1 Corinthians 2 - Chishemanituu Utayimuwin: Kaa Uskaach Testament

Paul kaa itwet mikw Christ kaa chiistaaskuhwaakanuyich che aayimuutahk

¹ Niichishaanitikw, uskach kaa takushiniyaan anit e ihtaayekw, kaa wiihtamaatakuch maak Chishemanituu utayimuwin namui nuuhchi ishi ayimin naashch chechii iipwaahkaataakusiyaan maak chechii itihtaakusiyaan muyaam naashch e kachehtaaweyihtamaan.

² Nichii wiyeyihten mikw peyakw chekwaan che aayimuutamaan eukw Jesus Christ nesht aniyuu e chii chiistaaskuhwaakanuut.

³ Nete e ihtaayekw kaa ihtaayaan namui naashch nuuhchi taapweucheyimisun. Naashch yaakwaau nichii ihtin kaye nichii nanamipayin e ishpish sechisiyaan.

⁴ Mekwaach kaa chii ayimihiitakuch kaye kaa chii kacheschimitakuch namui nuuhchi wii itihtaakuhiisun naashch chechii iipwaahkaahtaakusiyaan ati chechii uhchi taapwehtamekw. Chishemanituu Utahchaahkwa usuuhkaatisiiwiniyuu eukw kaa ihtuutaakuyekw chechii taapwehtamuwekw taan kaa ishi waawiihtamaan.

⁵ Chishemanituu usuuhkaatisiiwin eukw e ihtuutaakuyekw chechii ayaayekw taapwehtamuwin namui wii an e taapwehtamekw taan e itwetwaau anichii kaa kachehtaaweyihtahkwaau.

Chishemanituu ukachehtaaweyihtamuwin

⁶ Anichii awenich kaa miyu nihtaauchitwaau taapwehtamuwinihch ninisituhtaakunaanich kachehtaaweyihtamuwinihch e ishi ayimihiichihtwaau. Namayeu maak an kachehtaaweyihtamuwin awenich utah aschiihch chihchiwe kaa iteyihtahkwaau kaa aayimuutamaan. Namayeu kaye an kachehtaaweyihtamuwin chihchiwe chekwaan kaa iteyihtahkwaau anichii awenich kaa uchimaautwaau. Wesh aniyuu wiyawaau ukachehtaaweyihtamuwinawaau chika iskwaapayiniyuu.

⁷ Chishemanituu ukachehtaaweyihtamuwin eukw kaa aayimuutamaataahch an ekaa uhchi chischeyihtaakuhtaakunuuhch ute pechi utaahch. Eshkw ekaa uhchi ushihtaat Chishemanituu uyuu aschiiyuu, shaash chii wiyeyihtam taan che ihtit anite niishtamihch ati chechii uhchi chisteyihtaakuhiitahkw.

⁸ Namui maak waawaach peyakw anichii kaa uchimaautwaau utah aschiihch uhchi nisihtuhtamuch uyuu kachehtaaweyihtamuwiniyuu wesh taapaa chipaa uhchi chiistaaskuhweuch aniyuu Utipeyihchikeuh maauch kaa chisteyihtaakusiyich chii chischeyihtamuwaakupanenich.

⁹ Wesh itashteu Chishemanituu utayimuwinihch, Namui awen uhchi waapahtam kaye namui awen uhchi pehtam nesht namui awen uhchi chischeyihtam taan kaa ishi ayeskuushtamuwaat Chishemanituuh aniyuuh kaa saachihiikut.

¹⁰ Chishemanituu maak chichii chischeyihtamihiikunuu uyuu Utahchaahkwa uhchi. Wesh Utahchaahkwa misiwe chekwaayuu naanituu chischeyihtamiyuuh, waawaach aniyuu taan nihaau e iteyihtaakusiyich Chishemanituuh.

¹¹ Muyaam awen taan nihaau e iteyihtahk mikw wiya tipiiwe Utahchaahkuhch chischeyihtam. Ekun maak mwehch Chishemanituu Utahchaahkwa, mikw wiya Chishemanituu Utahchaahkwa chischeyihtamiyuu taan nihaau e iteyihtamiyich Chishemanituuh.

¹² Anuhchiish maak, namui utah aschiihch kaa ihtaat ahchaahkw kuuhchi miikunaanuu, an Ahchaahkw Chishemanituu e ihtaat kaa uhchiit eukun an kaa miikuyihkw. Eukw maak uu e ihtuutaatahkw chechii chischeyihtamuhkw aniyuuh miiwewinh kaa miitahkw Chishemanituu.

¹³ E aayimuutamaahch maak uyuuh chekwaayuuh namui nimituneyihchikanaahch e ishi nisituhtamaahch nit ishi aayimuutenaan. Chit aashuu wiihtamaatinaan taan kaa ishi chiskutamuuyamiht Chishemanituu Utahchaahkwa. Eukw uu Ahchaahkw waachihiyimiht e wii chischeyihtamihiichihtwaau Ahchaahkwa taapwewinh anichii kaa ayaawaatwaau Chishemanituu Utahchaahkuyuuh.

¹⁴ An awen ekaa kaa ayaawaat Chishemanituuh Utahchaahkuyuu, namui katachii utinam aniyuuh miiwewinh taan e ishi miiweyich Chishemanituuh Utahchaahkuyuuh. Uu awen namui taapwe nisituhtam chekwaayuuh uyuuh, namui wiyesh itaapatanh iteyihtam. Wesh mikw anichii Payehchi Ahchaahkwa kaa ayaawaatwaau kata chii nisituhtamuch taan e ishi chihchiwe iteyihtaakuniyikwaauh uyuuh miiwewinh.

¹⁵ An maak awen kaa ayaawaat Kaa payehchisiyich Ahchaahkwa misiwe tekash nituu chischeyihtam taan che ishi wiyaaskunahk chekwaayuu. Mikw maak namui kata chii wiyaaskunikuu wiya aweyuuh.

¹⁶ Itashteu Chishemanituu utayimuwinihch, Ihtaau aa awen e chischeyihtahk taan e iteyihtamiyich Chishemanituu chechii uhchi chischinuhamuwaat. Chiyaanuu maak Christ umituneyihchikan chitayaawaanaanuu.