1 Corinthians 16 - Chishemanituu Utayimuwin: Kaa Uskaach Testament

Chishemanituu utiiniimh che ishi miyaakanuyich

¹ Ekw che aayimuutamaatakuch an shuuliyaau chipaa maamuushtinikanuu chechii wiichihaakanuutwaau kaa taapwehtahkwaau anite aniyuu aschiiyuu Judea kaa ishinihkaateyich kaa ihtaatwaau. Mwehch maak kaa itashumakwaau anichii umaamuuayimihaauch anite Galatia kaa ishinihkaateyich aschiiyuu kaa ihtaatwaau chechii ihtitwaau ekun kaye chiyawaau ihtikw.

² An e chihchipayihch e tuushtech, misiwe awen anit e tashiyekw chipaa pahkaanishtaau shuuliyaayuu e nanaakataweyihtamihiikut taan maamuu kaa ishi miikut Chishemanituuh chechii uhchistamaasut. Misiwe chipaa maamuu kanuweyihtaakanuu. Ekw maak namui chipaa uhchi ihtakun e maamuushtinikanuuhch shuuliyaau takushiniyaane.

³ Takushiniyaane maak anite e ihtaayekw, nika itishahwaauch naapeuch Jerusalemihch chechii ituhtataatwaau chishuuliyaamuwaayuu. Chiyawaau chinitaweyimitinaawaau chechii wiyaapamekuch uchii naapeuch che itishahukwaau anite. Nika miyaauch masinahiikanh che ituhtataatwaau anite ayimiheukamikuhch Jerusalemihch, chiyawaau e aayimuumitakuch kaye maak wiyawaau anichii naapeuch e aayimuumakwaau.

⁴ Ekw maak iteyihtaakuhche kaye niya chechii ituhteyaan Jerusalemihch kiipaa che wiicheukwaau.

Paul kaa ishi wiyeyihtahk che ihtit

⁵ Macedonia kaa ishinihkaatech aschii nika shaapuhtawehten. Ekw maak che nituwaapamitakuch iskutak chii ituhteyaane anite.

⁶ Maaskuuch weipishchiish nika ihtaan anit e ihtaayekw, nesht iskan pipun che ihtaawaane anit e ihtaayekw. Ekw maak chechii wiichihiyekw taan che ishi nitaweyihtamuwaane taanite miin che ituhtewaane.

⁷ Namui anuhchiish chiwii pechi nituwaapamitinaawaau. Wesh aat anuhchiish nituwaapamitakuch mikw weipishchiish nipaa chii ihtaan. Nipukuseyihten maak chineushiish chechii ihtaayaan anit e ihtaayekw iteyihtahke Utipeyihchikeu chechii ihtaauch anit e ihtaawekw.

⁸ Mikw ekut utah Ephesus che ihtaayaan anuhchiish wii paatish utihchipayihche Pentecost.

⁹ Mekwaach naashch nihiipayuu chechii miyu aapatisiyaan utah aat e mihchetitwaau awenich e wii machipayihkahtuutwaau.

¹⁰ Chek pechi nituwaapamitaakwe Timothy suuhk che wii miyuuhkuwekw wesh kaye wiya atushkuweu Utipeyihchikeuh mwehch niya e ishi atushkaamach.

¹¹ Namui awen chipaa uhchi aatuweyimeu aniyuuh Timothy. Teyakuch wiichihaahkw chechii takushinit ute e ihtaauch ekaa chekwaayuu chipishkaakut. Wesh nipukuseyimaau chechii pechi chiiwe wiichewaat aniyuuh kutak chiichishaanuuh.

¹² Ekw maak chiichishaanuu Apollos che aayimuumak. Muush nichii siihchimaau chechii chiiutamitaakw iskutak kaautamitaakw aniyuuh kutak chiichishaanuuh. Namui uhchii wiya ituhteu anuhchiish wii. Wiipach kiipaa nihiipayite chika nituwaapamikuwaau.

Paul maahchishtai kaa itwet

¹³ Waaskamisiikw, ahchaahkuwinihch ishi yaakwaamiikw. Suuhk yaaichikaapuukw taan e ishi taapwehtamekw. Ekaawii kushtaachikw. Suuhk suuhchikaapuukw.

¹⁴ Nuukuhtaakw chisaachihiiwewinawaau misiwe chekwaan e ihtuutamekw.

¹⁵ Niichishaanitikw, chichischeyihtenaawaau anit e peyakuteusiit Stephanas eukw anichii niishtam kaa taapweyihtahkwaau anite aniyuu aschiiyuu Achaia kaa ishinihkaateyich. Chii pachishtinisuuch chechii atushkuwaatwaau kaa taapwehtamiitwaauh.

¹⁶ Niichishaanitikw, naashch taapweh chisiihchimitinaawaau chechii pachishteyimititisuustawekuch anichii awenich uyuu kaa iteyihtaakusitwaau. Pachishteyimitisuustuumaahkw kaye misiwe aniyuuh kaa wiichihiikutwaau aniyuu utitaapatisuwinawaau nesht suuhk kaa aahchiistamiyich aniyuu e ishi wiichihiikutwaau.

¹⁷ Nimiyeyihtamuwaan Stephanas, Fortunatus ekw maak Achaicus e chii takushihkwaau ute e ihtaauch. Muyaam chiyawaau e ihtaayekw utah e ihtaayaan ekun kaa iteyihtamuch kaa ihtaatwaau utah e ihtaauch.

¹⁸ Wesh chii ihtakuniyuu kaa ishi miyeyihtamihiitwaau mwehch kaa ishi ihtakuniyich kaa ishi chii miyeyihtamihiitaakuch kaye chiyawaau. Chipaa chisteyimaakanuuch naapeuch uyuu e iteyihtaakusitwaau.

¹⁹ Anichii umaamuuayimihaauch anite Asia kaa ishinihkaateyich aschiiyuu kaa ihtaatwaau chiwaachiyemikuwaauch. Kaye Aquila ekw maak Priscilla nesht aniyuuh umaamuuayimihaauh kaa nishtawiyich anite e ihtaatwaau e ayimihaayich chiwaachiyemikuwaauch.

²⁰ Misiwe chiichishaanuuch utah kaa ihtaatwaau chiwaachiyemikuwaauch. Chiyawaau kaa wiichishaanihtuyekw uchemitukw e waachiyemituyekw.

²¹ Niya Paul. Niya tipiiwe nitihchii nitaapachihtaan uu e masinahamaatakuch neshta e waachiyemitakuch.

²² Awen ekaa saachihaate Utipeyihchikeu, ekush chika waweshihiikuu Chishemanituu. Takushin maa, Utipeyihchikeu.

²³ Nitutamuwaau Utipeyihchikeu Jesus chechii shaweyimitaakw.

²⁴ Misiwe chisaachihiitinaawaau Jesus Christ uhchi. Amen.