1 Peter 5 - Chishemanituu Utayimuwin: Kaa Uskaach Testament

Kaa niikaanishkahkwaau ayimiheukamikw ekw maak uschiniichuuch

¹ Maauyuu waa itakwaau anichii kaa wiichihiiwetwaau e pimipayihtaakanuyich ayimiheukamikuyuu anit e ihtaayekw kaa ihtaatwaau wesh kaye niya niwiichihiiwen e pimipayihtaakanuuhch ayimiheukamikw. Nika chii tipaatutamuwaan kaye taan kaa ishi nanehkaateyimuhaakanuut Christ kaye maak nika chisteyihtaakuhiikuun kaye niya iskutak nuukuhtaakanuwiiche anit Christ che chisteyihtaakuhaakanuut. Maauyuu waa itakwaau,

² miyu kanuweyimuumaahkw aniyuu iinuu Chishemanituu kaa miitaakw chechii niikaanishkuumekw muyaam kaa chii ishi miyu kanuweyimaat umaanishchaanishim an kaa kanumaanishchaanishuwet. Miyu kanuweyimuumaahkw muyaam taan e ishi nituweyimitaakw Chishemanituu chechii ishi kanuweyimekw. Ekaawii muyaam aisaach kaa ihtuutahk awen chekwaayuu chika uhchi ishinaakusinaawaau uu taan e itaapatisiyekw. Ihtuutamukw chitaapatisuwinawaau namayeu mikw e kanawaapahtamekw taan che ishi uhtisiyekw maak mitun tekash e iteyihtamihiikuyekw taan chechii ishi wiichihekuch anichii kaa miikuyekw chechii naanaakachihekuch.

³ Ekaawii wii ishinaakusikw naashch chechii wii uchimaahkahtuwekuch anichii kaa miikuyekw chechii niikaanishkuwekuch teyakuch uste wii miyutuutawaahkuch che ihtakuniyich maak anit chechii uhchi chischinuwaapamitaakuch.

⁴ Ekw maak iskutak pechi nuukusite an maauch kaa niikaaneyihtaakusit maanishchaanishuiinuu che miikuyekw an maauch e chisteyihtaakuhch kaaniyuwin an ekaa wiiskach che uhchi paasikunaakuhch.

⁵ Ekw maak chiyawaau kaa uschipimaatisiyekw chipaa nanihiihtuwaawauch anichii kaa wiichihiiwetwaau e pimipayihtaakanuyich ayimiheukamikuyuu. Misiwe maak e tashiyekw chipaa atushkaatunaawaau e tipihteyimitisuyekw wesh itashteyuu Chishemanituu utayimuwin, Chishemanituu namui nahaapameu aniyuu chihchiwe kaa iteyimisuyich, ekw aniyuu kaa tipihteyimisuyich chishewaatutaweu.

⁶ Tipihteyihtaakuhiisukw maak e nanihiihtuwekw Chishemanituu an kaa suuhkaatisiit, wesh chika uhpinikuwaau taanit iteyihtahke wiya che uhpinitaakw.

⁷ Wiya pachishtinamuu misiwe taan e ishi mukushkaatiskaakuyin chekwaan wesh wiya muush chinanaakatuweyimukw misiwe taan e ispayihiikut chekwaayuu chipimaatisiiwinihch.

⁸ Muush yaakwaamiishtuwaahkw machimanituu, an muush kaa wii naanituu machipayihiikuyekw, wesh muyaam mistatim muush kaa papaamuhtet e papaanemut e naanituu miichisut ekun e ishinaakusit. Machimanituu muush naanituuweyimeu aweyuu chechii wanaachihaat.

⁹ Nishkuushtuwaahkw maak machimanituu. Yaaichikaapuukw chitaapwehtamuwinawaach ishi wesh chichischeyihtenaawaau anichii chiichishaanuwaauch kaa taapwehtahkwaau ekun kaye wiyawaau e ishi nachishkahkwaau nanehkaachihiiwewiniyuu utah aschiihch muyaam kaye chiyawaau kaa ishi nachishkamekw.

¹⁰ Iskutak maak chiishi nanehkaateyimuyekwe chika ihtuutaakuwaau Chishemanituu miin chechii wiikaapuwekw, chika miikuwaau maskuushiiwiniyuu, chika yaaichikaapuuhiikuwaau, kaye chika sakascheyimuhiikuwaau. Chishemanituu an kaa ayaat misiwe shaweyihchichewiniyuu chiwiishaamikunuu chechii wiichihiiweyihkw anite kaachiche uchisteyihtaakusuwinihch Christ e ihtaayich uhchi.

¹¹ Wiya maak Chishemanituu kaachiche ayaau misiwe suuhkaatisiiwiniyuu. Amen.

Paul maahchishtai kaa ishi wachiyemaat uyuuh wiichishaanimaauh

¹² Ihtaau peyakw niichishaan e taapweucheyihtaakusit e iteyimak. Silas ishinihkaasuu. Eukw uu kaa wiichihiit uyuu apishiish e masinahamaatakuch. Uu maak kaa masinahamaatakuch chiwii siihchimitinaawaau chechii yaaichikaapuyekw kaye chiwii cheshtinaateyihtamihiitinaawaau eukw uyuu taapwe Chishemanituu ushaweyihchichewin kaa aayimuutamaataahch. Ekut maak anit ushaweyihchichewinihch ishi yaaichikaapuwaahkw.

¹³ Chiwaachiyemikuwaauch anichii kaye wiyawaau kaa wiyaapamikutwaau Chishemanituu anite Babylon kaa ihtaatwaau. Kaye Mark nikus kaa iteyimak chiwaachiyemikuwaau.

¹⁴ Waachiyemitukw e nuukuhtwaatuyekw e saachihiituyekw. Chiyaameyihtamuwin chika wii ayaanaawaau misiwe chiyawaau Christ kaa tipeyimitaakw.