1 Corinthians 12 - Chishemanituu Utayimuwin: Kaa Uskaach Testament

Kaa Payehchisiit Ahchaahkw umiiwewinh

¹ Niichishaanitikw, uu che ishi aayimuutamaan, naashch taapwe chinituweyimitinaawaau chechii nisituhtamekw. Eukw uyuuh miiwewinh Payehchi Ahchaahkw kaa miiwet.

² Chichischeyihtenaawaau eshkw ekaa uhchi taapweyimekw Chishemanituu, chichii nuushuushkuwaawaauch manituuhkaanich ekaa chii ayimitwaau. Muush maak chichii paschehtahiikuwaauch anichii manituuhkaanich.

³ Chinitaweyimitinaawaau maak chechii nisituhtamekw an awen Kaa payehchisiyich Ahchaahkwa kaa pimipayihiikut, namui wiiskaat chika uhchi machi chiishuwaateu Jesus. Itwete maak awen, “Jesus eukw Utipeyihchikeu,” Payehchi Ahchaahkwa ihtuutaakuu aniyuu chechii itwet.

⁴ Nanaahkuu miiwewinh chichii miikunaanuu, peyakushuu maak an Kaa payehchisiit Ahchaahkw kaa miitahkw uyuuh miiwewinh.

⁵ Nanaahkuu ihtakun taan chechii ishi waawiichihaakanuutwaau awenich mikw maak peyakushuu an Utipeyihchikeu kaa atushkuwaakanuut.

⁶ Nanaahkuu kaschihuwinh ihtakunh chechii waawiichihaakanuutwaau awenich mikw maak peyakushuu an Chishemanituu kaa miiwet chechii ihtuutaakanuyikwaauh uyuu chekwaayuuh.

⁷ Misiwe awen kaa taapwehtahk ihtakuniyuu e ishi chischeyihtaakuhiisuyich Kaa payehchisiyich Ahchaahkwa e ihtaayich anit e ihtaat. Chitihtuutamaakunaanuu uyuu misiwe paahpeyakw e tashiihkw chechii waawiichihiituyihkw.

⁸ Eukw maak uu Kaa payehchisiit Ahchaahkw maayaat pasch aweyuu chechii waawiihtamiyich Chishemanituuh ukachehtaaweyihtamuwiniyuu, ekw kutak maayaat chechii wiihtamaacheyich taan waa ishi chischeyihtamihaayich Chishemanituuh aweyuuh.

⁹ Ekw kutak aweyuuh maayaat tekash chechii taapweyimaayich Chishemanituu. Miin kutak miyeu maskuusiiwiniyuu chechii miinuwaachihaayich aweyuu.

¹⁰ Kutak aweyuuh suuhkaatisiiwiniyuu miyeu chechii maamishkaach ihtiyich. Miin kutak aweyuuh miyeu che chischiwehiicheyich. Ekw miin kutak maayaat mitun chechii cheshtinaahuyich Chishemanituu Upayehchi Ahchaahkuyuuh e aapatisiikwenh maak machiahchaahkwa e aapatisiikwenh. Ekw miin kutak maayaat chechii kweschayimiyich. Ekw kutak aweyuuh maayaat chechii itweshtamaatamiyich taan kaa itweyich aniyuuh kaa kweschayimiyich.

¹¹ Mikw maak peyakushuu Kaa payehchisiit Ahchaahkw, misiwe maak paahpeyakw aweyuu miyeu nanaahkuu ahchaahkw miiwewinh. Wiya maak Kaa payehchisiit Ahchaahkw wiyeyihtam chekw miiwewiniyuu che miyaat aweyuuh.

Peyakw miiyuu nanaahkuu e ishi paschesiimakahch

¹² Anichii kaa taapweyimaatwaau Christ mwehch peyakw miiyuu ishinaakusuuch. Aat nanaahkuu e ishi paschesiimakahch yaapach peyakun miiyuu.

¹³ Peyakushuu an Ahchaahkw ati misiwe peyakw miiyuu kaa uhchi ishihiikuyihkw kaa siikahaahtaakuyihkw. Namui wiyeshin Jewa e itiskaanesikwe awen maak ekaa Jewa itiskaanesikwe, maak aapachihaakan e itaapachihaakanuukwe maak ekaa aapachihaakan itaapachihaakanuukwe. Misiwe paahpeyakw e tashiihkw peyakw Ahchaahkw chipiihchishkaakunuu.

¹⁴ Namui mikw peyakun e ishi paschesiimakahch miiyuu. Nanaahkuu ishi paschesiimakan.

¹⁵ Itwemakahch maak misit, “Namayeu mitihchii niya, namui nuuhtamun utah miiyuuhch.” An maak misit namui kata uhchi puuniimakan anit miiyuuhch e uhchiimakahch aat an itwemakahche.

¹⁶ Maak mihtaukai itwemakahch, “Namayeu mischiishikw niya, namui nuuhtamun utah miiyuuhch.” An mihtaukai namui yaapach kata uhchi puuniimakan anit miiyuuhch e uhchiimakahch mikw an itwemakahche.

¹⁷ Wesh miiyuu misiwe mikw mischiishikw chii ishinaakunikupane, namui chipaa uhchii pehtam awen. Maak misiwe mikw mihtaukaauhch namui chipaa chii miyaahcheu awen.

¹⁸ Namui maak anite ishinaakun. Chishemanituu misiwe chii ushihtaau taan nanaahkuu e ishi paschesiimakaniyich miiyuuyuu. Kaye maak wiya misiwe chii wiyeyihtam taan che ishi paschesiimakaniyich miiyuuyuu kaye taanite che ati chikamuyikwaau pischesiwinh.

¹⁹ Namui miiyuu chipaa uhchi ishinaakun mikw peyakw chekwaan ihtakuhch miiyuuhch.

²⁰ Nanaahkuu chekwaan ishi ihtakun miiyuuhch miiyuu chechii ishinaakuhch.

²¹ Ekw maak namui chika chii iteu mischiishikw aniyuu mitihchiyuu, “Namui chinitaweyimitin.” Kaye maak mistikwaan namui chika chii iteu aniyuu misitiyuu, “Namui chinitaweyimitin.”

²² Ihtakun kiipaa taapwe pasch chekwaayuu anit miiyuuhch ekaa saapisiimakahkwaau e ishinaakuhkwaauh. Mikw maak yaapach nituweyihtaakunh uyuuh.

²³ Kaye ihtakun chiiyuunaahch anihiih chekwaayuuh ekaa naashch chisteyihtaakuhkwaau e iteyihtamukw. Eukunh maak uyuu naashch yaakwaau e ihtuutamuhkw. Kaye maak ihtakunh anihiih chekwaayuuh chiiyuunaahch ekaa wii nuukuhtaayihkw, yaakwaau maak chitihtuutenaanuu uyuu e wii miyu kanuweyihtamuhkw.

²⁴ Ihtakunh kutak chekwaayuuh miiyuuhch ekaa wiyesh iteyihtamukw e nuuhkuhkwaau. Eukunh maak uyuu namui nitaweyihtaakun chechii aakuuhamuhkw. Chishemanituu chii ishihtaau miiyuuyuu yaakwaau chechii ihtuutaakanuyikwaauh misiwe aniyuu paschesiwinh wesh misiwe nituweyihtaakun chechii miyupayihch miiyuu.

²⁵ Eukw uyuu kaa ishihtaat ekaa chechii ihtakuhch pahkaanihiisuwin miiyuuhch, Chishemanituu chii nitaweyihtam aniyuuh paschesiwinh anit miiyuuhch kaa ihtakuniyikwaauh misiwe peyakunihch chechii waawiichihiituumakaniyikwaauh, namui wii chechii papahkaanipayihiisumakaniyikwaauh.

²⁶ Ihtakuhche e ishi aahkusiimakahch an miiyuu, misiwe e ishpishaach miiyuu chika muushihtaachemakan. Kaye peyakw paschesiwin anit miiyuuhch miyuhkaakanuuhche, misiwe e ishpishaach an miiyuu chika miyeyimuumakan.

²⁷ Chiyawaau maak eukw Christ wiiyuu. Misiwe paahpeyakw chiwiichihiiwenaawaau anite ishi.

²⁸ Ihtaayuu maak umaamuuayimihaauh Chishemanituu e chii wiyaapamaat taan che itaapatisiyich. Aniyuuh niishtam kaa wiyaapamaat eukw uyuuh apastalh ekw miin uchischiwehiichesuuh, ekw miin chiskutamaachesuuh, kaye aweyuuh maamishkaach chekwaayuu che ihtuutamiyich. Chii wiyaapameu kaye aweyuu che miinuwaachihiiweyich, kaye aniyuuh nanaahkuu che ishi wiichihaayich aweyuuh. Chii wiyaapameu kaye aweyuuh e waawiipayihtaayich chekwaayuu che itaapatisiyich, kaye aweyuuh che kweschayimiyich.

²⁹ Misiwe aa awen apastal chika chii itaapatisuu. Misiwe aa awen chika chii chischewehiicheu. Misiwe aa awen chika chii chiskutamaacheu, misiwe aa awen maamishkaach ihtuu.

³⁰ Misiwe aa awen miinuwaachiheu aweyuuh. Misiwe aa awen kweschayimuu. Misiwe aa awen itweshtamaatamuweu taan e ishi kweschayimiyich aweyuuh.

³¹ Chipaa pukuseyihten chechii ayaayin aniyuu maauch meywaapataniyikwaauh Chishemanituu umiiwewinh. Mikw maak chika waapahtiitinaawaau an chekwaan maauch chesteyihtaakuhch ishpish aniyuu chekwaayuuh kaa aayimuutamaan.