1 Timothy 1 - Chishemanituu Utayimuwin: Kaa Uskaach Testament

¹ Eukw niya Paul, Jesus Christ utapastalimh. Chishemanituu chipimaachihiiweminuu nichii itashumikw chechii aayimuumach Jesus Christ an awen e ihtaat wehchi ayaayihkw aspeyimuwin.

² Chiya Timothy chimasinahamaatin, chiya muyaam tipiiwe nikus kaa iteyimitaan wesh niya chichii wiichihiitin wetaach chechii nihtaauchiyin anite Christ e ihtaat ishi. Chishemanituu Kuuhtaawiinuu kaye Christ Jesus Chitipeyihchikeminuu chika wii miikw chishewaatisiiwiniyuu, shaweyihchichewiniyuu kaye chiyaameyihtamuwiniyuu.

Yaakwaamiishtawaahkuch nitamukw kaa ishi chiskutamaachetwaau

³ An maak taan kaa ishi siihchimitaan iskutak che ituhteyaan Macedonia miin chititin, eukw an chechii ihtaayin pitamaa anite an ihtaawin Ephesus kaa ishinihkaatech chechii chistahamuutwaau anichii awenich ekaa muyaam kaa ishi kachiskutamaachetwaau.

⁴ Wiihtamuuch ekaa chechii aapateyihtahkwaau weskach tipaachimuwinh kaye aniyuu taan kaa ishi pechi itiskaatuyich uwaahkumaakanawaauh anite weskach muyaam chechii iteyihtahkwaau utahchaahkuu pimaatisiiwiniwaahch chechii wiichihiikutwaau uyuu chekwaayuu. Wesh chiishpin uyuu che ihtiwaakwenich ekut chechii uhchi chihchipayihch e kachiihkaamitutwaau. Kaye maak uyuu e ihtitwaau namui mitun wiichihtaauch taan chechii ishi atushkuwaakanuyich Chishemanituu. Taapweyihtamuwinihch maak ekute e ishi atushkuwaakanuut Chishemanituu.

⁵ Wesh uyuu itashumitwaawenich ekut chechii uhchi saachihaatwaau aweyuu e payehkaniyikwaau utehiiwaau kaye e chischeyihtahkwaau kuiskw e chii ihtitwaau kaye maak e suuhcheyihtaakuniyich utaapwehtamuwinawaau. Wesh uu ishi nanaakataweyihtamihiikuyine chechii ishi wiihtamuutwaau ekute chechii uhchi tekash saachihaatwaau aweyuu utehiiwaahch.

⁶ Pasch maak awenich namui shaash aapateyihtamihiikuuch uyuu e ishi kuiskupimaatisiinaanuyich. Uste iteyihtamihiikuuch chechii aayimuutahkwaau aniyuu chekwaayuu ekaa mitun chekwaayuu ishi wiichihiikutwaau.

⁷ Aniyuu naashch e wii chiskutamaachetwaau Chishemanituu uwiishuwewiniyuu eukun waa ishi chiihkaayaapamikusiitwaau, ekaa maak mitun nanesituhtaasutwaau taan nihaau waa itwetwaau kaye namui mechim chischeyihtamuch aniyuu chekwaayuu kaa aayimuutahkwaau aat muyaam naashch e chischeyihtahkwaau e itihtaakuhiisutwaau.

⁸ Chichischeyihtenaanuu maak chiyaanuu e miyu wiichihiikut awen muyaam e itaapachihtaawaat Chishemanituu uwiishuwewiniyuu taan kaa ishi nituweyihtamiyich chechii itaapataniyich.

⁹ Uu maak wii nisituhtamuhkw, taapaa namayeu ukuiskutaatisiiu kaa ushihtamuwaakanuut uyuu wiishuwewiniyuu. Anichii wesin ekaa mitun kaa aapateyihtahkwaau Chishemanituu uwiishuwewiniyuu kaye anichii ekaa mitun kaa nanihiihtamuwaatwaau kaye anichii ekaa mitun kaa chischeyihtahkwaau taan chipaa ishi nanaakatuweyihtamihiikuuch upimaatisiiwinawaau eukw uchii kaa ushihtamuwaakanuutwaau uyuu wiishuwewiniyuu. Kaye maak anichii ekaa mitun kaa papaameyimaatwaau Chishemanituu upimaatisiiwiniwaahch kaye anichii tekash kaa machipimaatisiitwaau eukunich uchii kaa ushihtamuwaakanuutwaau aniyuu wiishuwewiniyuu. Kaye maak anichii ekaa kaa payehch pimaatisiitwaau utahchaahkwaahch kaye anichii ekaa mitun kaa ayimihewaatisiitwaau kaye anichii kaa nanipahaatwaau uhtaawiiwaau kaye ukaawiiwaau kaye anichii kaa nipahiiwetwaau,

¹⁰ kaye anichii nanaahkuu kaa ishi wiinisuutuutuwaatwaau aweyuuh kaye anichii naapeuch kaa wiichewaatwaau wiitaapewaauh ekw maak iskweuch kaa wiicheutwaau wiich iskweuwaauh kaye anichii kaa chimutitwaau aweyuu, ekw maak anichii kaa wiihchi nanataitwaau kaye anichii nitamukw kaa itaachimutwaau aat e chii nispich taapwetwaau kaye maak misiwe anichii awenich ekaa kaa ihtuutahkwaau taan e itashuwemakaniyich uyuu miyu chiskutamaachewiniyuu.

¹¹ Uu miyu chiskutamaachewin anite miywaachimuwinihch uhchipayuu. Eukuu miywaachimuwin kaa miikuyaan chechii waawiihtamaan. Anite maak an kaa chisteyihtaakusit kaye kaa shaweyihtaakusit Chishemanituu e ihtaat ekute wehchipayihch.

Paul kaa ishi chishewaatutaakut Chishemanituuh

¹² Nanaaskumaau Chitipeyihchikeminuu Christ Jesus taan kaa ishi taapweucheyimit kaye taan kaa ishi miit suuhkaatisiiwiniyuu chechii atushkuuk aniyuu taan kaa ishi wiyaapamit,

¹³ aat naashch e chii aahkwaateyihtaakusuuch nanaahkuu e chii ishi mamaayeyimak kaye e chii papaashtaamak kaye e chii nanehkaachihiik. Mikw maak yaapach nichii chistimaacheyimikw wesh an kaa ishpish chii aanuwehtamaan namui nuuhchi chischeyihten taan nihaau kaa ihtiyaan.

¹⁴ Naashch nichii weyuuch nuukuhtwaakw Utipeyihchikeu taan e ishpish chishewaatutuut chechii uhchi ati taapweyimak kaye chechii uhchi ati saachihiik Christ.

¹⁵ Eukw maak uu tiyaapwemakahch itwewin, Christ Jesus e chii pechi takushihk utah aschiihch chechii pimaachihaat umachihtwaau. Maauch maak kaa machaatisiit nichii iteyihtaakusin niya.

¹⁶ Aat maak niya maauch e chii machaatisiyuuch nichii weyuuch chishewaatutaakw Chishemanituu chechii nuukuhtaat taan chechii ishpish weyuuch siipiiwesiistuwaat aniyuuh che taapweyimikut kaye maak che ayaayich kaachiche pimaatisiiwiniyuu.

¹⁷ Ekw maak kaachiche katawii chisteyimaakanuu kaye wiya maauch katawii chisteyihtaakuhaakanuu an kaachiche kaa chisheuchimaaut, an ekaa nihtaa che nipit, ekaa kaa nuukusit kaye an mikw payekut Chishemanituu. Amen.

¹⁸ Uu maak chititashumitin chiya Timothy nikus. Suuhk waawiihta uu miywaachimuwin wesh eukw uyuu kaa ishi aayimuumiskwaau che ihtuut anichii uchischiwehiichesuuch iskutak kaa niikaan aayimuutahkwaau chipimaatisiiwiniyuu. Kanuweyihtamihiikuyine maak an kaa ishi aayimuutech chipimaatisiiwin chika wiichihiikuun chechii miyu maasihcheyin anite taapwehtamuwinihch ishi.

¹⁹ Suuhk kanawaach taapwehta kaye suuhk muush kuiskw aihtih ekw maak namui chika uhchi mamishimeyihten ekaa machituutamane. Wesh ihtaauch anichii naashch ekaa papaameyihtamihiikutwaau taan chipaa ishi pimaatisiyuuch ekw maak kaa ati wanaachihtaatwaau utaapwehtamuwinawaau.

²⁰ ekute kaa ishi shaakuuchipitaakanuutwaau Hymenaeus ekw maak Alexander. Machimanituu maak nichii pachishtishuwaataau chechii nanehkaateyihtamihaat uyuuh. Pukuseyihtaakuniyuu maak anit chechii uhchi chischeyihtahkwaau ekaa chechii paashtaamutwaau.