1 Corinthians 3 - Chishemanituu Utayimuwin: Kaa Uskaach Testament

Chishemanituu utaapachihaakanh

¹ Niichishaanitikw, anit e ihtaayekw kaa ihtaayaan namui kuuhchi ishi ayimihiitinaawaau taan e ishi nituweyihtaakuhch chechii ishi ayimihaakanuutwaau awenich Kaa payehchisiyich Ahchaahkwa kaa ayaawaatwaau. Muyaam awenichii ekaa kaa ayaawaatwaau Payehchi ahchaahkwa chichii ishi ayimihiitinaawaau. Muyaam kaa uschi taapweyimaatwaau Christ e ishi ayimihaakanuutwaau ekun kaa ishi ayimihiitakuch.

² Awaash niishtam chuuchuushinaapui miyaakanuu eshkw ekaa ispihtisiit chihchiwe chechii miichisut. Chii wehchihtaakun taan kaa ishi wiihtamaatakuch miywaachimuwin chechii nisituhtahkwaau e chii iteyimitakuch. Anuhchiish maak yaapach eshkw namui chichii nisituhtenawaau anihiih ahchaahkw taapwewinh e aayimihkwaauh chechii nisituhtaakanuuhkwaau.

³ Eshkw ekun e ishi pimaatisiyekw e ishi pimaatisiitwaau anichii eshkw ekaa kaa pachishtinaatwaau Payehchi ahchaahkwa chechii pimipayihtaayich upimaatisiiwinawaauh. Wesh chimamacheyimitunaawaau kaye chimamachipayihkahtaatunaawaau. Ekut maak e nuukuhch eshkw e ishi pimaatisiyekw aniyuu taan e ishi pimaatisiitwaau anichii ekaa kaa taapwehtahkwaau.

⁴ Peyakw anit e tashiyekw e itwet “Paul niya ninuushuushkuwaau,” ekw miin kutak e itwet “Apollos ninuushuushkuwaau.” Ekut maak e nuukuhch e pimaatisiyekw aniyuu taan e ishi pimaatisiitwaau anichii eshkw ekaa kaa taapweyimaatwaau Jesus.

⁵ Awen maak uu Apollos kaye maak awen niya Paul. Aapachihaakanich niyaan. Eukunich uchii aapachihaakanich kaa wiihtamaatakuch miywaachimuwiniyuu ekw maak tiyaapwehtamekw. Taapishkun nichii nanihiihtenaan taan kaa itashumiyimiht Utipeyihchikeu.

⁶ Muyaam nihtaauchihchesuu e chihchipayihtaat e nihtaauchihchet, ekun e ishinaakusiyaan niya, wesh niya niishtam chichii wiihtamaatinaawaau miywaachimuwin. Ekw maak Apollos muyaam an nihtaauchihchesuu muush kaa shuuchishtataat aniyuuh kaa nihtaauchihtaauch ishinaakusuu. Etituu chichii wiihtamaakuwaau taan chipaa ishi pimaatisiiwaanaawaau anite Chishemanituu ishi e ihtaat. Mikw maak Chishemanituu eukw chihchiwe e ihtuutaataakw chechii miyu nihtaauchuwekw chitaapwehtamuwiniwaahch.

⁷ Namui maak chekwaan iteyihtaakusuu an awen kaa nihtaauchihchet kaye an awen kaa shuuchishtataat aniyuu nihtaauchihtaakaniyuu. Chishemanituu eukw chihchiwe e iteyihtaakusit an kaa ihtuutahk chechii nihtaautiniyich aniyuu nihtaauchihtaakaniyuu.

⁸ An awen kaa nihtaauchihchet ekw maak an kaa shuuchishtataat aniyuu nihtaauchihchikaniyuu, niishu aapatisuuch. Taapishkun aapatisiihkahtamuch aniyuu nihtaauchihchikaniyuu. Chishemanituuh maak chika tipahamaakuuch taan che ishi aapatisiihkahtamuwaakwenich.

Taan che ishi wiikaapuuhtaacheyahkw

⁹ Taapishkun niwiichi atuschemaanaan Chishemanituu. Chiyawaau maak mwehch nihtaauchihchikan aschii chitishinaakusinaawaau. Maak ute chipaa chii ishi kanawaapahtenaawaau. Mwehch Chishemanituu uwaaskaahiikanim chitishinaakusinaawaau.

¹⁰ Chishemanituu kaa ishi chishewaach miyutuutamuut nichii itikw chechii atushkuuk. Nichii ishi aapatisin maak muyaam an awen naashch kaa kaschihut e ushihtaat taanit che tehchikaapuuniyich waaskaahiikaniyuu. Ekw maak kutakach e ati chiishihtaatwaau aniyuu kaa ishi chihchi wiikaapuuhtaauch. Mikw maak misiwe anichii kaa ati aapatisiihkahtahkwaau aniyuu kaa ishi chihchi wiikaapuuhtaauch yaaitei kuiskw kata wii ishi wiikaapuuhtaauch aniyuu waaskaahiikaniyuu.

¹¹ Jesus Christ e ihtaayich ekut kaa uhchi wiikaapuuhtaat Chishemanituu uwaaskaahiikanim. Namui kutak aweyuuh e ihtaayich chika chii uhchi wiikaapuuhtaakanuuyuu uwaaskahiikanim. Wesh Chishemanituu shaash chii wiyeyihtam Jesus mikw e ihtaayich chechii uhchi wiikaapuutaakanuyich aniyuu waaskaahiikaniyuu.

¹² Kutakach awenichii ushaaushuuliyaanaapiskwa kata aapachiheuch maak waapishuuliyaanaapiskwa maak nanaahkuu e ishinaakusiyich asiniih e shuuliyaawiyich. Ekw kutakach mistikw kata aapachiheuch maak mashkushuuh kata aapachihtaauch.

¹³ Misiwe maak awen chika nuukuhtaakanuuyuu taan nihaau e iteyihtaakuniyich utaapatisuwin wiyaaskunicheu chiishikaayiche. Wesh ishkuteyuu kata aapataniyuu e nituu chischeyihtaakuniyich taan nihaau e iteyihtaakuniyich awen utaapatisuwin. Ekut che uhchi chischeyihtaakuniyich taapwe meywaayikwe utaapatisuwin.

¹⁴ Ekw maak aniyuu taan kaa ishi atushkuwaakwe awen Utipeyihchikeu ekaa wanaataniyiche, chika miyaakanuu utipahamaakusuwin.

¹⁵ Ekw maak ishkwaateyiche namui chekwaayuu chika uhchi ayaau, aatuwii kiipaa chika pimaachihaakanuu wiya mwehch awen e chii shaapushkahk ishkuteyuu ekaa uhchi kaahchihtaakasut chika ishinaakusuu.

¹⁶ Namui aa chichischeyihtenaawaau mwehch Chishemanituu uchisheayimiheukamikw e ishinaakusiyekw, kaye maak Chishemanituu Utahchaahkwa e piihchishkaataakw.

¹⁷ Awen maak wanaachihtaawaate Chishemanituu uchisheayimiheukamikuyuu, Chishemanituuh chika wanaachihiikuu. Wesh Chishemanituu uchisheayimiheukamikw payehkaniyuu, chiyawaau maak eukw Chishemanituu uchisheayimiheukamikw.

Namui awen chihchiwe chipaa uhchi iteyimisuu

¹⁸ Ekaawii awen chika uhchi wii wiyeshihiitisuu. E ihtaakwe awen anit e tashiyekw e iteyihtamukwe naashch e chischeyihtahk chekwaayuu utah aschiihch ekush kata ishinaakusuu ekaa iipwaahkaat chechii uhchi kachehtaaweyihtahk.

¹⁹ Wesh aniyuu e ishi kachehtaaweyihtahkwaau awenich utah aschiihch, chiishkwenaakun iteyihtam wiya Chishemanituu. Wesh itashteu Chishemanituu utayimuwinihch, Chishemanituu aapachihtaaweu naapeuh ukachehtaaweyihtamuwiniyuu chechii uhchi chischeyihtamihaat taan e ishi chiishkwenaakuniyich ukachehtaaweyihtamuwiniyuu.

²⁰ Kaye maak itashteu Chishemanituu utayimuwinihch, “Utipeyihchikeu chischeyihtam ekaa chekwaayuu iteyihtaakuniyich aniyuu taan e ishi maamituneyihtamiyich aniyuu kaa kachehtaaweyihtamiitwaau utah aschiihch kaa ihtaayitwaauh.”

²¹ Ekaawii maak awen kata uhchi maamihchihiikuu naapeuh, wesh misiwe awen Chishemanituu utaapachihaakanitutaakuu. Misiwe chekwaayuu Chishemanituu chichii miikuwaau chechii tipiyeusiiwekw.

²² Niya Paul ekw maak Apollos, kaye Peter, Chishemanituu nichii pechi itishahukunaan chechii wiichihiitaahch. Misiwe uyuu aschiiyuu chichii pachishtinamaakuwaau, kaye chichii miikuwaau pimaatisiiwiniyuu kaye nipuwiniyuu. Uyuu anuhchiish mekwaach kaa ispayiyich kaye misiwe che ispayiyikwe anite niishtamihch chichii miikuwaau Chishemanituu chechii wiichihiikuwekw.

²³ Chiyawaau maak Christ e ihtaat chit ishi tipeyihtaakusinaawaau. Wiya maak Christ, Chishemanituuh e ihtaayich ishi tipeyihtaakusuu.