1 Thessalonians 2 - Chishemanituu Utayimuwin: Kaa Uskaach Testament

Taan kaa itaapatisit Paul mekwaach Thessalonicahch kaa ihtaat

¹ Niichishaanitikw, chiyawaau niyaanitam chichischeyihtenaawaau ekaa sheshkwaaht uhchi ituhtewaahchipane anite e ihtaayekw.

² Chichischeyihtenaawaau taan kaa ishi nanehkaachihiikuyaahch kaye taan kaa ishi maayeyimikuyaahch anite Philippi kaa ishinihkaatech ihtaawin iskutak che takushiniyaahch anit e ihtaayekw. Yaapach maak nichii ihtuutaakunaan Chishemanituu ekaa chechii kushtaachuwachiht e waawiihtamuwachiht aniyuu miywaachimuwiniyuu wiya kaa miitahkw aat e chii ihtaatwaau awenichii anit e ihtaayekw suuhk e chii kuchihtaatwaau chechii chipihchihiyimihtwaau.

³ Iskutak kaa wii cheshtinaachimitaahch taan e ishi taapwemakahch miywaachimuwin namui chuuhchi nanatayimitinaan. Namui nitamukw nuuhchi aihtinaan kaye namui chuuhchi wii wiyeshihiitinaan anit chechii uhchi taapwehtamekw miywaachimuwin.

⁴ Teyakuch muush mikw taan e ishi nituweyimiyimiht Chishemanituu chechii ishi waawiihtamuchiht ekun e ishi waawiihtamaahch, wesh wiya nichii iteyimikunaan e taapweucheyihtaakusiyaahch chechii aapatisiihkahtamuchiht miywaachimuwiniyuu. Ekw maak wiyaawiihtamaahch namui wii naapeu e wii naheyihtamihiichiht, Chishemanituu eukw chechii naheyihtamihiichiht wesh wiya chinituu chischeyimikunuu taan e ihtuuhkw.

⁵ Sehchei chichii ayimihiitinaan ekaa uhchi nituweyihtamaataahch chekwaan. Chiyawaau niyaanitam chichischeyihtenaawaau uu. Chishemanituu chischeyihtam e taapweyaahch uu kaa itweyaahch.

⁶ Taapaa nuuhchi naanituuweyihtenaan naashch chihchiwe chechii iteyimiyaahch maak kutakach awenichii naashch chihchiwe chechii iteyimiyamihtwaau. Aat e chii ihtakuhch ekaa wiyesh chipaa uhchi ishinaakun pukuseyimitaach chekwaan apastalach e itaapatisiyaahch,

⁷ chichii wii manaachihiitinaan mwehch e ishi manaachihaat ukaawiimaau utawaashiim.

⁸ An maak naashch e saachihiitaahch shaash nichii ayeskuweyimunaan namui mikw chechii waawiihtamaataahch miywaachimuwin. Nichii pachishteyihtamihiikunaan kaye nipimaatisiiwinaanh chechii wiichihiitaahch kaa ishpish chii saachihiitaahch.

⁹ Niichishaanitikw, cheshtinaash chichischisinaawaache taan kaa ishpish mistaapatisiyaahch anit e ihtaayekw. Nichii aapatisinaan e chiishikaach kaye e tipiskaach niyaan chechii pimipayihiisuyaahch ekaa chechii kusikushkaakuyekw e iteyihtamekw chechii pechi pimipayihiyaahch mekwaach e waawiihtamaataahch Chishemanituu umiywaachimuwin.

¹⁰ Chishemanituu chischeyihtam kaye maak chiyawaau chichischeyihtenaawaau taan kaa ishi chii payehchi pimaatisiyaahch, taan kaa ishi chii kuiskutaatisiyaahch kaye ekaa uhchi ihtakuhch chechii aataameyihtaakusiyaahch chechii machipimaatisiyaahch mekwaach anit chiyawaau kaa taapwehtamekw miywaachimuwin e ihtaayekw kaa ihtaayaahch.

¹¹ Chichischeyihtenaawaau taan kaa ishi waawiichihiitaahch muyaam uhtaawiimaau e ishi waawiichihaat utawaashiim.

¹² Suuhk chichii aashihchimitinaan. Chichii kaachiichihiitinaan kaye chichii siihchimitinaan chechii ishi pimaatisiyekw taan e ishi naheyihtamihiikut Chishemanituu e ishi pimaatisiinaanuyich. Wesh wiya Chishemanituu chiwiishaamikuwaau chechii wiichihiiweyekw anite kaa chisteyihtaakuniyich uchisheuchimaawinihch.

¹³ Mwaau miin wehchi muush nanaaskumachiht Chishemanituu. Iskutak kaa pechi waawiihtamaataahch taan kaa ishi miikuyaahch Chishemanituu chechii ishi waawiihtamaahch yaakwaau chichii nituhtenaawaau kaye maak chichii taapwehtenaawaau. Namui wii naapeu utayimuwin chuuhchi iteyihtenaawaau maak Chishemanituu utayimuwin. Taapwe maak Chishemanituu uyuu utayimuwin. Ihtakun maak e ishi aapatisiimakahch chipimaatisiiwiniwaahch an kaa ishi waawiihtamaataahch.

¹⁴ Niichishaanitikw, ekun mwehch kaa ispayiyekw taan kaa ispayiyich Chishemanituu utiiniim anite Judea kaa ishinihkaateyich aschiiyuu kaa ihtaayich, anichii Christ kaa wii chischinuwaapamaatwaau. Ekun mwehch kaa ishi nanehkaateyimuhiitaakuch tipiiwe chitiiniimuwaauch taan kaa ishi nanehkaateyimuhiikutwaau utiiniimuwaauh kaye wiyawaau anichii Jewa kaa itiskaanesitwaau.

¹⁵ Anichii Jewa kaa itiskaanesitwaau eukw anichii kaa nipahaatwaau Utipeyihchikeu Jesus ekw maak aniyuuh uchischiwehiichesuuh. Kaye niyaan maak nichii nanehkachihiikunaanich. Naashch taapwe namui naheyimikuuch Chishemanituuh. Kaye maak misiwe aweyuuh uhkaateuch.

¹⁶ Waawaach nichii wii chipihchihiikunaanich e waawiihtamuumichiht aniyuuh ekaa Jewa kaa itiskaanesiyich aniyuu miywaachimuwiniyuu che pimaachihiikuyich. Ekut wehchi tepipayihtaatwaau taan muush kaa ishi pechi wanituutahkwaau. Ekw maak wetihchipayiyich chechii chishuwaahaatwaau kaye chechii waweshihiikutwaau Chishemanituuh.

Paul kaa wiihtamuwaat aniyuuh Thessalonica kaa ihtaayich naashch miin e wii waapamaat

¹⁷ Niyaan maak wii, niichishaanitikw, iskutak weipishchiish kaa iichetishahukuyaahch anit e ihtaayekw naashch taapwe chichii chischisiitutaatinaan kaye suuhk nichii kuchihtaanaan miin chechii pechi nituwaapamitaahch. Wesh mikw muhch nichii iichenikunaan anit e ihtaayekw.

¹⁸ Miin chichii wii nituwaapamitinaan. Niya Paul mihchetwaau nichii kuchihtaan chechii nituwaapamitaahch anite e ihtaayekw, mikw maak muush nichii nakaahukunaan machimanituu.

¹⁹ Naashch maak miin chichii wii waapamitinaawaau wesh chiyawaau e ihtaayekw uhchipayuu chechii ayaayaahch aspeyimuwin. Chiyawaau e ihtaayekw uhchipayuu wehchi muuchicheyihtamaahch. Kaye maak chiyawaau e ihtaayekw uhchipayuu naashch chechii cheshtinaateyimuyaahch chechii aayimuutamaahch taan kaa ishi pechi miywaapatisiyaahch iskutak takushihke Chitipeyihchikeminuu Jesus.

²⁰ Taapwe kiipaa chimaamihchihiinaan kaye chiyawaau chitihtuutuunaan wehchi muuchicheyihtamaahch.