1 John 4 - Chishemanituu Utayimuwin: Kaa Uskaach Testament

Ekaawii taapwehtawaahkuch anichii ekaa kuiskw kaa ishi chiskutamaachetwaau

¹ Niichishaanitikw kaa saachihiitakuch ekaawii misiwe awen Chishemanituuh kaa aayimuutamaataakw mikw chika uhchi ishi taapwehtawaawaau. Yaakwaau nituu chischeyimaahkuch ati chechii uhchi chischeyihtamekw taapwe Chishemanituu e ihtaayich wehchipayikwe taan e ishi chiskutamaachetwaau. Wesh mihchetuuch mishihte utah aschiihch anichii machi uchischiwehiichesuuch.

² Mwaaute chechii uhchi chischeyimahkw awen Chishemanituuh Utahchaahkuyuu e aapachihiikuukwe. Awen mushe kaa wiihtahk Jesus Christ e chii takushiniyich utah aschiihch muhch naapeu kaa iteyihtaakusiyich e chii iteyihtaakusiyich, eukw uu Chishemanituu Utahchaahkuyuu e aapachihiikut.

³ Ekw an awen kaa itwet ekaa taapweyimaat Jesus namui Chishemanituuh Utahchaahkuyuuh aapachihiikuu. Piihchishkaakuu aniyuu Ahchaahkwa kaa suuhcheyimututawaat Christ. Chichii pehtenaawaau che ihtakuhch uu e iteyihtaakusinaanuuhch. Shaash maak ihtakun utah aschiihch uu e iteyihtaakusinaanuuhch.

⁴ Nitawaashiimitikw, Chishemanituu chichii pimaachihiikuwaau. Namui maak kuuhchii shaakuuchihiikuwaauch anichii ekaa kuiskw kaa ishi chiskutamaachetwaau chechii taapwehtawekuch. Wesh uste suuhcheyihtaakusuu an kaa piihchishkaataakw ishpishaat aniyuuh anichii aschiihch kaa ishi pimaatisiitwaau kaa piihchishkaakutwaau.

⁵ Anichii nitamukw kaa ishi chiskutamaachetwaau utah aschiihch uhchiyuuch. Ekun maak wehchi ishi ayimitwaau e ishi ayimiyich aniyuuh aweyuuh ekaa kaa chischeyimaayich Chishemanituuh, ekw maak naashch yaapatihtaakutwaau aniyuuh aweyuuh utah aschiihch kaa ihtaayich.

⁶ Chiyaanuu wii Chishemanituu chichii pimaachihiikunuu. An awen kaa chischeyimaat e iteyihtaakusiyich Chishemanituuh chinituhtaakunuu taan e iteuhkw. Ekw an awen ekaa kaa chischeyimaat Chishemanituu namui chinituhtaakunuu. Ekut wehchi chischeyimahkw taapwewin Ahchaahkw kaye maak kaa wiyeshimuwet ahchaahkw.

Chishemanituu e ihtaat uhchipayuu saachihiiwewin

⁷ Niichishaanitikw kaa saachihiitakuch saachihiitutaau. Wesh Chishemanituu chitihtuutaakunuu chechii saachihiiweuhkw. An awen kaa saachihiiwet chii pimaachihiikuu Chishemanituuh kaye maak chischeyimeu Chishemanituuh.

⁸ An awen ekaa kaa saachihiiwet namui chischeyimeu Chishemanituu wesh Chishemanituu eukw saachihiiwewin.

⁹ Ekut kaa nuukuhtwaatahkw Chishemanituu taan e ishi saachihiitahkw kaa pechi itishahwaat kaa peyakushiyich Ukusisa utah aschiihch chechii uhchi ayaauhkw kaachiche pimaatisiiwiniyuu.

¹⁰ Mwaau maak chihchiwe saachihiiwewin. Namayeu wii chiyaanuu e chii saachihiihkw Chishemanituu maak wiya e chii saachihiitahkw kaa pechi itishahuumaatahkw Ukusisa ati chechii uhchi wepeyihtamaatahkw chimachihtwaawinuu.

¹¹ Niichishaanitikw kaa saachihiitakuch uyeyuu e chii ishi saachihiitahkw Chishemanituu eukw uu chipaa ishi saachihiitunaanuu kaye chiyaanuu.

¹² Namui wiiskaat uhchi waapameu awen Chishemanituu, mikw maak chiishpin saachihiituyihkwe chiwiicheukunuu Chishemanituu kaye chisaachihiiwenaanuu e ishi nituweyimitahkw chechii ishi saachihiiweuhkw.

¹³ Chichischeyihtenaanuu e wiicheuhkw Chishemanituu kaye wiya maak e wiicheutahkw aniyuu uhchi e chii miitahkw Utahchaahkwa.

¹⁴ Nichii waapahtamuwaanaan Chishemanituu kaa pechi itishahwaat Ukusisa chechii pimaachihaayich aweyuuh utah aschiihch kaye eukw uyuu e ishi wiihtamuchihtwaau awenichii.

¹⁵ An awen mushe kaa wiihtahk e taapwehtahk Jesus eukun aniyuuh Chishemanituuh Ukusiyuuh, Chishemanituuh wiicheukuu an awen. Kaye wiya maak wiicheweu Chishemanituu.

¹⁶ Ekw maak chescheyihtamuhkw kaye chitaapwehtenaanuu taapwe e saachihiitahkw Chishemanituu. Chishemanituu eukw saachihiiwewin. An awen muush kaa saachihiiwet Chishemanituuh wiicheweu kaye wiya maak wiicheukuu Chishemanituuh.

¹⁷ Ekw maak saachihiiweyihkwe taan e ishi nituweyimitahkw Chishemanituu chechii ishi saachihiiweuhkw chika chiyaameyihtenaanuu chitehiinaahch wiyaaskunitahkwe Christ. Taapwe ekun che ishinaakuhch wesh mwehch e iteyihtaakusit Christ ekun e iteyihtaakusiihkw utah aschiihch.

¹⁸ Ati e ihtakuhch saachihiiwewin namui chii ihtakun sechisuwin. Awen tekash kaa saachihiiwet taan e ishi nitaweyimikut Chishemanituu namui mitun sechisuu. Wesh awen kaa chischeyihtahk che waweshihaakanuut eukun an siyechisit. Namui tekash chii saachihiiweu taan aniyuuh e ishi nituweyihtaakusit chechii ishi saachihiiwet.

¹⁹ Wiya niishtam chichii saachihiikunuu Chishemanituu. Ekun maak wehchi saachihiiweyihkw.

²⁰ Chiishpin itwete awen, nisaachihaau Chishemanituu, ekaa maak saachihaat wiichishaan, nanatayuu. Wesh chiishpin ekaa siyaachihaakwe awen wiichishaanh taan aniyuuh wiyaapamaat taanite chechii uhchi saachihaat Chishemanituuh ekaa kaa waapamaat.

²¹ Eukw uyuu kaa itashumitahkw Chishemanituu, “Awen e saachihaat Chishemanituuh kaye wiichishaan chipaa saachiheu.”