2 Corinthians 11 - Chishemanituu Utayimuwin: Kaa Uskaach Testament

Taan kaa ishi aayimuumaat Paul aniyuuh ekaa chihchiwe kaa apastaluwiyich

¹ Chipukuseyimitinaawaau chechii siipiiwesiistuyekw apishiish e chiishkwe ayimiyaan. Naashch chipukuseyimitinaawaau chechii siipiiwesiistuuyekw.

² Ihtakun e ishi uhteyihtamaan chiyawaau uhchi mwehch Chishemanituu e ishi uteyihtahk utiiniim uhchi. Wesh uschiskwewaan ekaa eshkw uhchi chischeyimaat naapeu chitishinaakusinaawaau, chichii pachishteyimitinaawaau maak mikw peyakw naapeu chechii ayaautaakw eukuu Christ.

³ Nikushpanaateyihten chechii pisiiwiikuyekw, muyaam taan kaa ishi pisiiwiikut Eve chinepukw e chii nanataimikut, nikushpanaateyihten chek ekaa chechii iteyimekw Christ taan e iteyimekw anuhchiish, tekash chit ishi nuushuushkuwaawaau kaye mikw wiya chinanaakataweyimaawaau.

⁴ Iskanaasch wehchipayuuwaah mikw chechii ishi taapwehtamekw taan e ishi waawiihtamaataakuch uchii nitamukw kaa ishi chiskutamaachetwaau chiskutamaachesuuch, e iteyimitakuch. Naashch chinituhtawaawaau awen aahchiiuh e ishi aayimuumaat Jesus taan kaa ishi aayimuutamaataahch niyaan. Anuhchiish, mikw chit ishi taapweucheyimaawaau aahchiiuh e iteyihtaakusit ahchaahkw taan kaa iteyihtaakusit an Kaa payehchisiit Ahchaahkw niishtam kaa ayaawekw. Kaye aahchiiuh e itihtaakuhch miywaachimuwin an kaa ishi wiihtamaataahch mikw chit ishi taapwehtenaawaau.

⁵ Namui mitun nuuhtaash nititeyihtaakusin nititeyihten taan e iteyihtaakusitwaau anichii kaa chisteyimekuch apastalach kaa ishinihkaatekuch.

⁶ Maaskuuch namayeu niya an awen naashch kaa kaschihuuhtaakusit e ayimit, mikw maak nitayaan chischeyihtamuwin. Tahtwaau maak kaa ayimihiitaahch nanaahkuu chekwaan e wiihtamaataahch chichii ishi ayimihiitinaan chechii piyekasch nisituhtamekw.

⁷ Iskutak kaa waawiihtamaatakuch Chishemanituu umiywaachimuwin namui chihchiwe nuuhchi iteyimisun. Chichii wii chischeyihtamihiitinaawaau e maamituneyimitaakw Chishemanituu kaye maak namui kuuhchi nitaweyimitinaawaau chechii chiishiihkuuyekw. Nichii wanipayin kaakaye uu kaa ihtiyaan.

⁸ Chii aihtisiyuuch kaye anichii chiichishaanuuch kaa wiichihiitwaau shuuliyaayuu iskutak kaa waawiihtamaatakuch miywaachimuwin. Mwehch e kachemutamuukwaau uchii chiichishaanuuch nichii ishinaakusin e chii utinamuch taan kaa wii ishi pechi wiichihiitwaau chiyawaau chechii wiichihiitakuch.

⁹ Aat maak niyaanikutehch e chii nuuhtepayaan chekwaan mekwaach anit e ihtaayekw kaa ihtaayaan, namui yaapach kuuhchi nitaweyihtamaatinaawaau chekwaan. Chiichishaanuuch Macedonia kaa ishinihkaateyich aschiiyuu kaa ihtaatwaau nichii wiichihiikunaanich e chii miikuyaahch taan kaa ishi nuuhtepayuuchiht. Namui kuuhchi wii aayimeyihtamihiitinaan chechii nitaweyihtamaataahch chekwaan. Eshkw maak anuhchiish namui yaapach chinitaweyihtamaatinaan chekwaan.

¹⁰ E chischeyimit Christ e taapweuch taan e itweuch, namui nika uhchi paachishtinaauch kutakach chechii chipahchihiitwaau e aayimuutamuch uyuu misiwe anite aniyuu aschiiyuu Achaia kaa ishinihkaatech.

¹¹ Chititeyihtenaawaau aa ekaa saachihiitakuch wehchi itweyaan uu. Chishemanituu chischeyihtam taapwe e saachihiitakuch.

¹² Yaapach muush nika ihtuuten taan e ihtiyaan anuhchiish ekaa chechii ihtakuniyich taan che ishi nanaapeumutwaau anichii nitamukw kaa ishi chiskutamaachetwaau kaye ekaa chechii itwetwaau mwehch niyaan e itaapatisuuchiht e itaapatisitwaau.

¹³ Namayeuch uchii chihchiwe apastalach. Mwehch taapwe apastalach e atuskuwaatwaau Jesus Christ wii iteyihtaakuhiisuuch uchii mikw maak nanatayuuch kaye wiyeshihiiweuch.

¹⁴ Namui maak chipaa uhchi miskaateyihtamihiikunaanuu uu wesh waawaach machimanituu mwehch waashtuweu enchil chika chii ishinaakuhiisuu.

¹⁵ Namui maak miskaateyihtaakuniyuu utaapachihaakanh mwehch taapwe kuiskw kaa ihtiyich aapachihaakanh chechii ishinaakuhiisuyich. Mikw maak iskutak wiyaaskunaakanuutwaawenich nihaau e iteyihtaakuniyich chechii ishi miskahkwaau ekun che ishi miyaakanuutwaau.

Kaa aayimuutahk Paul taan kaa ishi aayimuhut apastal e itaapachihiikut Christ

¹⁶ Miin nika itwen, ekaawii iteyimikw e chiishkwe ayimiyaan. Chiishpin maak chiishkwe ayimuu e iteyimuwekwe pachishtinikw apishiish chechii aayimuumisuyaan.

¹⁷ Uu maak che ishi ayimiyaan niya uu e iteyihtamaan, namui Utipeyihchikeu nuuhchi itashumikw chechii itweyaan. Mwehch e chiishkwe ayimiyaan itihtaakun.

¹⁸ Mwehch e nispitaukwaau awenichii utah aschiihch kaa nanaapeumutwaau nika ihtin, naashch kaa nanaapeumutwaau taan e ihtitwaau.

¹⁹ Namui maak chipaa uhchi kuskuikunaawaau uu. Naashch taapwe chikachehtaaweyimisunaawaau. Maan mikw kaa ishi piihtakahekuch anichii kaa chiishkwe ayimitwaau.

²⁰ Chipachishtinaawaauch uchii nitamukw kaa ishi chiskutamaachetwaau chechii uchimaahkahtaataakuch kaye chechii manishuuliyaawaatutaakuch. Chipachishtinaawaauch chechii kachemutamaataakuch kaye chechii maayeyimitaakuch kaye chechii utaamuhkwehutaakuch.

²¹ Taapwe kiipaa nichii wanipayinaan. Nishaakweyimun chechii itweyaan ekaa uhchii ihtiyaahch uu niyaan. Ekaa nekaawiikwe awen chechii nanaapeumut taan e ihtit nipaa chii nanaapeumun kaye niya. Miin maak nichiiskwe ayimin uu kaa itweyaan.

²² Chihchiwe aa iteyimisuuch Jewa kaa itiskaanesitwaau. Kaye niya Jewa nititiskaanesin. Chihchiwe aa iteyimisuuch aniyuu Israel e uhchiitwaau. Kaye niya ekute wehchiyaan. Chihchiwe aa iteyimisuuch mikw Abraham e ihtaayich e chii uhchi aanische pimaatisiitwaau. Niya kaye ekute kaa uhchi aanische pimaatisiyaan.

²³ Iteyihtamuch aa e atushkuwaatwaau Christ. Etituu niya nitatuskuwaayuuh. Shaash etituu nichiishkwe ayimin. Namui nimiyeyihten mwehch wiyawaau e ishi aayimuumisutwaau e ishi aayimuumisuyaan. Etituu niya nichii mistaapatisin ishpish wiyawaau. Etituu niya mihchetwaau nichii chipahukuun. Etituu niya mihchetwaau nichii pishishtehukuun ishpish wiyawaau. Etituu niya mihchetwaau nichii peshuwaapahten nipuwin ishpishaat wiyawaau.

²⁴ Niyaayinwaau nichii wiisacheyihtamihiikuch anichii Jewa iinuuh kaa niikaanishkuwaatwaau nishtumitanuu peyakushtewaau e chii pishishtehutwaau.

²⁵ Nishtwaau nichii waweshihiikuun piywaapiskwah e utataamuhukuyaan. Peyakwaau nichii paahpimusinaatahukuun e wii nipahiikuyaan. Nishtwaau nichii ihtaan e kushaapech chiimaan. Peyakwaau, peyakw chiishikaau peyakw tipiskaau maak muushe nichii papaamaahukuun chihchikamiihch.

²⁶ Mihchetwaau nichii papaamipayin e waawiihtamaan miywaachimuwin. Uu maak kaa ishi papaamipayaan mihchetwaau chii kushtaatikun siipiihch e ihtaayaan. Mihchetwaau chii kushpanaateyihtaakun chimutiskach chechii kusiihkuutwaau. Mihchetwaau nichii aayimihiikuch Jewa kaa itiskaanesitwaau nitiiniimach kaye anichii ekaa Jewa kaa itiskaanesitwaau. Utenaahch nichii wiisacheyihtamihiikuun kaye anite pakwaatiskamikaahch nichii aayimihun. Chihchikamiihch kaye nichii aayimihun. Kaye maak anichii niichishaanich kaa iteyimakwaau ekaa maak taapwe kaa wiichishaanawaapaane nichii aayimihiikuch.

²⁷ Naashch taapwe nichii mista aapatisin. Mihchetwaau nichii mista ayeskusiin, mihchetwaau kaye namui mechim nuuhchi nipaan. Mihchetwaau nichii nuuhtepayin miichim ekw maak kaa ati siiweyaan, kaye maak nichii nuuhteyaapaakwen. Niyaanikutehch namui mechim uhchi ihtakun taanit che ihtaayaan kaye niyaanikutehch nichii siihkachin.

²⁸ Eshikum chiishikaauh kaye nikusikushkaakun e maamituneyimakwaau misiwe anichii umaamuuayimihaauch nanaahkuu ihtaawinihch kaa ihtaatwaau.

²⁹ Awen ekaa saapeyimisut nichischeyihten taan e iteyihtaakuhch aniyuu e ihtit awen. Michihpin awen e machituutahk ihtakun e ishi misimeyihtamahiikuyaan uu.

³⁰ Netuweyihtaakunikwe uu chechii ishi ayimiyaan ekun kiipaa che ishi aayimuumisuyaan. Namui maak niwii chisteyihtaakuhiisun. Teyakuch nika aayimuuten taan e ishpish ekaa saapisiyaan.

³¹ Chishemanituu chitipeyihchikeminuu Jesus Uhtaawii chischeyihtam ekaa nanatayuuch. Wiya kaachiche kata maamihchimaakanuu.

³² Damascus kaa ishinihkaatech ihtaawin kaa ihtaayaan an piihtuuchimaau an wehchi tahchiskuwaat aniyuu chisheuchimaau Aretas kaa ishinihkaasut chii itashuweu che chipunikuuch anite ihtaawinihch. Chiwii wiiwiyaan an ihtaawin nipaa maakunikuun.

³³ Niwiichewaakanich maak nichii wiichihiikuch chechii ushimuuch. Watapiiwatihch nichii piihtahukuch ekw anite waasenitaakanihch kaa uhchi ayaashaapihchenitwaau wiiwiitamihch aniyuu ihtaawiniyuu, ekw maak kaa ushimuyaan.