2 Corinthians 12 - Chishemanituu Utayimuwin: Kaa Uskaach Testament

Taan kaa ishi waapahtiyaakanuut Paul

¹ Aat ekaa mitun wiyesh itaapatahch nika aayimuumisun. Niishtam taan kaa ishi waapahtiit kaye taan kaa ishi chischeyihtamihiit Utipeyihchikeu nika aayimuutamuwaan.

² Nichischeyimaau peyakw naapeu kaa taapweyimaat Jesus neushaap pipunh utaahch mitun e chii uhpiskaahaakanuut kihchikiishikuhch ishi. Namui nichischeyihten mikw utahchaahkwa kaa uhpiskaayikwen maak chichi miiyuu kaa ishi uhpiskaakwe, Chishemanituu mikw chischeyihtam.

³ Nichischeyihten anite Paradise kaa ishinihkaateyich e chii ishi uhpiskaat. Mwehch maak kaa itweyaan mikw Chishemanituu chischeyihtam chichi miiyuu kaa ishi uhpiskaakwe maak mikw utahchaahkwa kaa uhpiskaayikwen.

⁴ Ekute kaa pehtahk itwewinh ekaa kaschihuupayihch muhch chechii wiihtaakanuuhkwaau kaye ekaa pachishtinikanuuhch chechii wiihtaakanuuhkwaau.

⁵ Nipaa chii nanaapewaachimaau uu naapeu. Niya maak wii namui nika uhchi nanaapeumun. Mikw taan e ishpish naniyamisiyaan ekun an che aayimuutamaan.

⁶ Aat nanaapeumuyaan namui nipaa uhchi chiishkwe ayimin wesh nipaa taapwen. Anuhchiish maak nika nakaawiin chechii nanaapeumuyaan. Namui nitaweyihten uste chechii iteyimit awen e ishpish nisituunahk nipimaatisiiwinihch maak e ishi pehtuut e ishi ayimuuch.

Kaa ihtakanuyich chekwaayuu Paul wiiyuuhch e ustauskaakut

⁷ Naashch taapwe chii miskaateyihtaakuniyuu taan kaa ishi waapahtiit Utipeyihchikeu. Ekaa maak chechii chihkaateyimuyaan taan kaa ishi maamishkaach waapahtiit Utipeyihchikeu nichii pechi miikw chekwaayuu e ustauskaakuuch niyuuch mwehch kaa kaawaach niipisiyaahtikw e ishi kaauskaakut awen wiiyuuhch. Machimanituu chii pachishtinaakanuu chechii pechi mukushkaatiskuut ekaa mistahii chechii iteyimisuyaan.

⁸ Nishtwaau maak nichii nitutamuwaau Utipeyihchikeu chechii iichenahk uyuu chekwaayuu.

⁹ Ekw kaa pechi iishit, “Nichishewaatisiiwin mikw chinataweyihten wesh anit mekwaach ekaa siyaapisiyin ekut maauch e suuhcheyihtaakuhch nisuuhkaatisiiwin.” Eukw uyuu kaa iishit. Ekw maak muush pechi miite Christ uyuu suuhkaatisiiwiniyuu, kiipaa che miyeyihtamaan e wiihtamaan taan e ishpish ekaa saapisiyaan.

¹⁰ Ekun kaye wehchi yaapach sichiyesiyaan taan e ishpish ekaa saapisiyaan utah niyuuch e nuushuushkuukw Christ, kaye taan e ishi maayeyimikuyaan, taan e ishpish aayimuhuyaan maanh, taan e ishpish nanehkaachihiikuyaan, kaye taan e ishi nanehkaateyimuyaan. Yaapach nisichiyesin uu e ishi aayimuhuyaan wesh ekut wehchi chischeyihtamuch Christ usuuhkaatisiiwin. Anit ekaa saapisiyaan ekut e suuhcheyihtaakusiyaan.

Taan kaa ishi saachihaat Paul aniyuuh iinuuh Corinth kaa ihtaayitwaauh

¹¹ Namui nimiyeyihten e nanaapeumuyaan e itihtaakusiyaan wesh mwehch e chiishkwe ayimiyaan ekun e iteyihtamaan. Chiyawaau kaa ihtuutuuyekw uu wehchi ishi ayimiyaan. Chiyawaau wesh chipaa miyu aayimuuminaawaau. Wesh taapaa nuuhtaash nititeyihtaakusin taan e iteyihtaakusitwaau anichii apastalach kaa ishinihkaatekuch aat maak ekaa mitun chekwaan ishinaakusiyaan.

¹² Chichii waapahtenaawaau taan e iteyihtaakusit chihchiwe apastal kaa waapamiyekw maamishkaach waapahtiiwewinh e waapahtiiweyaan kaye e ihtuutamaan e maamishkaateyihtaakuhkwaauh chekwaayuuh kaye maak e chii siipiiwesiyaan anite e ihtaayekw kaa ihtaayaan.

¹³ Taan kaa ishi ekaa muyaam ihtuutaatakuch chiyawaau taan e ihtuutuukwaau kutakach umaamuuayimihaauch. An aa ekaa uhchi aayimuutamaatakuch chechii wiichihiyekw. Wepeyihtamuukw kaa wanituutaatakuche ekaa uhchi nitutamaatakuch chechii wiichihiyekw.

¹⁴ Nitayeskuwiin miin chechii chiiutamitakuch. Eukw uu nishtwaau che chiiutamitakuch. Namui maak wii shuuliyaau chiwii aayimuutamaatinaawaau. Chiyawaau eukw uste e iteyimitakuch. Taapaa wiyawaau awaashach chipaa uhchi uhchishtamuweuch chekwaayuu uniichihiikuwaauh. Uniichihiikumaauch chipaa uhchishtamuweuch utawaashiimuwaau chekwaayuu.

¹⁵ Kwaast maak e ihtiyaan chiwii wiichihiitinaawaau. Kaye maak tekash nika pachishteyimisun chechii wiichihiitakuch. Namui aa chika uhchi ishpish saachihiinaawaau etituu saachihiitakuche.

¹⁶ Ekun maak e ishinaakuhch. Taapaa kuuhchi nitutamaatinaawaau shuuliyaau chechii wiichihiyekw taan e ishi nituweyihtamaan chekwaan. Pasch maak awenichii itweuch ekaa kuiskw uhchi ayimihiitakuch. Itweuch e chii wiyeshimitakuch.

¹⁷ Shuuliyaau aa maak nichii uhtinen anite e ihtaayekw niwiichewaakanich kaa itishahamaatakuch. Namui mitun.

¹⁸ Titus nichii siihchimaau chechii nituu chiiutamitaakw. Miin kutak chiichishaanuuh nichii itishahwaayuuh chechii wiicheukut. Shuuliyaayuu aa maak chii utisiyuu Titus chiyawaau e ihtaawekw uhchi aniyuu kaa chiiutamitaakw. Peyakw meskanuu nipimuhtenaan kaye peyakunihch nit ishi maamituneyihtenaan. Namui aa ekun e iteyimiyaahch.

¹⁹ Kaye maak e iteyimuwaahche uu kaa masinahiicheyaahch mwehch kaa wii naatamaasutwaau awenichii. Namui. Mikw e ishi nituweyimiyimiht Christ chechii ishi ayimuwachiht Chishemanituu ishi e ihtaayich ekun e ishi ayimiyaahch. Taan mikw e ihtiwaahche mikw wesin chiwii wiichihiitinaan.

²⁰ Nikuspaneyihten utihtitakuche aahchiiuh che iteyihtaakusiyekw taan kaa ishi pukuseyimuyaan che iteyihtaakusiyekw. Maaskuuch kaye chiyawaau aahchiiuh chika iteyiminaawaau taan kaa ishi pukuseyimuyekw che iteyihtaakusiyaan. Nikuspaneyihten mihchetu anit e tashiyekw chechii aasitemituyekw chechii uhteyimituyekw chishuwaasuwin chechii ihtakuhch maak machipayihkahtaatuwin. Nikuspaneyihten mihchetu anit e tashiyekw chechii papukunuumuweyekw chechii maamaayeyimekuch kutakach awenichii maak chihchiwe chechii iteyimisuyekw kaye chechii mamukushkaachihekuch kutakach awenichii.

²¹ Nikuspaneyihten miin chiiutamitakuche Chishemanituu che ihtuutahk chechii pimaameyimitakuch waapamitakuche. Naashch taapwe nika misimeyihtamihiikuch anichii kaa machituutahkwaau anite utaahch ekaa maak uhchi mihchiiweyihtahkwaau kaye ekaa uhchi nakatahkwaau taan kaa ishi machituutahkwaau, anichii ekaa uhchishkuu Chishemanituu e ihtaayich kaa mihchiiweyihtahkwaau taan kaa ishpish ekaa uhchi payehchi pimaatisiitwaau kaye taan kaa ishpish chii wiinisuupimaatisiitwaau kaye kaa ishpish chii ihtuutahkwaau wiinisuwiniyuu.