1 Thessalonians 3 - Chishemanituu Utayimuwin: Kaa Uskaach Testament

Taan kaa ishi miywaapatisit Timothy tesalwaaniyaahch

¹ Ekw maak iskutak ekaa uhchii ihtiyiaahch ekaa chechii waapamitaahch ekw kaa wiyeyihtamaahch utah Athens chechii ihtaayaahch

² ekw Timothy kaa itishahuchiht anite e ihtaawekw. Uu chiichishaanuu niwiichi aapatisiimakunaan Chishemanituuh e atushkaamachiht kaye wiya e waawiihtahk miywaachimuwiniyuu e tipaachimaakanuyich Christ. Nichii itishahwaanaan chechii wiichihiitaakw etituu chechii suuhchikaapuwekw taan e ishi taapweyimekw Christ

³ ekaa waach peyakw e tashiyekw chechii chiiwekaapuuyekw an e nanehkaachihiikuyekw Christ uhchi. Chiyawaau niyaanitam chichischeyihtenaawaau ekun kaye kaa ishi wiyeyihtahk Chishemanituu, chechii nanehkaachihiikuuhkw e nuushuushkuumahkw Jesus.

⁴ Wesh eshkw anit e ihtaayekw e chii ihtaayaahch shaash niyaakan chichii wiihtamaatinaan che utihchipayihch e nanehkaachihiikuyikw. Ekun maak mwehch taapwe kaa ispayihch mwehch e ishi chischeyihtamekw ekw.

⁵ Eukw maak aniyuu wehchi yaaitei chii itishahuukw Timothy anite e ihtaawekw. Iskutak ekaa kaa chii ihtiyaan ekaa chischeyimitakuch taan e ispayiyekw ekw kaa itishahuuk Timothy anite e ihtaawekw chechii nituu chischeyimitaahch taan e ispayiwekwe e taapweyimekw Christ. Nichii sechisin chechii ihtuutaataakw machimanituu chechii puuniiwekw e taapwehtamuwekw sheshkwaaht chechii ishinaakuhch taan kaa ishi atushkuwachiht Utipeyihchikeu anite e ihtaayekw.

⁶ Ekw maak e chii pechi takushihk Timothy anite e ihtaawekw e uhtuhtet kaye maak e chii miyu aayimuutamuyimiht chitaapwehtamuwinawaayuu kaye chisaachihiiwewinawaayuu, eyuu nichii wiihtamaakunaan muush e miyu chischisitutawiyaahch kaye naashch e wii waapamiyaahch mwehch niyaan waa ishpish wii waapamitaahch.

⁷ Ekw maak an mekwaach e mukushkaateyihtamipayaahch kaye e nanehkaateyimuyaahch nichii uhpinikuwaanaan nipimaatisiiwinaahch uyuu kaa itaachimitaakw. Naashch nikaachiichihiikunaan e pehtamaahch taan e ishi taapweyimekw Christ.

⁸ Ekw maak mwehch e uschihiikuyaahch nipimaatisiiwinaahch nititeyihtenaan e chischeyimitaahch eshkw yaapach e suuhchikaapuuyekw e wiichewekw Utipeyihchikeu.

⁹ Taanite maak chechii uhchi tep nanaaskumachiht Chishemanituu chiyawaau uhchi an e ishpish naashch miyeyihtamihiyaahch iskutak e ayimihiichiht Chishemanituu.

¹⁰ Kanawaach nitutamuwaanaan Chishemanituu chechii waapamitaahch miin chechii ihtaayaahch anit e ihtaayekw ekw maak chechii wiichihiitaach taan eshkw e ishi nuuhtepayiyekw taapwe chechii taapweyimekw Christ taan chipaa ishi taapweyimaawaau.

¹¹ Eukw maak uu e ishi ayimiheshtamaataahch, nitutamuwaanaan Chishemanituu Kuuhtaawiinuu ekw maak Utipeyihchikeu Jesus chechii nihiipayihtaatwaau miin chechii nituwaapamitaahch.

¹² Nitutamuwaanaan Utipeyihchikeu chechii ihtuutaataakw wetaach chechii saachihiituwekw kaye kutak aweyuuh wetaach chechii saachihiimekw, chechii ati ishpish saachihiituyekw kaye chechii ati ishpish saachihekuch kutakach awenichii muyaam niyaan e ishpish saachihiitaahch.

¹³ Ekut che uhchi maskuuhiitaakw ekw maak kuiskw che ishi pimaatisiyekw kaye che payehchi pimaatisiyekw iskutak uhchishkuukaapuushtawekwe Chishemanituu Kuuhtaawiinuu takushihke Utipeyihchikeu Jesus Christ e pechi wiichewaat misiwe aniyuuh kaa taapwehtamiitwaauh.