1 John 1 - Chishemanituu Utayimuwin: Kaa Uskaach Testament

Pimaatisiiwin ayimuwin

¹ Chimasinahamaatinaan e aayimuumachiht an shaash kaa ihtaat eshkw ekaa mitun chekwaayuu uhchi ihtakuniyich. Nichii pehtawaanaan, muhch nichii waapamaanaan, kaye nichii taahtinaanaan. Chitaayimuutamaatinaan an kaa miiwet pimaatisiiwiniyuu aniyuu uhchi taan kaa ishi waawiihtahk.

² Muush Uhtaawiimaauh e ihtaayich chii ihtaau. Chii nuukuhtaakanuuyuu upimaatisiiwin. Nichii waapahtamuwaanaan. Ekw maak tepaatutamuwachiht, e aayimuutamaataahch kaachiche pimaatisiiwin.

³ An kaa waapamachiht kaye kaa pehtawachiht e ayimit chiwii aayimuutamaatinaan kaye chiyawaau chechii chischeyimekw mwehch niyaan e ishi chischeyimachiht. Ekw maak chechii ishi wiichewiyaahch e ishi wiichewachiht Uhtaawiimaau ekw maak Ukusisa Jesus Christ.

⁴ Eukw uu wehchi masinahamaataahch chechii saakaschineshkaakuyihkw muuchicheyihtamuwin.

Waashtewinihch chipaa ishi pimaatisiinaanuu

⁵ Chiwii wiihtamaatinaan taan kaa ishi wiihtamaakuyaahch Jesus. Chii iteu, Chishemanituu eukw waashtewin, namui mitun piihchishkaakuu wanitipiskusiiwiniyuu.

⁶ Chiishpin itweyihkwe Chishemanituu e wiicheuhkw, wanitipiskusiiwinihch maak e ishi pimaatisiihkw, chinanatayinaanuu kaye namui taapwewinihch chit ishi pimaatisiinaanuu.

⁷ Chiishpin waashtewinihch ishi pimaatisiihkwe mwehch wiya waashtewinihch e ishi ihtaat, taapwe chika miyu wiicheutunaanuu, kaye Jesus, Chishemanituu Ukusisa, umihkw chipayehchihiikuwaanaanuu misiwe machihtwaawinihch uhchi.

⁸ Chiishpin itweyihkwe ekaa nihtaa machituutamukw, chiwiyeshimitisunaanuu, kaye namui chichischeyihtenaanuu taapwewin.

⁹ Chiishpin maak kuiskw wiihtamuuhkwe Chishemanituu e chii machituutamuhkw, taapweucheyihtaakusuu che ihtuutahk aniyuu kaa itwet che ihtuutahk. Kaye cheshtinaash kuiskw kata ihtuu, Chika wepeyihtamaakunuu chimachihtwaawinuuh kaye chika payehchihiikunuu taan e ishi ekaa kuiskutaatisiyuuhkw.

¹⁰ Chiishpin itweyihkwe ekaa machituutamuhkw muyaam e nanatayit chitishinaakuhaanuu Chishemanituu kaye namui chipiihchishkaakuwaanaanuu utayimuwin.