1 Timothy 6 - Chishemanituu Utayimuwin: Kaa Uskaach Testament

¹ Chiyawaau aapachihaakanitikw kaa taapwehtamekw chishteyimaahkuch kuuchimaamuwaauch ekaa nitawiin chechii ishi aayimuuteyich Chishemanituu utishinihkaasun kaye maak uu e ishi chiskutamaacheyaahch.

² Ekw maak kuuchimaamuwaauch tiyaapwehtamuwaakwenich ekaawii chika uhchi ihtuutuwaawaauch ekaa chechii chishteyimekuch mikw aniyuu e chischeyimekuch e wiichishanitutuwekuch. Teyakuch etituu chipaa miyu atushkuwaawaauch chechii wiichihekuch uchii chiichishaanuwaauch kaa saachihaakanuutwaau. Eukw maak uu chipaa ishi chiskutamaachenaawaau kaye chipaa ishi kacheshkwenaawaau.

Kaa wiyeshihiiwech chiskutamaachewin ekw maak chihchiwe miisitisiiwin

³ Ekw maak awen aahchiiuh e ishi chiskutamaachet kaye e aanuwehtamuwaat aniyuu Utipeyihchikeu Jesus Christ utaapweu ayimuwiniyuu kaye aniyuu e chiskutamaakanuyich chechii Chishemanituuwaatisiinaanuyich

⁴ naashch taapwe chihchiwe iteyimisuu, kaye namui nihaau chischeyihtam aniyuu chekwaayuu waa ishi aayimuutahk. Wesh uste iteyihtam chechii aayimuutahk chekwaayuu anit chechii uhchi ekaa naniheyimitunaanuyich. Ekut maak utah wehchipayihch uhteyihtamuwin kaye e mamachipayihkahtaatunaanuuch kaye maayeyihchewin kaye nitawiin e itaakanuut awen.

⁵ Uchii maak kaa mamachipayihtaasutwaau namui chischeyihtamuch taapwewiniyuu kaye namui kuiskw chii ishi nisituhtamuch taapwewiniyuu. Eyuu maak iteyihtamuch e Chishemanituuwaatisiinaanuyich ekut chechii uhchi uhtisiitwaau.

⁶ Taapwe kiipaa e Chishemanituuwaatisiit awen e ispihteyihtahk maak taan e ishi ayaat niweyuutisiin iteyihtam.

⁷ Kaa pimaatisiihkw utah aschiihch namui chekwaan kuuhchi petaanaanuu. Puunipimaatisiihkwe maak namui chekwaan chika uhchi chistuhtataanaanuu.

⁸ Eyuwehch maak e ayaayihk miichim kaye chekwaayuuh e chichishkamuhkw ekun chipaa ishi naniheyihtenaanuu.

⁹ Ekw maak anichii muush etituu kaa wii ayaatwaau chekwaayuu kata nachishkamuch e ishi kakwechihiikutwaau aniyuu kaye maak aniyuu che ishi ati nanaahkuu machinanituweyihtahkwaau muyaam e nakwaatikutwaau kata ishinaakuniyuu. Waawaach tekash chika chii wanaachihiikuuch uyuu.

¹⁰ Wesh shuuliyaau e saachihtaakanuuhch ekut wehchipayihch nanaahkuu machihtwaawin. Waawaach ekut kaa uhchi puuniitwaau kutakach e taapwehtahkwaau kaye maak ekut naashch wehchi mamishimeyihtamihiisutwaau kutakach.

Timothy kaa ishi wiihtamuwaakanuut che ishi pimaatisiit

¹¹ Chiya maak Timothy, Chishemanituu kaa atushkuwat, ekaawii aapateyihta uyuuh machi chekwaayuuh. Uste iteyihtamahiikuh kuiskutaatisiiwin, Chishemanituuwaatisiiwin, taapwehtamuwin, saachihiiwewin, yaaiteyihtaakusuwin, kaye chiyaamisiiwin.

¹² Suuhk yaaichikaapuushta an e ishi taapwehtaman anit chechii uhchi uhchisiyin kaachiche pimaatisiiwin. Eukw wesh kiipaa an kaa ishi wiyaapamikuyin chechii ishi ayaayin iskutak tekash kaa chischeyihtaakusiyin che atushkuwat Chishemanituu, kaa wiihtaman taapwe e taapwehtaman uhchishkuu mihchetu awenich e ihtaatwaau.

¹³ Chishemanituu chii pachishtinam misiwe chekwaayuu kaa pimaatisiimakaniyich. Christ Jesus tekash chii chischeyihtaakuhuu awen wii anit kaa uhchishkuukaapuushtawaat Pontius Pilate. Taapishkun Chishemanituu ekw maak Christ Jesus e pehtuutwaau, uu chiwiishi siihchimitin,

¹⁴ yaakwaau ishi nanihiihta taan kaa itashumisk Chishemanituu, kuiskw wii ihtuut ekw maak namui nitawiin chika uhchi ishi ataameyihtaakusin che ishpish ekaa miin takushihk Chitipeyihchikeminuu Jesus Christ.

¹⁵ Wiya maak Chishemanituu chika chischeyihtam che ishpish utihchipayihtaat uyuu che takushiniyich Jesus. Wiya Chishemanituu taapwe iteyihtaakuniyuu chechii maamihchimaakanuut kaye wiya chihchiwe pimipayihtaau misiwe chekwaayuu. Eukw uyuu misiwe chisheuchimaauch uchisheuchimaamuwaau kaye misiwe kaa tipeyihchetwaau utipeyihchikemuwaau.

¹⁶ Wiya mikw kaachiche pimaatisiyuu, anite maak ekaa nihtaa muhch chechii naataakanuyich waashtewiniyuu ekut e ihtaat, anite ekaa aweyuu chechii naatikut. Namui nihtaa muhch uhchi waapamikuu aweyuu kaye namui nihtaa chika chii waapamikuu. Wiya maak chika chisteyihtaakuhaakanuu kaye maak wiya ayaau kaachiche suuhkaatisiiwiniyuu. Amen.

¹⁷ Chinituweyimitin maak Timothy, chechii wiihtamutwaau anichii kaa miisitisiitwaau ekaa chechii chihkaateyimishutwaau aniyuu e miisitisiitwaau kaye ekaa chechii aspeyimututahkwaau aniyuu ekaa kaa cheshtinaateyihtaakuniyich miisitisiiwiniyuu. Chischisuumach uste Chishemanituu chechii aspeyimututuwaatwaau an kaa miyu miitahkw misiwe chekwaayuu chechii miyeyihtamihiikuuhkw.

¹⁸ Wiihtamuuch anichii kaa miisitisiitwaau chechii miyutuutamaachetwaau, miyutuutamaachewinihch chechii ishi miisitisiitwaau, chechii ishinaakusitwaau naashch kaa miyeyihtahkwaau e miiwetwaau kaye naashch kaa wehchipayiyich chechii papahkwenamuwaatwaau aweyuu taan e ishi ayaatwaau.

¹⁹ Uyeyuu maak ihtuutahkwaawenich ekut chechii uhchi ayaatwaau chihchiwe miisitisiiwiniyuu anite niishtaamihch, ekut kaye chihchiwe chechii uhchi chischeyihtahkwaau pimaatisiiwiniyuu utah aschiihch.

²⁰ Chiya Timothy naanaakachihtaa taan kaa ishi miisk Chishemanituu chechii itaapatisuut. Ekaawii wiichihiyich anichii kaa ayimitutahkwaau chekwaayuuh ekaa wiichihiiwemakaniyikwaau anite ishi e Chishemanituuwaatisiinaanuyich. Ekaawii aapatihtuuch anichii kaa itihtaakusitwaau muyaam naashch mistahii e chischeyihtahkwaau chekwaayuu ekaa maak nihaau muyaam ishi kachescheyihtahkwaau.

²¹ Wesh pasch uchii uyuu kaa iteyihtaakusitwaau nakatamuch aniyuu kaa ishi chiskutamuwaakanuutwaau chechii taapwehtahkwaau. Chishemanituu maak misiwe chika shaweyimikuwaau.