1 Corinthians 8 - Chishemanituu Utayimuwin: Kaa Uskaach Testament

Miichimiyuu e chii machishtawehamuwaakanuutwaau manituuhkaanich

¹ Ekw maak che aayimuutamaatakuch taan chipaa ishi kanawaapahtaakanuu miichim manituuhkaanich e chii pachishtinamuwaakanuutwaau. Iinaanuu misiwe awen e ayaat chischeyihtamuwiniyuu. Ihtuutaakuu maak awen chischeyihtamuwiniyuu chihchiwe chechii iteyimisut. Mikw maak awen kaa ayaat saachihiiwewiniyuu ihtuutuweu kutak aweyuuh chechii suuhchikaapuyich.

² Ekw maak e iteyihtamukwe awen naashch mistahii e chischeyihtahk chekwaayuu, nuukuhtaau eshkw ekaa chischeyihtahk taan chipaa ishi chischeyihtam.

³ An awen kaa saachihaat Chishemanituu eukw uu chescheyimikut Chishemanituu.

⁴ Ekw maak waa aayimuutamaan e miichinaanuuhch miichim manituuhkaanich e chii pachishtinamuwaakanuutwaau. Chiwaapamaanuuch manituuhkaanich mikw maak chichischeyihtenaanuu ekaa mitun wiyesh iteyihtaakusitwaau. Kaye maak chichischeyihtenaanuu ekaa ihtaat kutak awen e Chishemanituut, mikw Chishemanituu.

⁵ Aat e iteyihtahkwaau awenich e mihchetiyich Chishemanituuh utah aschiihch neshta kihchikiishikuhch kaye maak misiwe e pimaatisiyich,

⁶ chichischeyihtenaanuu wii chiyaanuu mikw e peyakushit Chishemanituu an wehtaawiimaaut, an misiwe chekwaayuu kaa usihtaat. Misiwe chekwaan Chishemanituu e ihtaat uhchipayuu, kaye maak eukuu pemaatisiistuuhkw. Kaye maak mikw peyakushuu Utipeyihchikeu, eukuu Jesus Christ. Wiya uhchi wehchii ihtakuhch misiwe chekwaan kaa ushihtaakanuuhch, kaye maak wiya uhchi wehchi ayaayihkw pimaatisiiwin.

⁷ Mikw maak namui misiwe awen chischeyihtam e taapwemakaniyich uyuu. Pasch awenich iteyihtamuch mwehch manituuhkaanh e nuuchiishtuwaatwaau e ishinaakusitwaau e miichitwaau machishtawehamaawiniyuu manituuhkaanh e chii pachishtinamuwaakanuyich. Wehchipayuu chechii iteyihtahkwaau uyuu wesh namui yaaichikaapuuch taapwehtamuwinihch.

⁸ Namui miichim chika uhchi ihtuutaakunaanuu uste chechii iteyihtaakusiihkw Chishemanituu ishi e ihtaat. Namui uste chika uhchi iteyihtaakusinaanuu aat miichiihkwe kaye namui niihtaach chika uhchi iteyihtaakusinaanuu aat ekaa miichiihkwe.

⁹ Yaakwaamiih maak. An e ishinaakuhch chechii wiyeyihtamaasuyin chiya taan che ihtiyin ekaawii chika uhchi ihtuutaakuu kutak awen eshkw ekaa kaa yaaichikaapuut taapwehtamuwinihch chechii machituutahkw.

¹⁰ Taan maak che ihtit awen ekaa kaa yaaichikaapuut taapwehtamuwinihch waapamiske e miichisuut anite manituuhkaan ayimiheukamikuhch, e iteyimisk maak e ayaawat chischeyihtamuwiniyuu. Namui aa chiya chika uhchi ihtuutuwaau miichite aniyuu miichimiyuu maanituuhkaanh kaa pachishtinamuwaakanuyich.

¹¹ Wesh mikw ishi ihtuutamane chiya taan e ishi chischeyihtaman chekwaan ekaa maak maamituneyimate an chiichishaan ekaa kaa yaaichikaapuut, chika chii ishinaakun chechii wanaachihtaawat utaapwehtamuwin. Chischisih maa kaye wiya e chii nipistamaakut Christ.

¹² Wanituutuute maak chiichishaan kaye wanaachihtaawate utaapwehtamuwin Christ chiwanituutuwaau.

¹³ Ekw maak, miichiyaane miichim manituuhkaan e chii pachishtinamuwaakanuut ihtuutaakute maak niichishaan chechii wanituutahkw aniyuu e ihtuuch, namui miin wiiskaat nika uhchi miichin an miichim che ihtuutaakuukwe niichishaan chechii pahchishihk.