2 Corinthians 10 - Chishemanituu Utayimuwin: Kaa Uskaach Testament

Taan kaa ishi nishkweushihtwaat Paul chiniyamisiin kaa itaakanuut

¹ Ihtakun che ishi pukuseyimitakuch. Uu maak che aayimuutamaatakuch an e ishpish chishewaatisiit kaye e ishpish chiyaamisiit Jesus Christ niwii iteyihtaakusin an e ishi ayimihiitakuch. Ihtaauch awenichii e itwetwaau naashch ekaa saapihtaakusuuch anit e ihtaawekw e ihtaauch. Mikw anite aahchiiuh e ihtaauch e uhchi suuhcheyihtaakuhiisuch itweuch.

² Suuhk chinitutamaatinaawaau, ekaawii aayihkamihiikw chechii ekaa manaatisiyaan utihtakuche. Taapaa nika uhchi manaatisiin matwehukwaawenich anichii awenichii mikw niyaan e maamituneyimisuwachiht kaa iteyimiyamihtwaau.

³ Aat utah aschiihch e ihtaayihkw namui chit ishi maasihchenaanuu e ishi maasihchetwaau awenichii utah aschiihch.

⁴ Namui wii aschiiyuu maasihcheu chekwaanh nuuhtaapachihunaan. Chishemanituu usuuhkaatisiiwin nuuhtaapachihuwaanaan e wanaachihtaawachiht taan nanaahkuu e ishi maahchikwaapihkaatikutwaau awenichii machimanituuh.

⁵ Kwaast nitihtinaan chechii niihchiwepahamaahch taan e ishi wiyeshimuweu kachehtawehtaakuhiisutwaau anichii ekaa muyaam kaa ishi aayimuumaatwaau Chishemanituu kaye kaa nakaahuwetwaau chechii chischeyimaakanuyich Chishemanituuh. Niwii ihtuutawaanaanich chechii pachishteyimitisuustamuwaatwaau Christ umituneyihchikanawaauh chechii uhchi nanihiihtuwaatwaau.

⁶ Niishtam maak chiwii taupayihtwaatinaan chechii nuukuhtaayekw taapwe e nanihiihtuwekw Christ. Ekw maak che waweshihachihtwaau anichii eshkw yaapach ekaa kaa nanihiihtahkwaau.

⁷ Ekaawii ihtikw muyaam ekaa waapahtamekw taan e ishi miyu nisituunaakuhch. E ihtaakwe awen e cheshtinaahut Christ e tipiiweusiitutaakut che wii chischeyihtahk eukun an kaye chiyaanuu tepeyimitahkw.

⁸ Taapaa nishaakweyimun aat apishiish paashich kaa ishi aayimuutamuwaane an tipeyihchichewin kaa miikuyaahch chechii wiichihiitaahch. Utipeyihchikeu nichii miikunaan uyuu tipeyihchichewiniyuu chechii wiichihiitaahch, namui wii chechii niihtahuutaahch.

⁹ Namui chinituweyimitinaawaau chechii iteyihtamekw e wii kushtaachihiitakuch taan e itisinahamaatakuch.

¹⁰ Pasch wesh awenichii itweuch, “Naashch taapwe suuhchihtaakuniyuu taan e itasinahiichet Paul. Muhch maak e ihtaat utah naashch taapwe niyamisiiweyihtaakusuu. Kaye maak namui wiyesh itaapataniyuu taan e itwet.” Ekun e itwetwaau.

¹¹ Mikw maak yaaitei che wii chischeyihtahkwaau uchii awenichii muush e ihtuutamaan taan e itisinahamaatakuch che ihtuutamaan iskutak anite e ihtaayekw e ihtaayaan.

Taan kaa ishi nishkweushihaat aniyuu chihchiwe iteyimisuu kaa itikut

¹² Namui niwii ihtinaan taan e ihtitwaau anichii awenichii naashch chihchiwe kaa iteyimisutwaau. Mwehch naashch wiyawaau uste e iteyihtaakusitwaau e iteyihtaakusiyich kutak aweyuuh ekun e iteyimisutwaau. Naashch kaye kakanuwaapamituuch taapituu chechii iteyihtaakusitwaau. Nuwach maak namui iteyihtamuch aniyuu kaa ihtitwaau.

¹³ Niyaan maak wii namui paashich nika uhchi ishi mamiywaachimisunaan. Mikw aniyuu aapatisuwiniyuu Chishemanituu kaa miyimiht che aapatisiishtamuwachiht eukw mikw an che mamiywaatutamaahch. Ekut maak e asichipayekw chiyawaau wesh chitatushkaatinaan.

¹⁴ Namui paashich nit ishpish aayimuumisunaan muyaam chipaa ishinaakun e ihtiyaahch ekaa niyaan niishtam uhchi petwaataahch miywaachimuwin. Taapwe maak niyaan niishtam chichii petwaatinaan miywaachimuwin.

¹⁵ Namui kaye nitaayimuutamuwaanaan kutak awen utatuschewin mwehch niyaan an e chii ishi atushcheyaahch chechii itihtaakusiyaahch. Namui niwii paashichiskamuwaanaan taan e ishi miyimiht Chishemanituu chechii ishi atushkuwachiht. Nipukuseyihtenaan mikw etituu chechii atushcheyaahch anite e ihtaayekw wetaach chechii nihtaauchihch chitaapwehtamuwinawaau kaye che ishpish miikuwaahche Chishemanituu chechii wiichihiitaahch.

¹⁶ Chek maak nanaahkuu aschiihch uste anit kaa ihtaayekw kaa ihtakuhkwaauh chechii nituu waawiihtamaach miywaachimuwin. Ekw maak namui nika uhchi nanaapeumuwaachewaanaan kutak awen taan kaa ishi atushchet.

¹⁷ Wesh itashteu Chishemanituu utayimuwinihch, “Che wii nanaapeumukwe awen, aniyuu taan kaa ishi ihtuutamiyich Utipeyihchikeuh kata nanaapewaatamuweu.”

¹⁸ Wiya e miywaachimisut awen namui wiyesh itaapataniyuu. Michihpin maak Utipeyihchikeuh miywaachimikute eukw aniyuu yaakw yaapataniyich.