1 John 3 - Chishemanituu Utayimuwin: Kaa Uskaach Testament

Chishemanituu utawaashiimh

¹ Kanawaapahtamukw maa e ishpish saachihiitahkw Chishemanituu e miitahkw Chishemanituu utawaashiim chechii ishinihkaatakuuhkw. Taapwe maak kuutawaashiimitutaakunuu. Anichii ekaa kaa taapweyimaatwaau Chishemanituu namui chichischeyimikunuuch awenich chiyaanuu wesh taapaa chischeyimeuch Chishemanituu.

² Niichishaanitikw kaa saachihiitakuch, kuutawaashiimitutaakunuu Chishemanituu anuhchiish, mikw maak eshkw namui nuukun taan che iteyihtaakusiihkw, mikw chichischeyihtenaanuu iskutak takushihke mwehch wiya kaa iteyihtaakusit ekun che iteyihtaakusiihkw. Wesh chika waapamaanuu taan nihaau e iteyihtaakusit.

³ Misiwe maak awen uyeyuu kaa ishi aspeyimut nanaakataweyimisuu chechii payehchisiit mwehch Christ e ishi payehtisiyich.

⁴ Misiwe awen kaa machituutahk, piikunamuweu Chishemanituuh uwiishuwewiniyuu. Wesh e machituutaakanuuhch piikunikanuu wiishuwewin.

⁵ Chichischeyihtenaawaau Christ e chii pechi takushihk chechii iichenamuwaat aweyuu umachihtwaawiniyuuh kaye ekaa wiiskaat uhchi machituutahk wiya.

⁶ An awen muush kaa wiichewaat Christ namui machituutam. An awen kaa machituutahk namui uhchi waapameu Jesus kaye namui uhchi chischeyimeu.

⁷ Nitawaashiimitikw, ekaawii pachishtinaahkw awen chechii wiyeshimitaakw. An awen kuiskw kaa ihtit kuiskutaatisiyuu muyaam Christ e ishi kuiskutaatisiyich.

⁸ An awen kaa machipimaatisiit machimanituu kaa iteyihtaakusiyich iteyihtaakusuu. Wesh machimanituu muush chii pechi machituutam. Chishemanituu maak Ukusisa chii pechi takushiniyuu utah aschiihch chechii wanaachihtaawaayich misiwe utaapatisuwiniyuu machimanituu.

⁹ An awen Chishemanituu kaa pimaachihiikut puuniyuu e machituutahk. Wesh Chishemanituu ihtuutaakuu chechii iteyihtaakusit Chishemanituu e iteyihtaakusiyich. Namui maak chii machituutam Chishemanituuh e chii pimaachihiikut.

¹⁰ Awen ekaa kaa kuiskutaatisiit maak ekaa saachihaat wiichishaan, namui utawaashiimitutaakuu Chishemanituuh. Ekut wehchi chischeyimaakanuut awen aweyuu wetawaashiimitutaakut, Chishemanituu maak machimanituu.

Chipaa saachihiitunaanuu

¹¹ Uskach kaa waawiihtamaakuyekw miywaachimuwin eukw uu kaa ishi wiihtamaakuyekw, chechii saachihiituyihkw.

¹² Namui chipaa uhchi naspituwaanuu Cain. Machimanituuh chii tipeyimikuu aniyuu kaa nipahaat wiichishaan. Chekwaayuu maak wehchii nipahaat. Chii maayaataniyuu aniyuu taan kaa ihtit wiya, chii kuiskunaakuniyuu maak wii aniyuu taan kaa ihtiyich wiichishaan.

¹³ Eukw maak uu uhchi, niichishaanitikw, ekaawii chika uhchi miskaateyihtenaawaau e uhkaatitaakuch anichii awenichii ekaa kaa taapweyimaatwaau Jesus.

¹⁴ E saachihiihkwaau chiichishaanuuch ekut wehchi chischeyihtamukw nipuwinihch e chii uhchi aashuuhtahiikuyihkw pimaatisiiwinihch chechii ishi ihtaayihkw. Awen ekaa kaa saachihaat wiichishaan eshkw tipeyimikuu nipuwiniyuu.

¹⁵ Awen kaa uhkaataat wiichishaan kaa nipahiiwet ishinaakusuu. Chichischeyihtenaanuu maak unipahiiweu ekaa e ayaat kaachiche pimaatisiiwiniyuu.

¹⁶ Christ tekash kaa pachishteyimut chechii nipistamaatahkw ekut kaa uhchi chischeyihtamihiitahkw saachihiiwewiniyuu. Ekw maak kaye chiyaanuu netuweyihtaakusiihkw chechii pachishteyimitisuyihkw chiichishaanuuch chechii wiichihiihkwaau.

¹⁷ Waapamaate awen e nuuhtepayiyich aweyuuh chekwaayuu, ekaa maak nuuhtepayit wiya chekwaayuu, ekaa maak chistimaacheyimaate, taanite chechii uhchi itwet e piihchishkaakut Chishemanituu usaachihiiwewiniyuu.

¹⁸ Nitawaashiimitikw, namui mikw chipaa uhchi itwenaanuu e saachihiiweyihkw. Mikw taan e ihtiihkw ekut chipaa nuukun taapwe e saachihiiweyihkw.

Cheshtinaateyimuwin Chishemanituu ishi e ihtaat

¹⁹ Wesh taapwe saachihiiweyihkwe ekut che uhchi chischeyihtamuhkw Chishemanituu e tipeyimitahkw wiya e ihtaat wehchipayiyich taapwewiniyuu. Ekut kaye wehchi chiyaameyihtamuhkw chitehiinaahch e ayimihiihkw Chishemanituu aat e chischeyihtamukw e wanituutamuhkw maanh.

²⁰ Wesh chitehiinuu wiihtamaakuyihkwe e machituutamuhkw Chika chiyaameyihtenaanuu wesh chichischeyimaanuu Chishemanituu wiya uste e chischeyimitahk kaye maak misiwe chekwaayuu e chischeyihtahk.

²¹ Niichishaanitikw kaa saachihiitakuch chiyaameyihtamuhkwe chitehiinaahch namui chika uhchi sechisinaanuu chechii naatahkw Chishemanituu.

²² Chika miikunuu chekwaayuu e ishi nitaweyihtamuuhkw, e ihtuutamuhkw taan e itashumitahkw kaye e ihtuutamuhkw aniyuu chekwaayuuh neheyihtamihiikut.

²³ Maauyuu maak e itashumitahkw chechii ihtuuhkw, chechii taapweyimuumuhkw Ukusisa Jesus Christ kaye maak chechii saachihiituuhkw mwehch Christ kaa itashumitahkw chechii ishi saachihiiweuhkw.

²⁴ Misiwe anichii kaa ihtuutamuwaatwaau taan e itashumikutwaau Chishemanituuh muush wiicheweuch Chishemanituuh kaye wiyawaau maak muush wiicheukuuch. Aniyuuh maak Utahchaahkw kaa miitakw ekut wehchi chischeyihtamuhkw e wiicheutahkw Chishemanituu.