1 Corinthians 13 - Chishemanituu Utayimuwin: Kaa Uskaach Testament

Saachihiiwewin eukw maauch chesteyihtaakuhch

¹ Aat miikuyaan chechii ishi ayimiyaan e ishi ayimitwaau kutakach awenichii kaye e ishi ayimitwaau enchilich, ekaa maak ayaayaan saachihiiwewin namui wiyesh chipaa uhchi itaapatan an kaa ishi miikuyaan chechii ishi ayimiyaan wesh mwehch mikw e mamatweyaapiskahiikanuuhch piywaapiskw nipaa itihtaakusin.

² Kaye maak aat miikuyaan chechii kaschihuyaan e chischiwehiicheyaan, kaye maak aat misiwe chischeyihtamaan niya taan e ishi ekaa chischeyihtahkwaau kutakach awenich, kaye aat miikuyaan misiwe chechii chischeyihtamaan chekwaan ekaa uhchi chischeyihtamihiiwaanuuhch anite utaahch kaye maak aat ayaayaan taapwehtamuwin chechii aahtinamaan wachiih ekaa maak ayaayaan saachihiiwewin yaapach namui mitun chekwaan nipaa uhchi iteyihtaakusin.

³ Kaye aat misiwe chekwaan pachishtinamaan taan e ishi tipiyeusiyaan chechii wiichihaakanuutwaau kaa chistimaatisiitwaau, aat maak kaye pachishtinamaan chechii ishkwaasiikanuuhch niyuu, ekaa maak ayaayaan saachihiiwewin yaapach namui wiyesh itaapatan an taan kaa aihtiyaan.

⁴ Awen e saachihaat aweyuu naashch miyutuutaweu kaye siipiiwesiistuweu, namui kaye waauhteyihtam kaye namui maamihchimuu,

⁵ namui chihchiwe iteyimisuu, kaye namui maayeyihcheu. Namui mikw wiya waa ihtit ihtuu siyaachihaakwe aweyuuh. Namui uhkaaskaakuu aweyuuh kaye namui kanuweyihtam aniyuu taan kaa ishi chishuwaahiikut aweyuuh.

⁶ Awen e saachihaat aweyuuh, namui miyeyihtam e wanituutamiich. Mikw maak nawaach miyeyihtam iskutak meyuutuutamiyich.

⁷ E saachihaat awen aweyuuh muush siipiiwesiistuweu mikw taan e ihtiyikwen. Kaye muush taapweucheyimeu aniyuuh aweyuuh kaye muush ihtakuniyuu e ishi aspeyimut chechii miyupayiyich. Namui puuniyuu e siipiiwesiistuwaat aniyuuh aweyuuh.

⁸ Namui wiiskaat chika uhchi iskwaapayuu saachihiiwewin. Ihtakun wechiihch e ayimistamuwaakanuut Chishemanituu mikw maak eshkw chika iskwaapayuu uu e ihtinaanuuhch. Kaye chika puunipayuu e kweschayiminaanuuhch. Kaye maak chischeyihtamuwin kata iskwaapayuu.

⁹ Wesh namui misiwe chekwaan chichischeyihtenaanuu, kaye maak namui nihaau chichii ishi chischiwehiichenaanuu taan chipaa ishi chischiwehiichenaanuu.

¹⁰ Eshkw peyakwaau chika utihchipayuu chechii chischeyimahkw taan nihaau e iteyihtaakusit Chishemanituu.

¹¹ Kaa awaashiyuuyaan, mwehch awaash e ishi ayimit nichii ishi ayimin, kaye mwehch awaash e ishi maamituneyihtahk nichii ishi maamituneyihten, kaye maak mwehch awaash nichii iteyihtaakusin. Mikw maak anuhchiish ekw niyaapeuyaan, namui ekw nitawaashuweyihtaakusin.

¹² Muyaam kaye e kanawaapamuhkw awen anite waapamisunihch, namui chipiyekaschinuwaanuu e ishpish piyekasinuuhkw tipiiwe chischiisikunaahch e kanawaapamuhkw. Ekun maak mwehch e ishi chischeyimahkw Chishemanituu anuhchiish. Namui tekash chichischeyimaanuu. Mikw maak iskutak uhchishkuu waapamahkwe ekw tekash che chischeyimahkw, muyaam chiyaanuu e ishpish tekash chischeyimitahkw.

¹³ Nishtu chekwaayuu namui wiiskaat chika uhchi iskwaapayuuh, eukw uyuuh. Taapwehtamuwin, aspeyimuwin ekw maak saachihiiwewin. An maak maauch chesteyihtaakuhch eukuu saachihiiwewin.