaachiche e ihtakuhch.