1 Peter 3 - Chishemanituu Utayimuwin: Kaa Uskaach Testament

Naapeuch ekw maak iskweuch kaa niipuutwaau che ishi chisteyimitutwaau

¹ Mwehch maak kaye chiyawaau iskweutikw kaa niipuuyekw chipaa nanihiihtuwaawaauch chinaapemuwaauch. Wesh uu ihtiyekwe chika chii ishinaakuniyuu pasch chechii ati taapwehtahkwaau waapamitaakwenich taan e ishi kuiskupimaatisiiwekw, aat ekaa chistutekwenich chechii taapwehtahkwaau.

² Wesh waapamitaakwenich e payehchi pimaatisiiwekw kaye e chisteyimekw Chishemanituu eukw uyeyuu che wiichihiikutwaau chechii taapwehtahkwaau.

³ Namui naashch chipaa uhchi aapateyihtamihiikunaawaau taan che ishinaakuhiisuyekw utah uschich, muyaam taan che itawehamaayekw maak chekwaan che waweshihuwaacheyekw, maak kaye taan che itaaspisuyekw.

⁴ Uste iteyihtaakun kuiskw chechii ishi pimaatisiyekw kaye maak chechii chiyaamaatisiyekw chechii uhchi miyunaakusiyekw. Eukw uyuu maauch miyunaakusit iskweu e ishi pimaatisit kaye maak eukw uyuu e ihtuutaakut muush chechii miyunaakusit. Eukw uyuu maauch meyuunahk Chishemanituu iskweuh chechii ishi pimaatisiyich.

⁵ Wesh ekun kaa ishinaakusitwaau anichii kaa payehchi pimaatisiitwaau iskweuch anite weskach, anichii kaa aspeyimitutawaatwaau Chishemanituu. Chii nanihiihtaweuch unaapemuwaau.

⁶ Mwehch aniyaa Sarah kaa ishinaakusit, eukw an peyakw kaa aayimuumaakanuut e chii nanihiihtawaat uwiichimaakan Abraham, nuuchimaam e chii ishinihkaataat. Eukw maak uu Sarah weutaanisitutaataakw chiishpin kuiskw e ihtiyekw kaye ekaa kushtamekw chekwaan.

⁷ Ekun maak kaye chiyawaau kaa niipuuyekw naapeutikw che ihtiyekw. Suuhk wii nanaakatuweyimaahkuch chiichiskweuwaauch e wiichimekuch e chischeyimekuch ekaa ishpish suuhchisiitwaau chiyawaau e ishpish suuhchisiiwekw. Chihkaateyimaahkuch wesh kaye wiyawaau chika aanische miyaakanuuch kaachiche pimaatisiiwiniyuu mwehch chiyawaau che ishi miikuyekw. Ihtuutamukw uu e itashumitakuch ekaa chekwaan chechii chipishkaakuyekw e ayimihekw Chishemanituu.

E nanehkaateyimut awen e miyutuutahk

⁸ Uu maak misiwe kaa ishi aayimuutamaatakuch misiwe e tashiyekw suuhk peyakunihch ishi maamituneyihtamukw e chishtimaacheyimituyekw kaye. Saachihiitukw taapishkuuch e wiichishaanihtuyekw kaye kachishewaatutaatukw. Suuhk muush tipihteyimukw.

⁹ Ekaawii yaaitei wii taapishtaa awen e wanituutaask maak e mamaayeyimisk. Yaapach uste miyutuutamuu kaye ayimihchike chechii shaweyimikut Chishemanituu wesh eukw uu kaa ishi wiyaapihtaakanuuhch chipimaatisiiwin chechii ishinaakuhch. Ekut chechii uhchi aanische miikawiyin shaweyihchichewin.

¹⁰ Wesh itashteu masinahiikanihch, Awen taapwe waa miyeyihtamukwe e pimaatisiit kaye pekuseyimukwe chechii mamiyuupayit ekaawii kata uhchi machi ayimuu kaye ekaawii kata uhchi wiihchi nanatayuu.

¹¹ Ekush kata puuniyuu e machituutahk. Uste muush chika wii miyutuutamaacheu. Suuhk katawii aahchiishtam chechii wiichihaat misiwe wiichishaanimaauh muush chechii miyu wiicheutuyich.

¹² Wesh Utipeyihchikeu miyu kanuweyimeu aniyuu kaa kuiskupimaatisiyich kaye nituhtuweu iskutak e ayimihaayich, ekw aniyuu kaa machaatisiyich namui nahaapameu. Eukuu e itashtech masinahiikanihch.

¹³ Awen maak chechii wiyesh ihtuutaataakw an uhchi suuhk e iteyihtamihiikuyekw chechii miyutuutamekw.

¹⁴ Aat ishinaakuhch chechii nanehkaachihiikuyekw e kuiskutaatisiyekw uhchi, chika shaweyimikuwaau Chishemanituu. Ekaawii kakushtaahkuch wiyesh e wii ihtuutaataakuch awenichii, ekaawii chika uhchi mukushkaateyihtenaawaau,

¹⁵ chisteyimaahkw Utipeyihchikeu Christ chitehiiwaahch. Muush chipaa ayeskuwiinaawaau taan chechii ishi nishkweushihekuch anichii kaa wii naanituu chischeyihtahkwaau aniyuu aspeyimuwiniyuu kaa piihchishkaakuwekw. Chiyaam mikw wiihtamuwaahkuch awenichii uyeyuu kaye yaapach chisteyimaahkuch.

¹⁶ Suuhk muush kuiskw wii ishi pimaatisiikw mitun chechii cheshtinaahuyekw ekaa machituutamekw. Uu ishinaakusiyekwe ekut che uhchi papimaameyimutwaau anichii kaa maayeyimitaakuch, anichii kaa machaayimuumitaakuch e kuiskupimaatisiiwekw Christ e nuushuushkuumekw.

¹⁷ Nanehkaateyimuyine an uhchi e miyutuutaman, Chishemanituu maak e pachishtinahk uyuu chechii ispayuut, uste miywaau e nanehkaateyimuyin e miyutuutaman ishpish wii chechii nanehkaateyimuyin e machituutaman.

¹⁸ Wesh Christ peyakwaau chichii nipistamaakunuu machihtwaawinihch uhchi chechii uhchi peshiitahkw Chishemanituu e ihtaayich. An kaa kuiskutaatisiit chii nipistamuweu aniyuu ekaa kaa kuiskutaatisiyich. Taapwe kiipaa muhch chii nipahtaakanuuyuu wiiyuu mikw maak chii ihtuutawaakanuuyuu utahchaahkuwa yaapach chechii pimaatisiyich.

¹⁹ Ahchaahkuwinihch maak chii ishi nituu kacheschimeu aniyuuh ahchaahkwa kaa chipahwaakanuyich. Eukunich uchii aniyehkaanaanich kaa pimaatisiitwaau mekwaach aniyaanaa Noah kaa ushihtaat chiimaaniyuu e mishaayich.

²⁰ Namui uhchi nanihiihtuwewaakupanenich Chishemanituu, mikw maak chii siipiiwesiistaakuuch Chishemanituu. Mikw yaanaaneu awenichii chii puusuuch aniyuu chiimaaniyuu, chii pimaachihiikuuch maak Chishemanituuh anit aniyuu kaa aschiputeyich.

²¹ An maak nipii, mwehch siikahaahtaachewin chii ishinaakun, siikahaahtaachewiniyuu maak eukw pemaachihiikut awen kaa taapwehtahk. Mikw maak e siikahaahtuwaakanuut awen namui wiiyuu chishtaapautaakanuuyuu. Nuukuhtaau Chishemanituuh e itaat taapwe Christ che nuushuushkuwaat. Pimaachihiikuu e siikahaahtuwaakanuut aniyuu uhchi Jesus Christ e chii wanishkaanaakanuyich nipuwinihch uhchi.

²² Eukw uu Christ kihchikiishikuhch kaa ishi uhpiskaat kaye kaa waaweyipahiikut Chishemanituu unihiiwiniihch itehche anit maauch e chisteyihtaakuniyich chechii apit awen. Ekut maak kaa miyaakanuut chechii uchimaahkahtuwaat misiwe enchil kaye chechii tipeyihtahk misiwe kihchikiishikw tipeyihchewiniyuu kaye misiwe suuhkaatisiiwiniyuu.