1 Corinthians 4 - Chishemanituu Utayimuwin: Kaa Uskaach Testament

Taan chipaa iteyihtaakusiyuuh Christ utapastalimh

¹ Christ utaapachihaakanh chipaa ishi kanawaapaminaan, anichii kaa miyaakanuutwaau che aashuu chiskutamaachetwaau aniyuu chekwaayuuh eshkw ekaa uhchi wiihtaakanuyikwaauh, aniyuuh Chishemanituuh e ihtaat kaa uhchipayiniyikwaauh.

² Peyakw chekwaayuu taapwe e ishi nituweyihtaakusitwaau chechii iteyihtaakusitwaau uchii uyuu kaa ishi miyaakanuutwaau chechii itaapatisitwaau eukw chechii cheshtinaateyihtaakusitwaau taapwe chechii ihtuutahkwaau taan e itashumikutwaau uchimaamuwaauh.

³ Ekw maak an e ishinaakusuwaane maak ekaa an e ishinaakusuwaane, namui chichischeyihtenaawaau kaye namui kutak awen chischeyihtam. Namui mechim niya nichischeyihten. Taapaa mitun nipapaameyihtamihiikuun taan e iteyimikwe awen.

⁴ Ekw maak e ishi chischeyimisuyaan niya, misiwe nichii ihtuuten an atushchewin kaa miikuyaan che ihtuutamaan. Mikw maak namui yaapach nicheshtinaateyihten misiwe kaa ihtuutamuwaane an nipaa ihtuuten. Utipeyihchikeu maak eukw che wiyaaskunit.

⁵ Eukw maak uu uhchi ekaawii chika uhchi wiyaaskunen chekwaan eshkw ekaa utihchipayihch chechii wiyaaskunikanuuhch. Wiya Utipeyihchikeu mushe chika nuukuhtaau misiwe chekwaayuu kaa kaataakanuyich. Mechim aniyuu taan nihaau kaa iteyihtamiyich aweyuuh. Ekw maak misiwe awen che wiihtamaakut Chishemanituu e naheyihtamiyich aniyuu taan kaa ishi miyutuutahk.

⁶ Misiwe uu kaa pechi itweyaan niya nichii aayimuumisun kaye Apollos nichii aayimuumaau anit chechii uhchi chischeyihtamekw chiyawaau niichishaanitikw mikw taan e itashtech masinahiikanihch chechii ishi pimaatisiyekw. Wesh itashteu ekaa awen uste chechii iteyimaat peyakw aweyuu taan e iteyimaat kutak aweyuuh.

⁷ Awen kaa miitaakw naashch chihchiwe chechii iteyimisuwekw. Namui aa Chishemanituu kuuhchi miikuwaau misiwe taan e ishi ayaawekw. Chishemanituu e chii miitaakw uyuuh miiwewinh namui ishinaakun chechii maamihchimuyekw muyaam ekaa wii uhchi miitaakw chechii ihtiyekw.

⁸ Mwehch shaash misiwe e ayaayekw taan chipaa ishi ayaanaawaau chititeyihtenaawaau. Kaye chititeyihtenaawaau naashch e weyuuch ayaayekw taan kaa ishi nuuhtepayiyekw miiwewinh. Chichisheuchimaaunaawaau aa, ekaa maak chisheuchimaawiyaahch niyaan. Kamaa taapwe chihchiwe chisheuchimaawiyekw ekw maak kaye niyaan nipaa chisheuchimaaunaan.

⁹ Niya maak e iteyihtamaan Chishemanituu nichii ishihiikunaan niyaan apastalach kaa itapiyaahch maauch niihtaach chechii iteyihtaakusiyaahch ishpish wii chechii chisheuchimaawiyaahch. Namui mitun nichisteyihtaakusinaan. Muyaam naapeuch chipaa wiyaaskunaakanuuch che nipahaakanuutwaau ekun e ishinaakusiyaahch. Nichii ahiikunaan anit misiwe awen chechii naanaakachihiyimiht taan e ishi nanehkaateyimuhiikuyaahch. Taapishkun iinuuch kaye enchilich ninaanaakachihiikunaanich.

¹⁰ Wesh aniyuu e atushkuwachiht Christ, eukw wehchi iteyimikuyaahch e chiishkweyaahch. Chiyawaau maak wii mwehch naashch e kachehtaaweyihtamekw chititeyimikunaawaau e atushkuwekw Christ. Niyaan apastalach naashch namui nisaapisiinaan, chiyawaau wii maak chisuuhkaatisiinaawaau chiyawaau. Nuuhkaatikunaan niyaan. Chiyawaau maak chichisteyimikunaawaau chiyawaau.

¹¹ Waawaach kaye mekwaach anuhchiish niyaanikutehch nisiiweyinaan. Niyaanikutehch nipaakutaahtenaan. Niyaanikutehch namui mitun chii ishinaakun nichekwaaniminaanh. Naashch niwii ihtuutaakunaan kaye maanh. Kaye namui ihtakun taanite chechii wiichiyaahch.

¹² Naashch mistahii nitaapatisinaan chechii pimaachihiisuyaahch. E wiihkwaasiyimihtwaau awenich, nitutamuwaanaanh Chishemanituuh chechii shaweyimikutwaau. Kaye niyenehkaachihiyiamihtwaauh awenich namui nichistutaanaanich.

¹³ E maayeyimiyamihtwaau awenich e atushkaamachiht Christ, pehkaach nitayimihaanaanich e nishkweuhiichihtwaauh. Kaye maak anuhchiish mekwaach mwehch wepinaasun ekun e ihtuutaakuyaahch, niyaan maauch namui chekwaan nititeyimikunaanich awenich utah aschiihch.

Taan kaa ishi yaakwaamimaat Paul aniyuuh Corinth kaa ihtaayich umaamuuayimihaauh

¹⁴ Namui uu nititisinahiichen chechii pimaamishiyekw. Mikw chiwii ayaakwaamimitinaawaau uu wehchi itisinahamaan wesh misiwe chiyawaau nitawaashiimach kaa saachihiikwaau chititeyimitinaawaau.

¹⁵ Aat maak naashch e mista mihchetitwaau anichii kaa chiskutamaataakuch e waawiihtamaataakuch taan che ishi pimaatisiiwekw e nuushuushkuumekw Christ. Niya e peyakushiyaan chichii wiihtamaatinaawaau miywaachimuwin. Ekw maak e ishinaakuhch mwehch niya e chii ati uhtaawiitutuuyekw Christ Jesus uhchi.

¹⁶ Eukw maak wehchi naashch pukuseyimitakuch chechii chischinuwaapamiyekw.

¹⁷ Eukw wehchii itishahuuk Timothy anite e itaawekw. Mwehch nikus Chishemanituu e chii pechi miit nititeyimaau, naashch nisaachihaau. Muush kuiskw ihtuu. Nitaweyimaau chechii chischisuumitaakw taan e ishi pimaatisiyuuch Christ ishi e ihtaayich kaye aniyuu e ishi chiskutamaacheuch misiwe chechii wiihtahk mekwesiinuu misiwe taanite e ati aihtaayitwaauh umaamuuayimihaauh.

¹⁸ Pasch anit e tashiyekw naashch chihchiwe chititeyimisunaawaau. Namui chika uhchi takushin chititeyiminaawaau.

¹⁹ Mikw maak wiipach chika pechi nituwaapamitinawaau, Utipeyihchikeu nituweyimite chechii nituwaapamitakuch. Ekw maak che nituu chischeyimakwaau uchii chihchiwe kaa iteyimisutwaau taapwe kaa miikuwaakwenich Chishemanituuh suuhkaatisiiwiniyuu maak mikw sehchei e itwewaakwenich aniyuu taan e itwetwaau.

²⁰ Namui mikw chipaa uhchi ayimitutaakanuuyuu Chishemanituu uchisheuchimaawin, chipaa nuukuhtaakanuuyuu taan e ishpish suuhcheyihtaakuniyich.

²¹ Iskutak pechi nituwaapamitakuche taan eukw e ishi nituweyihtamekw. Chinituweyiminaawaau aa chechii pechi tahkunamaan pishishtehiikan maak saachihiiwewin chechii petaayaan pehkaach chechii ihtuutaatakuch.