1 Corinthians 9 - Chishemanituu Utayimuwin: Kaa Uskaach Testament

Taan e ishi ayaat apastal kaye taan chipaa itaapatisuu

¹ Namui chekwaan nitipeyimikuun. Apastal taapwe niya. Jesus Chitipeyihchikeminuu nichii pechi nuukushiishtaakw. Kaye maak niya chichii wiihtamaatinaawaau miywaachimuwin ati kaa uhchi taapweyimekw Christ. Chiyawaau e ihtaayekw ekut wehchi nuukuhch taapwe e atushkuuk Utipeyihchikeu.

² Aat kutakach ekaa apastal iteyimitwaawenich, apastal chipaa iteyiminaawaau chiyawaau. An maak e ishi pimaatisiistuwekw Utipeyihchikeu ekut wehchi nuukuhch taapwe apastal e ihtaayaan.

³ E pechi kakwechimitwaau awenich chechii nuukuhtaauch taapwe apastal e itaapatisuwaauche, maauyuu e ishi nishkweushihiikwaau.

⁴ Namui aa maak ishinaakun kaye niyaan chechii ashamikuyaahch kaye maak chechii minihiikuyaahch an e itaapatisiyaahch.

⁵ Namui aa maak nipaa chii niipuun kaye niya ekw maak nipaa papaa ayaawaau niichiskweu e waawiihtamaan miywaachimuwin. Ekun e ihtitwaau anichii kutakach apastalach kaye Utipeyihchikeu wiichishaanh kaye maak Peter ekun e ihtit.

⁶ Mikw aa niyaan Barnabas e niishiyaahch iteyihtaakun chechii aapatisiyaahch chechii uhchi pimaachihiisuyaahch.

⁷ Namui awen sehchei shimaakanishuu aapatisuu. Yaaitei tipahamuwaakanuu aniyuu e itaapatisit. Kaye maak awen kaa nihtaauchihchet namui aa miichuu aniyuuh kaa nihtaauchihtaat. Namui kaye awen naanaakachiheu maanishchaanisha, ekaa chechii uhchi uhtaapachihut uchuuchuusinaapuumiyuuh.

⁸ Namui nititwen uu mikw an e waapahtamaan e ihtinaanuuhch. Wesh ekun e ishi aayimuutech kaye anite wiishuwewinihch.

⁹ Maau e itashteyich Moses uwiishuwewinihch, “Namui chipaa uhchi chikamuhtaawaan chiputenewaapahkaachikaniyuu naapemistus utuunihch ekaa chechii miichisut mekwaach e aapachihiit.” Namui mikw mistusa maamituneyimeu Chishemanituu wehchi itwet uyuu.

¹⁰ Misiwe aweyuuh kaa aapatisiyich aayimuumeu muyaam aniyuuh aweyuuh kaa piikushkamikahiicheyich chechii ati nihtaauchicheyich ekw maak aniyuu kaa maamuushtinamiyich nihtaauchihchikanh iskutak kaa chiishi nihtaauchiniyikwaauh. Ishinaakuniyuu maak taapishkun anichii chechii uhchi miichisutwaau aniyuu kaa ishi nihtaauchihchetwaau.

¹¹ Ekw maak anit kaa wiihtamaataahch miywaachimuwin muyaam e nihtaauchihcheyaahch chii ishinaakun, chimiyunihtaauchinaawaau maak taapwehtamuwinihch ishi. Mistahii aa maak ishinaakun e kakwechimitaahch chechii miyaahch taan e ishi nitaweyihtamaahch.

¹² Namui wiyesh chititeyihtenaawaau kutakach awenich e pimaachihekuch. Etituu maak iteyihtaakun niyaan chechii pimaachihiyaahch. Aat e iteyihtaakuhch chechii nitutamaataahch chechii wiichihiyiaahch namui yaapach kuuhchi kakwechimitinaan. Ekw maak niyaan pemipayihiisuyaahch wesh taapaa ninitaweyihtenaan chekwaan chechii chipishkaakuyaahch e wii waawiihtamaahch miywaachimuwin.

¹³ Chichischeyihtenaawaau anichii kaa aapatisitwaau anite ayimiheukamikuhch e ashamaakanuutwaau aniyuu miichimiyuu kaa petaakanuyich anite ayimiheukamikuhch aniyuu kaa pahkwenamuwaakanuyich Chishemanituu. Kaye anichii kaa aapatisitwaau ati e ihtakuniyich aniyuu pachishtinicheunaapiskuyuu awesiisa kaa chii machishtawehamaanuyich, ekut kaye wiyawaau wehchi ashamaakanuutwaau aniyuu wiyaasiyuu kaa machishtawehamaanuyich.

¹⁴ Ekun maak mwehch kaa itwet Utipeyihchikeu che ihtuutawaakanuyich aniyuuh kaa waawiihtamiyich miywaachimuwiniyuu. Chii itashuweu chechii miyaakanuyich chekwaayuu chechii uhchi pimaachihiisuyich.

¹⁵ Aat maak e ishinaakuhch chechii tipahamaakuyaan namui kuuhchi ititinaawaau chechii tipahamuuyew. Kaye maak namui chimasinahamaatinaawaau chechii ititakuch chechii tipahamuuyekw. Nititeyihten uste chipaa miywaau chechii nipiyaan ishpish wii chechii ititakuch chechii tipahamuuyekw. Wesh nimiyeyihten e waawiihtamaatakuch miywaachimuwin ekaa tipahamuuyekw.

¹⁶ Namui maak ishinaakun chechii mamahtisiyaan e kacheskweyaan e waawiihtamaan miywaachimuwin. Wesh ekun kaa itashumikuyaan chechii ihtiyaan. Chika ihtakun wesin che ishi aahkwaach machipayaan ekaa waawiihtamaane miywaachimuwin.

¹⁷ Niya chii iteyihtamuwaapaane chechii waawiihtamaan miywaachimuwin, kiipaa nipaa pukuseyihten chechii tipahamaakuyaan. Mikw maak Chishemanituu wiya nichii miikw uyuu chechii ishi aapatisiihkahtamuch miywaachimuwiniyuu eukw maak uu wehchi waawiihtamaan.

¹⁸ Chekw tipahamaakusiiwin maak maayikuyaan. An sehchei e kacheskweyaan e waawiihtamaan miywaachimuwin eukun an nitipahamaakusiiwin. Aat e iteyihtaakuhch chechii nitutamaatakuch chechii pimaachihiyekw e waawiihtamaan miywaachimuwin namui chikakwechimitinaawaau chechii wiichihiyekw.

¹⁹ Namui chekwaan nimamechiminikuun wesh namui awen nuutaapachihaakanitutaakw. Mikw maak yaapach niya tipiiwe nichii wiyeyihten misiwe awen che wii atushkuuk. Ekw maak mihchetu awen che ihtuutuuk chechii taapwehtahk miywaachimuwiniyuu.

²⁰ Anite Jewa kaa itiskaanesitwaau iinuuch e ihtaatwaau e ihtaayaan, mwehch Jewa iinuu nititeyihtaakuhiisun. Naashch yaakwaau nanaakatuweyihtamuch wiishuwewiniyuu kaye niya maak ekun e ihtiyaan aat ekaa maahchikwaapihkaatikuyaan an wiishuwewin. Uu maak nitihtin chechii wiichihiikwaau anichii kaa iteyihtahkwaau chechii pimaachihutwaau e nanihiihtahkwaau wiishuwewiniyuu. Niwii wiichihaauch chechii taapweyimaatwaau Jesus.

²¹ Ekw maak iskutak e ihtaayaan anite anichii ekaa Jewa kaa itiskaanesitwaau e ihtaatwaau, muyaam ekaa Jewa itiskaanesiyaan nititahiisun e wii ihtuutuukwaau kaye wiyawaau chechii taapweyimaatwaau Christ. Chischeyihtam Chishemanituu e nanihiihtamaan wiishuwewin, aniyuu wiishuwewiniyuu Christ kaa pechi miit eukun an nenahiihtamaan.

²² Kaye maak e ihtaayaanh anite e ihtaatwaau anichii ekaa naashch kaa suuhchikaapuutwaau utaapwehtamuwiniwaahch ekun kaye niya e iteyihtaakuhiisuyaan. Uyuu nitihtiwaan chechii wiichihiikwaau etituu chechii suuhchikaapuutwaau e taapwehtahkwaau. Mikw taan e iteyihtaakusitwaau awenichii e kacheschimakwaau ekun e iteyihtaakuhiisuyaan. Mikw taan che ishi nihiipayikwe chechii ishi wiichihiikwaau ekun che ishi wiichihiikwaau pasch chechii pimaachihutwaau.

²³ Eukw wehchi ihtiyaan uu chechii taapwehtaakanuuhch miywaachimuwin taanite mikw e ati waawiihtamaan. Ekw maak che miskamaan taan e ishi aayimuutech shaweyichichewin anite miywaachimuwinihch.

²⁴ Chichischeyihtenaawaau taanite e ihtakuhch e chihchipahiitunaanuuhch e wii kakwechiskatahuutunaanuuhch, mihchetu awenich chihchipahtaauch. Mikw maak peyakw awen kaaniyuu chekwaayuu. Muyaam maak an kaa chihchipahtaat e ishpish suuhk chihchipahtaat, ekun kaye chiya kwaast chipaa ihtin taan e ishi pimaatisiyin e taapweyimat Christ. Ekw maak kaye chiya che miikuyin chikaaniyuwin.

²⁵ Misiwe awen kaa kakwechiskatihiichet pisikw kakwechipayihiisuu etituu chechii kaschihut. Ekute mitun e ishi pachishtinahk upimaatisiiwin. Uchii maak kaa kakwechiskatihiichetwaau eukw uyuu e ihtitwaau e wii ayaatwaau kaaniyuwiniyuu weipishchiish mikw che ihtakuniyich. Ekun maak e ihtiihkw kaye chiyaanuu chechii ayaayihkw an kaaniyuwin kaachiche che ayaayihkw.

²⁶ Eukw maak an wehchi suuhk wii chiishihtaayaan niya an e ishi pimipahtaayaan. Ekun kaye wehchi ishinaakusiyaan mwehch awen kaa utaamahiichet muush kaa muyaamuhwaat aweyuuh. Namui nitishinaakusin mwehch awen kaa utataamahiichet ekaa maak chekwaayuu kaa kaahchitahahk.

²⁷ Misiwe e ishi nituweyihtaakuhch chechii ihtiyaan e kakwechiskatahiicheyaan tekash nipachishtinisun chechii ihtuutamaan. Wesh namui ninitaweyihten chechii wanihtaayaan taan nipaa ishi kaaniyuuhiikuun shaash wii e chii kacheschimakwaau kaa taapwehtahkwaau che ishi pimaatisiitwaau taan aniyuuh chipaa ishi pimaatisiyuuh aweyuuh e taapweyimaayich Christ.