2 Corinthians 13 - Chishemanituu Utayimuwin: Kaa Uskaach Testament

Taan kaa ishi yaakwaamuwet Paul kaye kaa ishi waachiyemaat aniyuuh kaa masinahamuwaat

¹ Eukuu nishtwaau che chiiutamitakuch. Che wii chischisiyekw michihpin e ihtaakwe awen e ihtakuniyich taan waa ishi mamishimaat aweyuuh chekwaayuu yaaitei niishu maak nishtu awenichii e chii ihtaatwaau anit aniyuu wehchipayiyich e mamishimuwaanuyich chika ihtaauch chechii tipaachimutwaau.

² Maahchishtai kaa takushinuuch shaash nichii yaakwaamimaauch anichii kaa machituutahkwaau. Miin maak anuhchiish nitayaakwaamimaauch. Kaye anichii kutakach nitayaakwaamimaauch. Uu anuhchiish che takushiniyaan chihchiwe nititwen namui nika uhchi manaachimaauch uchii kaa machituutahkwaau.

³ Chititwenaawaau e wii waapahtamekw taapwe Christ e ayimishtamuuk. Namui ekaa saapisiyuu Christ iskutak pemiihkahk chipimaatisiiwinawaauh. Chiwaapahtamuwaanaawaau usuuhkaatisiiwin mekwaach chekwaayuu e ihtuutahk anit e ihtaawekw.

⁴ Aat ekaa uhchi saapisiit kaa chiistaaskuhwaakanuut aashiteyaahtikuhch Chishemanituuh usuuhkaatisiiwiihch uhchi pimaatisiyuu anuhchiish. Ekun maak e ishinaakusiyaahch kaye niyaan e wiichewachiht Christ, namui nisaapisiinaan. Mikw maak Christ nika pimaatisiistuwaanaan Chishemanituu usuuhkaatisiiwinihch uhchi chiyawaau chechii atushkaataach.

⁵ Yaakwaau nituu chischeyimisukw. Nituu chischeyimisukw eshkw taapwe tiyaapwehtamuwekwe. Chinisituhtenaawaau aa Jesus Christ e piihchishkaataakw. Ekaa tiyaapwehtamuwekwe namui kiipaa taapwe chipiihchishkaakuwaau.

⁶ Nicheshtinaahun iskutak pehtamekwe e nituu chischeyimisuyaahch che chischeyihtamekw taapwe e taapwehtamaahch.

⁷ Ninitutamuwaanaan Chishemanituu kuiskw chechii ishi pimaatisiyekw. Namayeu wii petinaasch mikw chechii nuukuhtaayaahch taapwe kuiskw e ihtiyaahch. Chinituweyimitinaan kuiskw chechii ishi pimaatisiyekw aat e iteyimikuwaahche e chii wanipayaahch.

⁸ Namui chika chii ihtuutenaanuu chechii nishkuushtamuhkw taapwewin, mikw chika nanihiihtenaanuu.

⁹ Nimiyeyihtenaan anit mekwaach ekaa siyaapisiyaahch niyaan ekut chiyawaau siyuuhchikaapuyekw Utipeyihchikeu e ihtaat. Nitutamuwaanaan Chishemanituu chechii nihtaauchiyekw wiya ishi e ihtaat.

¹⁰ Uu chititasinahamaatinaawaau eshkw mekwaach ute e ihtaayaan ekw maak iskutak miin waapamitakuche namui chika uhchi ihtakun chekwaan che uhchi mista aanuweyimitakuch chechii nuukuhtaayaan taan kaa ishi miikuyaan tipeyihchichewin. Utipeyihchikeu nichii miikw uyuu tipeyihchichewiniyuu chechii wiichihiitakuch namui wii chechii niihtahuutakuch.

Maahchishtai kaa ishi masinahiichet Paul

¹¹ Ekw maak niichishaanitikw, waachiye chititinaawaau. Suuhk kuchihtaakw nihaau chechii iteyihtaakusiyekw e ishi nituweyimitaakw Chishemanituu chechii iteyihtaakusuwekw. Yaakwaau nituhtamukw taan e ishi siihchimitakuch. Suuhk peyakunihch wii ishi pimaatisiikw. Suuhk miyu wiicheutukw. Chishemanituu an kaa saachihiiwet kaye kaa ayaat chiyaameyihtamuwiniyuu chika wiicheukuwaau.

¹² Chiyawaau kaa wiichishaanihtuyekw uchemitukw e waachiyemituyekw.

¹³ Misiwe uchii kaa taapwehtahkwaau ute kaa ihtaatwaau chiwaachiyemikuwaauch.

¹⁴ Utipeyihchikeu Jesus Christ naashch kaa chishewaatisiit, Chishemanituu kaa saachihiitaakw ekw maak kaa payehchisiit ahchaahkw kaa papaawiicheutaakw misiwe chika wiicheukuwaauch.