1 Timothy 5 - Chishemanituu Utayimuwin: Kaa Uskaach Testament

Taan e itashumaakanuutwaau kaa peyakutwaau iskweuch chisheinuuch ekw maak aapachihaakanich

¹ Ekaawii chistahamuu awen kaa chisheinuut. E iteyihtaakuniyikwe maak chechii chistahamuwaakanuut chekwaayuu yaakwaau ishi ayimihii muyaam taan chipaa ihtuutawaau tipiiwe kuuhtaawii. Anichii kaa uschiniichuutwaau muyaam tipiiwe e wiichishaaniin chipaa ihtuutawaauch,

² ekw anichii kaa chisheishkweshuutwaau muyaam e ukaawiyin chipaa ihtuutawaauch. Anichii kaa uschiniichiskweutwaau muyaam tipiiwe chiichishaaniskwemach chipaa iteyimaauch, namui mitun nitawiin chipaa uhchi ishi maamituneyimaauch.

³ Miyu naanaakachihaahkuch anichii mitun kaa peyakutwaau iskweuch.

⁴ E peyakut iskweu e ihtaayikwen maak utawaashiim maak ushim e ispihtaatisiyich chechii kanuweyimikut kiipaa che kanuweyimikut ekw maak che nuukuhtaayich e chisteyimaayich Chishemanituu kaye taapwe taapwehtamuwinihch e ishi pimaatisiyich. Uyuu ihtitwaawenich ekw muyaam e chiiwe miyaatwaau taan kaa ishi miyutuutaakutwaau uniichihiikuwaau maak umushuumuwaau ekun che ishinaakusitwaau. Eukw uyuu e ishi nahiiwehiikut Chishemanituu e ihtinaanuyich.

⁵ Iskweu maak mitun e peyakut ekaa mitun ihtaayich aweyuu chechii wiichihiikut mikw Chishemanituu aspeyimututaweu. Muush kanawach ayimihaau e chiishikaayich kaye e tipiskaayich e nitutamuwaat Chishemanituu chechii wiichihiikut.

⁶ Ekw an iskweu kaa peyakut pisikw maak mikw wiya kaa wii nanihiiwehiisut muyaam e nipit ishinaakusuu aat aniyuu eshkw e pimaatisiit.

⁷ Eukw uyuu kaye ishi waawiihtamuuch misiwe anichii kaa taapwehtahkwaau ekw maak namui nitawiin chika uhchi ishi ataameyihtaakusuu awen.

⁸ Wesh chiishpin awen ekaa mitun waa wawiichihaakwe tipiiwe uwaahkumaakanh kaye aniyuuh anit tipiiwe e peyakuteusiit kaa ihtaayich mitun ekaa taapwehtahk taapwewiniyuu ishinaakusuu uyuu e ihtit. Etituu wiya namui muyaam ihtuu ishpishaat aniyuu ekaa kaa taapwehtamiyich.

⁹ Namui chipaa uhchi masinahwaakanuu iskweu kaa peyakut anite ayimiheukamikuhch chechii uhchi wiichihaakanuut paatish kutwaashumitanuupuneshite. Kaye namui chipaa uhchi wiichihaakanuu uste peyakwaau kaa niipuukwe.

¹⁰ Kaye chipaa ihtakuniyuu taan e ishi miywaachimaakanuut e mamiyuutuutamaachet, muyaam e chii miyu nihtaautinaat awaashah, e chii miyu kanuweyimaat maan maaniteuh, kaye muush e chii mamiyuututawaat kaa taapwehtamiitwaauh kaye muush e chii nanaatamuwaat aniyuuh kaa aayimihuyich ekw maak suuhk muush e chii naanituu miskahk taan che ishi mamiyuutuutamaachet.

¹¹ Anichii iskweuch kaa peyakutwaau eshkw kaa uschipimaatisiitwaau namui chipaa uhchi asichisinahwaakanuuch anit mesinahwaakanuyich kaa peyakuyich iskweuh. Wesh katachii ishinaakuniyuu eshkw miin che wii niipuutwaau.

¹² Miin maak niipuutwaawenich shaash maak kaa masinahwaakanuwaakwenich ekw che ishinaakuniyich e piikunahkwaau taan kaa itaatwaau Chishemanituuh cheshtinaash che ihtuutahkwaau.

¹³ Kutakach uchii kaa ushchipimaatisiitwaau kaa peyakutwaau iskweuch wetaach namui wiyesh chika uhchi iteyihtamuch ekaa mitun chekwaayuu ihtuutahkwaau. Mikw papaa piihtakuweuch aweyuu wiichiihch, mikw e papaa chiiutetwaau. Namui maak mikw uyuu ihtuuch, chek papaa pakunuumuweuch kaye papiichiskwehtaasuuch e aayimuutahkwaau chekwaayuu aniyuu ekaa chipaa uhchi aapateyihtamihiikuuch.

¹⁴ Uste maak miywaayuu ekush miin chechii niipuutwaau uchii iskweuch kaa peyakutwaau eshkw kaa uschipimaatisiitwaau, kaye chechii ati ayaawaatwaau awaasha kaye chechii miyu nanaakataweyihtahkwaau uwaaskahiikanimuwaauh. Uyuu maak ihtuutahkwaawenich namui nitamukw chika uhchi ishi ayimitutaakuuch aweyuu.

¹⁵ Shaash wesh ihtaauch anichii kaa peyakutwaau iskweuch uste e iteyihtahkwaau machimanituu chechii nanihiihtuwaatwaau.

¹⁶ E ihtaakwe iskweu e ihtaayich iskweuh e waahkumaat e peyakuyich chipaa wiichiheu uyuuh, ekaawii umaamuuayimihaauch kata uhchi maahtakushkaakuuch uyuuh kaye chechii wiichihaatwaau, aniyuuh yaakw chipaa wiichiheuch tekash kaa peyakuwiitwaau iskweuh ekaa mitun kaa ihtaayich aweyuu chechii naanaakachihiikuyich.

¹⁷ Anichii kaa wiichihiiwetwaau e niikaanishkaakanuyich ayimiheukamikuyuu e miyu nanaakatuweyihtahkwaau maak aniyuu e itaapatisitwaau iteyihtaakuniyuu naashch chechii chisteyimaakanuutwaau. Etituu maak chipaa chisteyimaakanuuch anichii mitun tekash kaa ishi pachishtinisutwaau chechii waawiihtahkwaau Chishemanituu utayimuwiniyuu kaye chechii chiskutamaachetwaau.

¹⁸ Wesh itashteu Chishemanituu utayimuwinihch, “Ekaawii ihtuutuu chituuhkaan ekaa chechii miyu ashamat e aapachihiit maak.” Miin anite itashteu, “An awen kaa aapatisit tepicheyihtaakusuu chechii miyaakanuut utipahamaakusiiwin.”

¹⁹ Ekaawii papaameyihtamukw taan e itaakanuukwe e ishi ataameyihtaakusit kaa niikaanishkahk ayimiheukamikuyuu paatish niishu maak nishtu awenich peyakuniyiche taan e itaachimaatwaau.

²⁰ E ihtaakwe maak awen e niikaanishkahk ayimiheukamikuyuu taapwe e ataameyihtaakusit e machituutahk kuiskw chipaa wiihtamuwaakanuu taan e ishi wanituutahk uhchishkuu misiwe umaamuuayimihaau e ihtaayich ekw maak misiwe awen anit chechii uhchi yaakwaamiit.

²¹ Uu maak chititashumitin Chishemanituu kaye Jesus Christ kaye maak kaa payehchisiitwaau enchilich e pehtuutwaau, nanihiihta uu taan kaa itashumitaan anuhchiish. Misiwe chekwaan e ihtuutaman nuukuhtaa taapituu e iteyimitwaau misiwe awenichii.

²² Ekaawii wesaa wiipach chika uhchi saaminaau awen kaye chechii wiichihiit awen e machituutahk. Suuhk miyu kanuweyimisuu chechii payehchinaakuhch chipimaatisiiwin.

²³ Uu maak chiwii ititin Timothy, an muush kaa chii wii ayaahkusiyin maan, kaye chiskataahch kaa chii aahkusiyin, ekaawii mikw nipii muush minihkwe. Niyaanikutehch apishiish chipaa minihkwen shuuminaapuu aamine chechii uhchi miywaatisiyin.

²⁴ Pasch awenich umachihtwaawinawaauh tiiwehch miyu nisituunaakuniyuuh eshkw ekaa mechim wiyaaskunaakanuutwaau. Kutakach maak namui tiiwehch chischeyihtaakuniyuuh umachihtwaawinawaauh.

²⁵ Ekun maak mwehch e ishinaakuniyikwaauh kaye awenich umiyuutuutamaachewinawaauh. Miyu nisituunaakuniyuuh kutakach. Anichii maak ekaa kaa miyu nisituunaakuniyikwaau umiyuutuutamaachewinawaauh eshkw paatimaa kata chischeyihtaakuniyuuh.