1 Thessalonians 1 - Chishemanituu Utayimuwin: Kaa Uskaach Testament

¹ Niyaan Paul, Silas, ekw maak Timothy, chimasinahamaatinaan chiyawaau umaamuuayimihaauch anite Thessalonica kaa ihtaayekw Chishemanituu Uhtaawiimaau ekw maak Utipeyihchikeu Jesus Christ kaa tipiweusiitutaataakw. Chitayimiheshtamaatinaan Chishemanituu chechii chishewaach miyutuutaataakw kaye chechii miitaakw chiyaameyihtamuwiniyuu.

Paul kaa nanaaskumut aniyuuh kaa taapwehtamiyich uhchi

² Muush nanaaskumaanaan Chishemanituu misiwe chiyawaau uhchi kaye muush chichischisiitutaatinaan tahtwaau e ayimihiichiht Chishemanituu.

³ Nichischisinaan e ayimihiichiht Chishemanituu taan e ishi miyu atushkaatuyekw e taapweyimekw Utipeyihchikeu. Nichischisinaan taan e ishi miywaapatisiyekw e saachihekw Jesus. Nichischisinaan kaye taan e ishi suuhchikaapuuyekw e aspeyimututawekw Chitipeyihchikeminuu Jesus Christ.

⁴ Chiyawaau niichishaanaanich, nichischeyihtenaan Chishemanituu e saachihiitaakw kaye e chii wiyaapamitaakw wii chechii ayaautaakw.

⁵ Iskutak kaa waawiihtamaataahch miywaachimuwin namui mikw nuuhchi ayiminaan maak eyuu chichii waapahtenaawaau suuhkaatisiiwin Kaa payehchisiit Ahchaahkw uhchi. Kaye maak eukw an kaa ihtuutaataakw tekash chechii taapwehtamekw e taapwemakahch taan kaa ishi wiihtamaataahch. Chichii chischeyiminaan taan kaa itaatisiyaahch anit e ihtaayekw kaa ihtaayaahch anit e chii uhchi wii wiichihiitaahch.

⁶ Taan kaa ishi waapamiyaahch e itaatisiyaahch ekun kaye chiyawaau kaa ati itaatisiyekw. Ekw maak eyuu Utipeyihchikeu kaa ati naspituwekw. Aat maak naashch e chii nanehkaachihiikuyekw yaapach chichii ihtuutaakuwaau Kaa payehchisiit Ahchaahkw chechii muuchicheyihtamekw e utinamaasuyekw miywaachimuwin.

⁷ Ekw maak taan kaa ishi pimaatisiyekw misiwe anichii kaa taapwehtahkwaau anite Macedonia ekw maak Achaia kaa uhchiitwaau chichii chischinuwaapamikuwaauch taan e itaatisiiwekw.

⁸ An maak kaa waawiihtamekw Utipeyihchikeu umiywaachimuwin namui mikw anite Macedonia ekw maak Achaia chuuhchi pehtaakuhtaanaawaau mishihte chii pehtaakun e taapeyimekw Chishemanituu. Namui maak nituweyihtaakun chechii aayimuutamuchihtwaau awenichii wesh shaash chischeyihtamuuch.

⁹ Taanite mikw kaa ati ituhteyaahch aayimuutamuch awenichii e chii pehtahkwaau taan kaa ishi miyukuuyaahch chiyawaau Thessalonica kaa uhchiyekw kaa nituwaapamitaahch. Aayimuutamuch kaye taan kaa ishi puuniiwekw e nuuchiishtuwekw manituuhkaanh chechii chihchi nanihiihtuumekw kaye chechii atushkuumekw aniyuuh taapwe Cheshemanituyich kaye taapwe pemaatisiyich,

¹⁰ eyuu maak e ashuwaapamekw Chishemanituuh Ukusiyuuh miin kaau chechii takushiniyich kihchikiishikuhch uhchi. Eukw uyuuh Ukusisa kaa wanishkaanaat nipuwinihch uhchi. Eukw maak uu Jesus kaa pimaachihiitahkw ekaa chechii waweshihiikuuhkw Chishemanituuh wiyaaskunicheu chiishikaayiche.