1 Thessalonians 4 - Chishemanituu Utayimuwin: Kaa Uskaach Testament

Pimaatisiiwiniyuu e naniheyihtamihiikut Utipeyihchikeu

¹ Maahchishtai maak niichishaanitikw, chichii chiskutamaatinaan taan chipaa ishi pimaatisiinaawaau chechii naheyihtamihekw Chishemanituu. Eukw maak taapwe e ishi pimaatisiyekw. Chipukuseyimitinaan maak kaye chisiihchimitinaan suuhk etituu uu chechii ihtiyekw e nuushuushkuwekw kaye chiyawaau Utipeyihchikeu Jesus.

² Wesh chichischeyihtenaawaau taan kaa itashumitaahch che ishi pimaatisiyekw, Utipeyihchikeu Jesus Christ e chii wiihtamaakuyaahch taan che ititaahch.

³ Wesh Chishemanituu aniyuu utiteyihtamuwin chechii payehchisiiwekw kaye ekaa mitun wiinisuwaatisiwin chechii ihtakuhch chipimaatisiiwiniwaahch.

⁴ Misiwe naapeu chipaa nuukuniyuu e chisteyimaat wiichiskweu kaye maak chipaa naheyihtamihiikuyuuh Chishemanituuh taan e itaatisiishtuwaat wiichishkweuh.

⁵ Anichii ekaa kaa chischeyimaatwaau Chishemanituuh pisikw tipeyimikuuch nitamukw chechii ihtitwaau. Chiyawaau maak wii namui uu chipaa uhchi iteyihtaakusinaawaau.

⁶ Ekaawii maak awen uyuu chika uhchi wii ishi wanituutaweu wiichishaan. Chichii wiihtamaatinaan suuhk e chii yaakwaamitaahch Utipeyihchikeu che wawesihaat misiwe aweyuuh uyuu kaa ishi wanituutamiyich.

⁷ Wesh taapaa kuuhchi tepwaatikunuu Chishemanituu wiinisuuwaatisiiwinihch chechii ishi pimaatisiyuuhkw. Payehchisiiwinihch chinituweyimikunuu chechii ishi pimaatisiyuuhkw.

⁸ Awen maak ekaa aapateyihtamukwe uyuu chiskutamaachewiniyuu namiyeyuuh naapeuh ekaa kaa aapateyimaat. Chishemanituuh, aniyuuh kaa miikuuhkw Kaa payehchisiyich Ahchaahkw eukun aniyuuh namui aapateyimeu.

⁹ Namui nituweyihtaakun chechii aayimuutamaatakuch taan chipaa ishi maamuu saachihiitunaawaau e wiichishaanihtuyekw chiyawaau kaa taapweyimekw Jesus wesh wiya Chishemanituu chichii chischeyihtamihiikuwaau taan chipaa ishi saachihiitunaawaau.

¹⁰ Naashch maak taapwe chisaachihaawaauch misiwe anichii chiichishaanuwaauch anite Macedonia aschiihch kaa ihtaatwaau. Ekw maak suuhk yaapach chiwii ititinaan yaapach etituu chechii saachihekuch.

¹¹ Shaash ute chichii wiihtamaatinaan taan chipaa ihtinaawaau, suuhk kuchihtaakw chechii chiyaamaatisiyekw. Ekaawii utamaapimaahkuch taan e ihtitwaau kutakach awenichii. Kaye maak suuhk aapatisikw.

¹² Ekw maak namui chika uhchi pukuseyimaawaauch kutakach awenichii chechii uhtinimaataakuch taan e ishi nuuhtepayiwekw chekwaayuu. Uu ishi pimaatisiyekwe ekw anichii awenichii ekaa kaa taapwehtahkwaau che chisteyimitaakuch.

Paul kaa wiihtahk che ispayiyich takushiniyichen Utipeyihchikeuh

¹³ Niichishaanitikw chinituweyimitinaan chechii chischeyihtamekw taan e ispayit awen e puunipimaatisiit e chii maak taapwehtahk miywaachimuwiniyuu. Ekw maak namui chika uhchi ishi misimeyihtenaawaau e ishi misimeyihtahkwaau anichii ekaa kaa ayaatwaau aspeyimuwiniyuu.

¹⁴ Chitaapwehtenaanuu e chii nipit Jesus kaye maak e chii wanishkaanaakanuut. Eukw maak uu wehchi taapwehtamukw Chishemanituu miin peshuwaate Jesus che asich peshuwaat kaye aniyuuh aweyuuh kaa nipiyich e chii taapweyimaayich Jesus.

¹⁵ Chiyaanuu eshkw che pimaatisiihkw takushihke Jesus namui niikaan chika uhchi nachishkawaanuu eshkw ekaa nachihaatwaau anichii shaash kaa nipitwaau kaa taapwehtahkwaau. Uu kaa ishi wiihtamaataahch wiya Utipeyihchikeu chii iteu uyuu.

¹⁶ Utipeyihchikeu chika pechi aasiyuu kihchikiishikuhch uhchi e chishewet e tepwet. Kaye maak an kaa niikaanishkuwaat enchil kata pehtaakusuu e tepwet kaye maak Chishemanituu upuutaachikan kata pehtaakuniyuu. Ekw anichii kaa nipitwaau e chii taapweyimaatwaau Christ wiyawaau niishtam kata uhpiskaauhch.

¹⁷ Ekw maak chiyaanuu eshkw kaa pimaatisiikw utah aschiihch che uhpiskaayihkw chechii nachahahkwaau anite kaskawanishkuhch uchii niishtam kaa uhpiskaatwaau. Ekw maak Utipeyihchikeu maamuu che ishi nachahiikw anite muushe chiishikuhch. Utipeyihchikeu maak e ihtaat ekute kaachiche che ihtaayihkw.

¹⁸ Kaachiichihiitukw maak e waawiihtamaatuyekw taan kaa itweyaahch.