1 Thessalonians 5 - Chishemanituu Utayimuwin: Kaa Uskaach Testament

Ayeskuwiikw che takushihk Utipeyihchikeu

¹ Niichishaanitikw, namui nituweyihtaakun chechii aayimuutamaatakuch taan aniyuu e chiishikaayich kaye taan che ishpishichiishikaayich che takushihk Utipeyihchikeu.

² Wesh chimiyu chischeyihtenaawaau chiihtihtawii che utihchipayihch an e chiishikaach Utipeyihchikeu che takushinit, mwehch awen chimutiska e piihtukaakut e tipiskaayich namui niyaakan chischeyihtam.

³ Mekwaach itwetwaawenich awenichii, “Misiwe chekwaan miyupayuu, namui ihtakun chechii sechisiihkw,” sischikuuch chika mista nanehkaateyimuuch. Mwehch e ishpish sischikuuch chihchi muushihut iskweu iskutak che waapamaausut ekun che ishpish sischikuuch mista nanehkaateyimutwaau awenichii. Namui maak chika ihtuuch ekaa che nanehkaateyimutwaau.

⁴ Chiyawaau maak wii niichishaanitikw, namui chit ishi pimaatisiinaawaau e ishi pimaatisiitwaau anichii ekaa kaa chischeyimaatwaau Chishemanituu kaye kaa machituutahkwaau ekw maak namui chipaa uhchi pisiiwiikunaawaau utihchipayihche an e chiishikaach mwehch e ishi pasiiwiikut awen e utihtikut chimutiska.

⁵ Misiwe e tashiyekw chit ishi pimaatisiinaawaau e ishi pimaatisiinaanuuhch e mekwaachiishikaach, anit misiwe chekwaan e nuukuhch. Namui chit ishi pimaatisiinaawaau e ishi pimaatisiitwaau awenichii e tipiskaayich, mekwaach ekaa nuukuniyich chekwaayuu.

⁶ Namui maak chipaa uhchi ihtinaanuu ekaa chechii yaapateyihtamuhkw kaye ekaa mitun chechii nanaakatuweyihtamuhkw taanit che utihchipayiyich Utipeyihchikeu uchiishikaam mwehch e ihtitwaau anichii ekaa kaa taapwehtahkwaau miywaachimuwiniyuu. Muush chipaa ayeskuwiinaanuu, muush chipaa wii waaskameyimunaanuu.

⁷ E tipiskaach ekut nepaanuuch kaye e tipiskaach ekut e chiishkwepetwaau awenichii.

⁸ Ekw maak muyaam anite waashtewinihch e ihtaayihkw e ishinaakusiihkw kuiskw chipaa wii ishi maamituneyihtenaanuu. Ekw maak chipaa pushchishkenaanuu miskaaschikanaapiskw an che nakaahamaasuwaacheyihkw. Uu maak miskaaschikanaapiskw eukw an saachihiiwewin ekw maak taapwehtamuwin. Piywaapiskw astutin kaye chipaa pushchishkenaanuu. Eukuu aspeyimuwin che pimaachihuyihkw.

⁹ Namui kuuhchi iteyimikunuu Chishemanituu che waweshihiitahkw wiyaaskunicheu chiishikaayiche, chii iteyihtam chechii pimaachihiitahkw Utipeyihchikeu Jesus Christ uhchi.

¹⁰ Christ chichii nipistamaakunuu chechii wiichipimaatisiimihkw mekwaach e pimaatisiihkw maak nipuuhkwe.

¹¹ Eukw maak uu che uhchi kaachiichihiituyekw kaye che uhchi wiichihiituyekw muyaam taan e ihtiyekw anuhchiish.

Taan maahchishtai kaa itashumaat Paul aniyuuh tesalwaaniya kaa ihtaayich kaye kaa waachiyemaat

¹² Niichishaanitikw, chipukuseyimitinaan chechii chisteyimekuch anichii kaa niikaanishkaataakuch. Wesh Utipeyihchikeuh chii wiyaapamikuuch chechii chistunihtahiitaakuch kaye chechii chiskutamaataakuch Chishemanituu e ihtaayich chechii ishi pimaatisiiwekw.

¹³ Naashch chipaa chisteyimaawaauch kaye chipaa saachihaawaauch aniyuu utapitisiiwanawaau uhchi. Ekaawii mamachipayihkahtaatukw.

¹⁴ Niichishaanitikw, chisiihchimitinaan chechii yaakwaamimekuch anichii ekaa kaa wii aapatisitwaau. Wiichihaahkuch anichii kaa kakushtaachitwaau ekaa chechii kushtaachitwaau kaye wiichihaahkuch anichii ekaa kaa saapeyihtahkwaau, kaye anichii kaa nuuhtepayitwaau chekwaayuu. Misiwe awen siipiiwesiistuwaahkw.

¹⁵ Namui yaaitei chipaa uhchi taapishtuwaawaau awen e wanituutaataakw teyakuch muush chipaa miyutuutaatunaanuu kaye misiwe kutakach awenich.

¹⁶ Muush miywaatamukw.

¹⁷ Muush ayimihaakw.

¹⁸ Mikw taan che ispayuwekwe muush nanaaskumukw. Wesh eukw uyuu e ishi pukuseyimitaakw Chishemanituu chechii ihtuwekw e wiicheumekw Christ Jesus.

¹⁹ Ekaawii nakaanaahkw Kaa payehchisiit Ahchaahkw taan waa ishi aapatisit.

²⁰ Ekaawii maayeyihtamuwaataau aniyuu taan e ishi niikaan wiihtahk awen Chishemanituuh kaa ayimishtuwaat.

²¹ Misiwe nituu chischeyihtamukw taan e iinaanuuhch tiyaapwemakanikwe, taapwemakahche maak ekw maak yaakw chechii utinamekw.

²² Ekaawii piskaatamukw machaatisiiwin.

²³ Ninitutamuwaau Chishemanituu an kaa miiwet chiyaameyihtamuwiniyuu mitun tekash chechii payehchihiitaakw. Ninitutamuwaau chitahchaahkuwaauh, kaye chimituneyihchikanawaauh kaye maak chiiyuuwaauh chechii kanuweyihtaakuhkwaau ekaa mitun chekwaan chechii ishi ataameyihtaakuhkwaauh iskutak takushihke Chitipeyihchikeminuu Jesus Christ.

²⁴ Chishemanituu an kaa tepwaatitaakw chika ihtuutam taapwe misiwe taan kaa itwet che ihtuutahk, wesh taapweucheyihtaakusuu.

²⁵ Niichishaanitikw, pechi ayimiheshtamuunaan.

²⁶ Misiwe waachiyemaahkuch chiichishaanuuch e uchemekuch.

²⁷ Chititashumitinaawaau Utipeyihchikeu e ayimishtamuukw chechii ayimihtuwaakanuutwaau misiwe chiichishaanuuch uyuu masinahamaakusuwiniyuu.

²⁸ Ninitutamuwaau maak Utipeyihchikeu Jesus Christ chechii chishewaatutaataakw.