2 Corinthians 3 - Chishemanituu Utayimuwin: Kaa Uskaach Testament

Kaa uskaach niskumuwin e ishi pimaatisiistaakanuuhch

¹ Maaskuuch chika iteyiminaawaau, ekw miin waa miyu aayimuumisut. Ninitaweyihtenaan aa masinahiikanh chechii ihtakuhkwaauh e miyu aayimuumikuyaahch yaakw chechii nituhtuuyaahch. Ekun e ihtitwaau pasch awenichii. Niyaan maak wii namui nika uhchi ihtuutenaan uu.

² Muyaam tipaachimusinahiikan e miyu aayimuumikuyaahch ekun e ishinaakusiyekw. Eukw uu e ishi chischeyihtamaahch nitehiinaahch. Misiwe awen chichischeyimikuwaau taan e ishi pimaatisiyekw. Misiwe awen chika chii ayimihtaau aniyuu e ishinaakuniyich tipaachimusinahiikaniyuu kaye chika chii miyu nisituhtam.

³ Taan e ishi pimaatisiyekw ekut wehchi nisituunaakuhch taan kaa ishi ihtuutamaataakw Christ. Ekun maak mwehch taapwe tipaachimusinahiikan wehchi ishinaakusiyekw. Uu maak tipaachimusinahiikan namui wii masinahiikanaahtikw aapatisuu e masinahiikanuuhch. Namui kaye asiniihch uhchi masinahiikanuu. Chishemanituu uu Payehchi Ahchaahkwa eukw e ishinaakusit mwehch e masinahiichet chitehiiwaahch. Eukw uu kaa aapachihiyimiht chechii petwaataahch uu tipaachimuwin.

⁴ Uu nit ishi ayiminaan wesh tekash nitaapwehtenaan taan kaa ishi ihtuutamaakuyaahch Christ ati wehchii ihtiyaahch chechii atushkuwachiht Chishemanituu.

⁵ Namui wii niyaan e ihtaayaahch chika chii uhchipayuu chechii itweyaahch niyaan tipiiwe chechii ihtuutamaahch uu. Chishemanituu eukw maayikuyaahch chechii ihtuutamaahch misiwe uu taan e ihtuutamaahch.

⁶ Wiya nimiikunaan kaschihuwiniyuu chechii atushkuwachiht uyuu e uskaayich niskumuwiniyuu e aapachihtaawachiht. Uu maak niskumuwin namayeu an wiishuwewin kaa masinahiikanuuhch che nanihiihtaakanuuhch, Kaa payehchisiit Ahchaahkw eukw chipaa nanihiihtawaakanuu. Wesh awen ekaa kaa nanihiihtahk taan e itashteyich aniyuu wiishuwewiniyuu nipuwiniyuu kata utihtahukuu. Kaa payehchisiit Ahchaahkw maak pimaatisiiwiniyuu miiweu wiya.

⁷ An weskach wiishuwewin asiniihch chii masinahiikanuu. Namui uhchi wiichihiikuuch awenichii chechii pimaachihutwaau. Yaapach maak naashch taapwe chii nuukuniyuu Chishemanituu uchisteyihtaakusuwin iskutak Moses kaa miyaat aniyuuh iinuuh aniyuu wiishuwewiniyuu. Naashch taapwe chii suuhcheyihtaakuniyuu taan kaa ishi chihkaashteyich Chishemanituu uchisteyihtaakusuwin Moses utaashtamuhkuhch. Namui etituu uhchi wii kanawaapahtamuweuch anichii iinuuch Moses utaashtamuhkuyuu. Namui maak chineush uhchi chihkaashteu an chisteyihtaakusuwin anit Moses utaashtamuhkuhch. Chii ati paasikunaakun. Yaapach maak chii nuukuniyuu Chishemanituu uchisteyihtaakusuwin an wiishuwewin kaa miiwaanuuhch aat ekaa uhchii pimaachihiiwemakahch.

⁸ Namui aa uste chisteyihtaakun an ayimiheu atushchewin Kaa payehchisiit Ahchaahkw e ihtaat kaa uhchipayihch.

⁹ Chii ihtakuniyuu taan kaa ishi nishuuwanaachimikutwaau awenichii wiishuwewiniyuu. Chiishpin maak yaapach nuwach kaa nuukuniyikwe Chishemanituu uchisteyihtaakusuwin kaa miiwaanuuhch an wiishuwewin taan etituu che ishpish nuukuniyich Chishemanituu uchisteyihtaakusuwin an niskumuwin anit wehchi kuiskunaakuhaakanuutwaau awenichii Chishemanituu ishi e ihtaayich.

¹⁰ Iskutak kaa miiwaanuuhch an wiishuwewin Chishemanituu uchisteyihtaakusuwin chii nuukuniyuu mikw maak muyaam tekash e ati paasikunaakuniyich chii ishinaakuniyuu wesh an ahchaahkw niskumuwin etituu chisteyihtaakun.

¹¹ Kaa chisteyihtaakuniyikwe maak an mikw weipishchiish kaa ihtakuhch chisteyihtaakusuwin taan etituu e ishpish chisteyihtaakuhch an kaachiche che ihtakuhch chisteyihtaakusuwin.

¹² Naashch taapwe nicheshtinaateyihtamihiikunaan uu. Ekun maak wehchi miyupayihch mikw chechii ishi wiihtamaataahch.

¹³ Namui nitishinaakusinaan Moses taan kaa ishinaakusit. Chii aakuuhkwehuu ekaa chechii waapahtamiyich Israel iinuuh wetaach ekaa ati waashtuweyich utaashtamuhkw.

¹⁴ Namui uhchi wii nisituhtahtamuch anichii iinuuch. Eshkw maak anuhchiish uyuu e chiishikaayich eshkw ekun e itiskahkwaau aniyuu aakuuhkwehuniyuu ishinaakusuuch e ayimihtuwaakanuutwaau aniyuu weskach niskumuwiniyuu. Namui chii nisituhtamuweuch Chishemanituu utayimuwiniyuu. Paatish awen e pimaachihiikut Christ ekut e iichenikanuyich aniyuu aakuuhkwehuniyuu.

¹⁵ Eshkw anuhchiish uyuu e chiishikaayich ekun e itiskahkwaau aniyuu aakuuhkwehuniyuu umituneyihchikaniwaahch ishinaakusuuch iskutak e ayimihtaatwaau Moses uwiishuwewiniyuu.

¹⁶ Chiishpin maak awen niyaataasimututaawaach Utipeyihchikeuh ekw e iichenikanuyich aniyuu aakuuhkwehuniyuu.

¹⁷ Utipeyihchikeu maak eukuu Kaa payehchisiit Ahchaahkw, taanite maak e ihtaakwe uu Ahchaahkw ihtakun anit aapihkunuwewin.

¹⁸ Chiyaanuu maak wii namui nituweyihtaakun chechii aakuuhwehusuyihkw chechii waapahtamuhkw Utipeyihchikeu uchisteyihtaakusuwin. E kanawaapahtamuhkw Utipeyihchikeu uchisteyihtaakusuwin wetaach chikweschinaakuhiikunaanuu wiya chechii nispituuhkw. Wetaach chitihtuutaakunaanuu kaye chiyaanuu etituu chechii chisteyihtaakusiihkw. Wiya maak Utipeyihchikeu uyuu chitishihiikunuu Utahchaahkwa uhchi.