1 Peter 1 - Chishemanituu Utayimuwin: Kaa Uskaach Testament

¹ Niya Peter. Jesus Christ nichii wiyaapamukw kaye maak wiya nichii itishahuukw Apastal chechii ishi atushkuuk. Chiyawaau Chishemanituu utiiniimh chi masinahamaatinaawaau, chiyawaau paahpiiwe kaa ihtaayekw anite aniyuu aschiih Pontus, Galatia, Cappadocia, Asia ekw maak Bithynia kaa ishinihkaatekwaauh.

² Chishemanituu Uhtaawiimaau chichii wiyaapamikuwaau wiya tipiiwe chechii utawaashiimitutaataakw. Kaa payehchisiyich Ahchaahkwa uhchi ekut kaa uhchi pahkaanihiitaakw chechii nanihiihtuumekw Jesus Christ kaye chechii payehchihiikuwekw umihkw. Nitayimihaan chechii weyuuch ayaayekw shaweyihchichewin kaye chiyaameyihtamuwin.

Aspeyimuwin kaa cheshtinaateyihtaakuhch

³ Maamihchimaataau Chishemanituu, Chitipeyihchikeminuu Jesus Christ Uhtaawii. Aniyuu e ishpish naashch chistimaacheyimitahkw chichii miikunuu e uskaayich pimaatisiiwiniyuu kaa wanishkaanaat Jesus Christ nipuwinihch uhchi. Ekut maak wehchi ayaayihkw aspeyimuwin e cheshtinaateyihtaakuch,

⁴ ekw maak pekuseyimuyihkw chechii ayaayihkw an taan e ishi ayaat Chishemanituu che ishi miyaat utiiniimh chechii tipiyeusiyich. Kihchikiishikuhch maak chichii kanuweyihtamaakuwaau anite ekaa wiiskaat che wiinipayiyihch, kaye ekaa wiiskaat che wanaataniyich maak chechii paashikunaakuniyich.

⁵ Chichii taapweyimaawaau Chishemanituu, wiya maak umaskuusiiwin chika kanuweyimikunaawaau piihiim maahchishtai chiishikaayiche. Ekw maak che pimaachihiitaakw wesh ekun muush kaa pe iteyihtahk che ihtuutaataakw.

⁶ Aat e iteyihtaakuhch weipishchiish chechii nachishkamekw nanaahkuu chekwaan naashch e aayimihch, nuwach chika miyeyihtenaawaau an maahchishtai chiishikaache.

⁷ Wesh e nachishkamekw chekwaayuu e aayimihkwaau ekut wehchi chischeyihtaakuhch taan nihaau e iteyihtaakuhch chitaapwehtamuwinawaau. Waawaach ushaaushuuliyaanaapiskw, e ishinaakusit chechii wanaachihaakanuut, nituu chischeyimaakanuu ishkutehch taapwe e ushaaushuuliyaanaapiskuukwe, chitaapwehtamuwinawaau maak uste iteyihtaakun e iteyihtaakusit ushaaushuuliyaanaapiskw, iteyihtaakun chechii nituu chischeyihtaakunuuhch taan nihaau e iteyihtaakuhch. Taapwe maak e iteyihtaakunikwe taan chipaa iteyihtaakun chika miywaachimikunaawaau, kaye chika chisteyihtaakuhiikunaawaau kaye chika chishtaachimikunaawaau miin takushihke Jesus Christ.

⁸ Aat ekaa wiiskaat uhchi waapamekw Jesus yaapach chisaachihaawaau kaye maak aat ekaa waapamekw anuhchiish yaapach chichii taapweyimaawaau. Chichii muuchicheyihtenaawaau, an maak e ishpish muuchicheyihtamekw namui nihaau chichii wiihtenaawaau taan e ishpish miyeyihtamekw.

⁹ Wesh e ayaayekw taapwehtamuwin ekut che uhchi pimaachihutwaau chitahchaahkuwaauch.

¹⁰ Eukw uyuu pimaachihiikusiiwiniyuu naashch suuhk kaa nituu chischeyihtahkwaau aniyehkaanaanich uchischiwehiichesuuch kaye naashch yaakwaau chii ishi nituu chischeyihtamuch. Chii niikaan aayimuutamuch maak uyuu miiwewiniyuu Chishemanituuh che miikuwekw.

¹¹ Christ Utahchaahkuyuu chii piihchishkaakuuch kaye chii wiihtamaakuuch taan che ishi nanehkaateyimuyich Christ kaye maak che chisteyihtaakuhaakanuyich. Ekw maak kaa naanituu chischeyihtahkwaau aweyuu che aawiyich Christ kaye maak taaishpish che ispayiyich uyuu.

¹² Chii chischeyihtamihaakanuuch maak aniyehkaanaanich uchischiwehiichesuuch ekaa wiyawaau mekwaach e pimaatisiitwaau che ispayiyich uyuu. Chiyawaau chechii chischeyihtamuwekw eukw wehchii aayimuutahkwaau aniyuuh chekwaayuuh anuhchiish taan e ishi waawiihtamaataakuch anichii kaa waawiihtahkwaau miywaachimuwiniyuu. Kaa payehchisiit Ahchaahkw an kaa pechi itishahwaakanuut kihchikiishikuhch uhchi eukun an kaa miyaat chechii waawiihtamiyich uyuu miywaachimuwiniyuu. Eukw uyuuh chekwaayuu waawaach enchilich wii chischeyihtamuch.

Chishemanituu chichii nitaweyimikunuu chechii kuiskupimatisiyuuhkw

¹³ Suuhk maak muush wii ayeskuweyihtamukw taan mikw che ati ispayikwe chekwaan kaye suuhk nanaakatuweyimisukw taan e ihtiyekw. Tekash mitun aspeyimututamukw an chishewaatisiiwin che miikuyekw iskutak miin takushihke Jesus Christ.

¹⁴ Suuhk nanihiihtuwaakw Chishemanituu. Ekaawii miin chika uhchi nihtaauchihuumakan taan kaa chiishi machi nanitaweyihtamekw anite utaahch eshkw ekaa mitun chekwaan uhchi papaameyihtamihiikuyekw kaye eshkw ekaa uhchi chischeyihtamuwekw Chishemanituu utiteyihtamuwin.

¹⁵ Payehtisiyuu an kaa tepwaatitaakw kaye chiyawaau maak payehchisiikw misiwe e ishi pimaatisiyekw.

¹⁶ Wesh itashteu anite Chishemanituu utayimuwinihch Chishemanituu e chii itwet, Nipayehchisiin kaye chiyawaau maak payehchisiikw.

¹⁷ Suuhk maak muush chisteyimaahkw Chishemanituu wiya Nuuhtaawiinaan kaa ishinihkaatekw e ayimihaayekw. Eukw wesh uu kuiskw kaa ishi wiyaaskunaat misiwe aweyuu taan nihaau e ihtiyich. Aniyuu taan kaa ishi atushcheyich ekut wehchi wiyaaskunaat. Suuhk maak muush wii chisteyimaahkw Chishemanituu che ishkuhtaakwe chipimaatisiiwinaawaauh utah aschiihch.

¹⁸ Wesh chichischeyihtenaawaau taan kaa ishi wiihkuchihiikuyekw anit uhchi pakunituu e iteyihtaakuniyich e ishi pimaatisiinaanuyich aniyuu taan kaa ishi pechi aanische miitaakuch aniyehkaanaanich chiwaahkumaakanuwaauch. Namui maak wii kaa waapaapischisit shuuliyaanaapiskw maak ushaau shuuliyaanaapiskw uhchi aapatisuu kaa wiihkuchihiikuyekw,

¹⁹ Christ umihkw maauch kaa chisteyihtaakuhch chekwaan eukuu kaa wiihkuchihiikuyekw. Wesh aniyuu kaa wiihkuchihiitaakw Christ tekash chii pachishtinam upimaatisiiwin mwehch maanishchaanish ekaa mitun wiyesh ishinaakusit, naashch e miyuushit, ekun kaa ishinaakusit Christ uyuu kaa ihtuutamaataakw.

²⁰ Eshkw ekaa uhchi ushihtaakanuuhch uu aschii shaash Chishemanituuh chii wiyaapamikuu Christ uyuu che ihtuutahk. Ekw maak uyuu e ati maahchishtai chiishikaakwaauh chiyawaau uhchi wehchi nuukuhaakanuut.

²¹ Ekw maak tiyaapweyimekw Chishemanituu aniyeyuu uhchi taan kaa ishi ihtuutamaataakw Christ, wesh Chishemanituu chii wanishkaaneu Christ nipuwinihch uhchi kaye chii chisteyihtaakuheu. Ekun maak wehchi taapweyimekw Chishemanituu kaye ekun wehchi aspeyimututuwekw.

²² E chii payehchihaakanuutwaau chitahchaahkuwaauch an uhchi e nanihiihtamekw taapwewin kaye maak e ishinaakusiyekw chihchiwe e saachihekuch chiichishaanuwaauch, suuhk saachihiitukw misiwe chitehiiwaahch uhchi.

²³ Wesh iskutak miin e pimaatisiyekw kaa ishinaakusiyekw kaachiche pimaatisiiwin chichii miikunaawaau wesh kuutawaashiimitutaakuwaau Chishemanituu uhtaawiimaau an ekaa wiiskaat kaa puunipimaatisiit, Chishemanituu utayimuwin taan ekaa nihtaa che wanaatihch kaye ekaa nihtaa che miyaaupayihch ekut kaa uhchi ishinaakusiyekw miin e pimaatisiyekw.

²⁴ Chishemanituu utayimuwin itashteyuu, Misiwe awen mwehch mashkushuu ishinaakusuu. Misiwe awen uchisteyihtaakusuwin mwehch waapukun nitawiin kaa nihtaauchihch ishinaakuniyuu. Nipiimakanh mashkushuuh ekw waapikunh paahpahchishtinh.

²⁵ Mikw maak Utipeyihchikeu utayimuwin kaachiche ihtakuniyuu. Uu maak ayimuwin eukuu miywaachimuwin kaa waawiihtamaakuyekw.