1 Peter 4 - Chishemanituu Utayimuwin: Kaa Uskaach Testament

Chipimaatisiiwinawaau kata kweschinaakun

¹ Christ maak e chii waawiisacheyihtahk wiyaasuwinihch mekwaach utah aschiihch kaa pimaatisiit kaye chiyawaau ekun chipaa ishi maamituneyihtamihiikunaawaau chechii ishi ayeskuwiishtamekw, wesh an awen kaa waawiisacheyihtamihaakanuut wiyaasuwinihch puunihtaau machaatisiiwiniyuu.

² Ekw maak taan eshkw che ishpish pimaatisiikwe utah aschiihch namui ekw chipaa uhchi tipeyimikuu wiya taan e ishi mushteneyihtahk tipiiwe chechii itaatisiit maak uste Chishemanituu taan e ishi nituweyimikut eukw aniyuu chipaa wii nanaakatuweyihtamihiikuu chechii ihtuutahk.

³ Wesh ispayuu ekw taan kaa ishpish chii pechi machaatisiyekw anite utaahch muyaam anuhchiish taan e ishi machaatisiitwaau anichii ekaa kaa taapwehtahkwaau. Wiinisuuwinihch chichii ishi pimaatisiinaawaau, naashch chichii tipeyimikunaawaau nanaahkuu machi nituweyihtamuwinh. Kaye naashch chichii miyeyihtenaawaau e minihkweyekw, chichii miyeyihtenaawaau e wiichihiiweyekw anite e minihkwaanuuhch kaye anite e wiinisinaanuuhch, chichii nuuchiishtuwaawaauch kaye naashch e machinaakusitwaau manituuhkaanich.

⁴ Naashch maak chimiskaateyimikuwaauch anichii ekaa kaa taapwehtahkwaau ekaa wiichewekuch aniyuu e aahkwaateyihtaakusitwaau e ishi pimaatisiitwaau ekw maak naashch waa maamaayeyimitaakuch.

⁵ Peyakwaau maak e chiishikaayich chika uhchishkuukaapuushtaweuch Chishemanituu e wiihtahkwaau taan kaa ishi pechi pimaatisiitwaau. Eukw wesh uu Chishemanituu che wiyaaskunaat misiwe aniyuu kaa nipiitwaauh kaye aniyuu kaa pimaatisiitwaauh.

⁶ Eukw maak uu eyuu anichii kaa nipitwaau wehchii waawiihtamuwaakanuutwaauh uyuu miywaachimuwiniyuu chechii wiyaaskunaakanuutwaau aniyuu taan kaa ishi pimaatisiitwaau misiwe aweyuu taan e ishi wiyaaskunaakanuyich, chii waawiihtamamuwaakanuuch uyuu miywaachimuwiniyuu chechii ayaatwaau ahchaahkw pimaatisiiwiniyuu Chishemanituu ishi e ihtaayich.

Kuiskw ishi aapachihtaawaahkw Chishemanituu umiiwewinh

⁷ Shaash peshunaakun misiwe chekwaan che iskwaapayihch. Chinituweyihtaakusinaawaau chechii ishi nanaakatuweyihtamekw taan e ihtiyekw kaye ashuwaapikw e ayimihaayekw.

⁸ Maauch maak e iteyihtaakuhch eukw uu chihchiwe chechii saachihiituyekw misiwe e tashiyekw wesh saachihiiwewin wepeyihtamuumakan mihchetu machihtwaawinh.

⁹ Maamiiskuch mamiyuutuutaatukw, miyeyihtamukw uu e ishi wiichihiituyekw.

¹⁰ Misiwe paahpeyakw awen ihtakuniyuu taan e ishi miikut Chishemanituu kaschihuwiniyuu. Eukw maak uyuu kaschihuwiniyuu chipaa aapachihtaau e waawiichihaat kutak aweyuuh, e aashuu miyaat aweyuuh Chishemanituuh ushaweyihchichewiniyuu.

¹¹ Awen e chii miikut Chishemanituu chechii ayimit chipaa ayimuu taan aniyuuh e ishi miikut Chishemanituu chechii ishi ayimit. An awen kaa miyaakanuut kaschihuwiniyuu chechii wiichihaat kutak aweyuu kiipaa chipaa wiichiheu taan e ishi miikut Chishemanituu kaschihuwiniyuu. Ekw maak wiya Chishemanituu che chisteyihtaakuhaakanuut misiwe chekwaayuu taan e ishi ihtuutahk anite Jesus Christ e ihtaayich ishi, wiya Chishemanituu ekaa nihtaa che iskwaapayich uchisteyihtaakusuwin kaye umaskuusiiwin. Amen.

Kaa taapwehtahkwaau awenichii e nanehkaateyimuhaakanuutwaau

¹² Niichishaanitikw kaa saachihiitakuch ekaawii mamukushkaateyihtamihiikuukw taan e ishi mista aayimihch e ishi kakwechihiikawiyekw mwehch chekwaan e utihtahukuyekw e maaniteweyihtaakuhch chechii iteyihtamekw.

¹³ Teyakuch chipaa miywaatenaawaau e wiichihiiweyekw taan kaa ishi waawiisacheyihtamihaakanuut Christ, ekw maak che saakaschineshkaakuyekw miywaatamuwin iskutak pechi nuukuhtaakanuyiche uchisteyihtaakusuwin.

¹⁴ Wesh chiishpin maayeyimikuyekwe Christ e nuushuushkuwekw, chishaweyihtaakusinaawaau wesh ekut wehchi chischeyihtaakuhch taapwe e wiicheutaakw kaa chisteyihtaakusit Ahchaahkw, Chishemanituu Utahchaahkwa.

¹⁵ Ekaawii maak awen anit e tashiyekw chika uhchi nanehkaateyimuu aniyuu uhchi e nipahiiwet, maak e chimutiskuukwe, maak e machiinuut, maak aniyuu uhchi e utamiit kutak aweyuuh e ihtaayich.

¹⁶ Maak chiishpin niyehkaachihuuwekwe e nuushuushkuwekw Christ ekaawii chika uhchi pimaameyimunaawaau. Chipaa nanaaskumaawaau Chishemanituu Christ e ayaautaakw.

¹⁷ Wesh shaash utihchipayuu che wiyaaskunaat Chishemanituu utiiniim. Chiishpin maak chiyaanuu kaa taapwehtamukw niishtam che wiyaaskunikuwaauhkwe, eishimaa kata ispayuuch anichii ekaa kaa wii nanihiihtamuwaatwaau Chishemanituu umiywaachimuwiniyuu.

¹⁸ Itashteu Chishemanituu utayimuwinihch, Chiishpin wanaaush che pimaachihaakanuwaakwenich anichii kaa kuiskutaatisiitwaau, taan che ispayitwaau wii anichii umachihtwaauch kaye anichii ekaa kaa manituuwaatisiitwaau ekaa kaa wii nanihiihtuwaatwaau Chishemanituu.

¹⁹ Ekw maak anichii awenichii kaa nanehkaateyimutwaau Chishemanituu e chii pachishtinamiyich uyuu chechii ispayitwaau yaapach chipaa ihtuutamuch aniyuu taan e ishi kuiskunaakuniyich kaye tekash chipaa taapweucheyimeuch Chishemanituu aniyuu kaa ushihiikutwaau, aniyuu ekaa nihtaa che uhchi puuniyich e wiichihiikutwaau.