1 Peter 2 - Chishemanituu Utayimuwin: Kaa Uskaach Testament

Muyaam e pimaatisiitwaau asiniich chitishinaakusinaanuu

¹ Tekash maak ekw puunihtaakw misiwe maayaatisiiwin. Puuniikw ekw e nanatayekw, kaye ekaawii wii iteyihtaakuhiisukw taan an ekaa chihchiwe iteyihtaakusiyekw, ekaawii chika uhchi ihtakun e wauhteyimituyekw. Kaye maak ekaawii nitamukw ishi aayimuumaahkuch awenichii.

² Muush etituu chipaa nitaweyihtamuwaanaawaau Chishemanituu utayimuwin. Wesh naashch taapwe payehcheyihtaakuniyuu. Kaye maak ekut che uhchi miyu nihtaauchiyekw kaye eukun che kanuweyimikuyekw e pimaachihuyekw. Muyaam awaash e uschinihtaauchit muush e nituweyimaat chuuchuushinaapui chechii uhchi nihtaauchit ekun chipaa ishinaakusinaawaau e nituweyihtamuwekw Chishemanituu utayimuwin chechii uhchi nihtaauchiyekw anite chitahchaahkuwaahch.

³ Wesh itashteu Chishemanituu utayimuwinihch, “Shaash chichii chischeyihtamihiikunaawaau taan e ishpish miyutuutamaataakw Utipeyihchikeu.”

An maauch niikaan kaa iteyihtaakusit asinii eukuu Christ

⁴ Pechi naataahkw maak Utipeyihchikeu Jesus, an kaa pimaatisiit asinii kaa ishinihkaataakanuut. Chii aataweyimikuu aweyuu utah aschiihch, mikw maak Chishemanituu chii wiyaapamikuu wiya maauch chechii chisteyihtaakusit.

⁵ Muyaam e pimaatisiitwaau asiniich chitishinaakusinaawaau anit wehchi wiikaapuuhtaat Chishemanituu uwaaskaahiikanim, anit e ihtaat kaa payehchisiit ahchaahkw. ekute maak anite muyaam ayimiheuchimaauch e payehchi pimaatisiitwaau e itaapachihiitaakw. Misiwe taan che ishi pachishtinamuwekwe chekwaan Jesus Christ e ihtaat, chika nahiiwehiikuu Chishemanituu.

⁶ Wesh itashteyuu Chishemanituu utayimuwinihch, Niya nichii wiyeyimaau an maauch chihchiwe kaa iteyihtaakusit asinii. Eukw maak uu asinii e aapachihiik e wiikaapuuhtaauch niwaaskaahiikanimiyuu anite Zionihch. An maak awen che taapweyimaakwe uyuu kaa wiyaapamach namui wiiskaat chika uhchi mihchiiweyihtam e taapweyimaat.

⁷ chiyawaau maak kaa taapwehtamekw chihchiwe chititeyimaawaau uu asinii. Ekw maak anichii ekaa kaa taapweyimaatwaau che wii chischisitwaau uyuu kaa itashteyich anite masinahiikanihch uyuu asinii e aayimuumaakanuyich, Aniyuu asinii kaa aatuweyimaatwaau anichii kaa waaskaahiikanihchetwaau eukw aniyuu maauch niikaan kaa iteyihtaakusiikupanen.

⁸ Ekw maak miin e itashtech anite Chishemanituu utayimuwinihch, Uu asinii chika pisusamuweu kaye eukuu kaa mihchaapischisit asinii che pahchishimaat aweyuuh. Pasuskaweuch uyuuh asinii wesh namui uhchi nanihiihtamuweuch Chishemanituu utayimuwiniyuu. Eukw maak uyuu che uhchi waweshihaakanuutwaau wesh shaash ekun kaa ishi wiyeyihtamiyich Chishemanituu che ihtuutaakutwaau.

⁹ Chiyawaau an kaa itiskaanesiyekw chichii wiyaapamikuwaau Chishemanituu kaye eukw chiyawaau maauch kaa niikaaneyihtaakusit chisheuchimaau utayimiheuchimaamh. Eukw chiyawaau kaa payehchisiitwaau kaa itiskaanesitwaau iinuuch, eukw chiyawaau Chishemanituu tipiiwe utiiniimih. Chiyawaau chichii wiyaapamikunaawaau chechii waawiihtamuwekw taan e ishi chisteyihtaakuniyikwaauh utayihtuwinh an kaa wiishaamitaakw wanitipiskusiiwinihch uhchi anite ishi umaamishkaach waashtewinihch.

¹⁰ Anite weskach namui kuuhchi utiiniimitutaakuwaau Chishemanituu ekw maak anuhchiish weutiiniimitutaataakw. Anite weskach namui chuuhchi chistimaacheyimikuwaau ekw maak anuhchiish ekw chestimaacheyimitaakw.

¹¹ Niwiichewaakanitikw kaa saachihiitakuch, mikw wesin chimaaniteunaawaau kaye mikw chipapaa ihtaanaawaau utah aschiihch. Eukw maak uu wehchi wii siihchimitakuch tekash ekaa chechii papiskaateyihtamihiikuyekw aniyuu machi nitaweyihtamuwinh aniyuu muush miyaashihchepayihkwaau chitahchaahkuwaahch.

¹² Suuhk wii kuiskupimaatisiikw mekwesiinuu anichii ekaa kaa taapwehtahkwaau e ihtaatwaau. Ekut chechii nisituunahkwaau chimiyuutuutamuwinawaau ekw maak che maamihchimaatwaau Chishemanituu iskutak takushiniyichen. Ekun che ihtitwaau aat anuhchiish nitamukw e ishi mamishimitaakuch mwehch e machituutamuwekw.

Nanihiihtuwaahkuch kaa niikaanishkaataakuch

¹³ Nanihiihtamukw misiwe aschiiyuu tipeyihchewin. Utipeyihchikeu ihtuutamuwaahkw uyuu. Nanihiihtuwaahkw chisheuchimaau kaye nanihiihtuumh misiwe utaapachihaakan, wesh eukw uchii naakaanapitwaau.

¹⁴ Ihtaauch kaye anichii chisheuchimaau e aapachihiikutwaau chechii waweshihaatwaau aniyuu kaa wanituutamiyich kaye chechii miywaachimaatwaau aniyuu kuiskw kaa ihtiyich. Eukunich uchii kaye pishichihaahkuch.

¹⁵ Wesh eukw uyuu Chishemanituu utiteyihtamuwin, naashch chechii miyunaakuhkwaau chipimaatisiiwinawaau ekaa mitun nitamukw chechii ishi aayimuutahkwaau miywaachimuwiniyuu anichii ekaa kaa chischeyihtahkwaau taan e ishi chiishkwe ayimitwaau.

¹⁶ Taapwe kiipaa chichii wiihkuchihiikunaawaau, mikw maak Chishemanituu utaapachihaakanh chiyawaau. Ekaawii iteyihtamukw chechii machituutamekw an uhchi e chii wiihkuchihiikawiyekw machihtwaawinihch uhchi.

¹⁷ Misiwe awen chisteyimaahkw. Saachihaahkuch misiwe anichii kaa wiichishaaniyekw Chishemanituu ishi e ihtaat, nanihchiishtuwaakw Chishemanituu, chisteyimaahkw chisheuchimaau.

Kaa taapwehtahkwaau che nanehkaateyimuhaakanuutwaau mwehch Christ kaa ishi nanehkaateyimuhaakanuyich

¹⁸ Chiyawaau kaa utaapachihaakanitutaataakw awen, chipaa pachishteyimitisuustawaawaauch kuuchimaamuwaauch kaye chipaa nanihiihtuwaawaauch. Namui mikw anichii kaa miyuhtwaatwaau chipaa uhchi chisteyimaawaauch kaye anichii kaa machihtwaatwaau chipaa chisteyimaawaauch.

¹⁹ Chishemanituu chika naheyihtamihaau siipiiwesiistamane sheshkwaaht e wiisacheyihtamihiikuyin e chischeyihtaman eukw uyuu Chishemanituu utiteyihtamuwin.

²⁰ Wesh taapaa chekwaan chiwiichihiikuun e waweshihiikuyin e chii machituutaman. Mikw maak Chishemanituu chika naheyihtamihaau, nanehkaachihiikuyine e chii miyutuutaman uhchi.

²¹ Wesh eukuu wehchii wiishaamikuyekw, aniyuu Christ e chii wawiisacheyihtamihaakanuut chichii nakatamaakuwaau chekwaayuu che chischinuwaapahtamuwekw, chechii taahtaapahamewekw taanite kaa pimuhtet.

²² namui wiiskaat uhchi machituutam kaye namui wiiskaat nitamukw uhchi ishi ayimuu, muush kuiskw chii ishi ayimuu.

²³ Kaa maayeyimaakanuut namui yaaitei uhchi taapishtaau taan kaa ishi maayeyimaakanuut. Kaa nanehkaachihaakanuut namui uhchi wii sasechimuweu e aayimuutahk taan chechii ishi taapishtaat. Uste tekash chii aspeyimututaweu aniyuu kaa cheshtinaateyihtaakusiyich cheshtinaash kuiskw che ishi wiyaaskunicheyich.

²⁴ Wiya tipiiwe wiiyuuhch chii ishi utinam chimachihtwaawinuuh kaa chiistaaskuhwaakanuut aashiteyaahtikuhch, miiskuch chiyaanuu ekaa chechii piihchishkaakuyihkw machihtwaawin. Chii ihtuutam chimachihtwaawinuuh chechii ati ishinaakusuuhkw muyaam e nipiikw machihtwaawinihch ishi ekw maak kuiskutaatisiiwinihch chechii ishi pimaatisiyuuhkw. Aniyuu taan kaa ishi papasistehwaakanuut ekut kaa uhchi miinuwaatisiyuuhkw.

²⁵ Wesh mwehch maanishchaanishach e wanishihkwaau chichii ishinaakusinaawaau. Anuhchiish maak shaash kaau chichii peshiikunaawaau chechii nuushuushkuwekw an maanishchaanishuiinuu kaa naanaakachihiitaakw kaye kaa kanuweyimaat chitahchaahkuwaauh.