1 Corinthians 10 - Chishemanituu Utayimuwin: Kaa Uskaach Testament

Ekaawii chisteyimaahkuch manituuhkaanich

¹ Niichishaanitikw, chinitaweyimitinaawaau chechii chischisiyekw taan kaa ispayitwaau aniyehkaanaanich kuuhtaawiinuuch anichii kaa chii ihtaatwaau anite pakwaatiskamikaahch. Chishemanituuh chii itashuweyuu kaskawanishkwa chechii wiicheukutwaau, ekut kaa uhchi nuukuhtaayich e kanuweyimikutwaau. Misiwe chii aashuuskamuch chihchikamiyuu Chishemanituu kaa taunamiyich chechii pimuhtetwaau.

² Anit aniyuu kaskawanishkwa e ihtaayich kaa ihtaatwaau ekw maak anite chihchikamiihch ekut kaa siikahaahtuwaakanuutwaau e nuukuhtaakanuyich Moses e nuushuushkuwaatwaau.

³ Misiwe maak e tashitwaau chii miichuuch aniyuu miichimiyuu anite kihchikiishikuhch kaa uhchipayiyich.

⁴ Kaye maak misiwe chii minihkweuch aniyuu nipiiyuu Chishemanituu kaa miikutwaau asiniihch kaa uhchipayiyich. Iinaanuu maak e chii papaa nuushuushkaakutwaau aniyuuh asiniih, mikw maak namui mikw asiniih aniyuu, Christ aniyuuh kaa papaawiicheukutwaau.

⁵ Aat maak uyuu e chii ishi miyuhkaakutwaau Chishemanituuh, yaapach chii ihtaauch anit e mihchetitwaau ekaa naniheyihtamihaatwaau Chishemanituuh, ekw maak kaa nipitwaau anite pakwaatiskamikaahch.

⁶ Chipaa ihtakuniyuu e ishi ayaakwaamimikuuhkw misiwe taan kaa ispayitwaau, ekaa chechii ishinaakusiihkw chiyaanuu chechii mushteneyihtamuhkw machaatisiiwin.

⁷ Ekw maak ekaawii chikaa uhchi nuuchiishtuwaanuuch manituuhkaanich muyaam wiyawaau kaa ihtitwaau. Maau e itashtech masinahiikanihch, Anichii iinuuch chii miichisuuch, nesht chii minihkweuch, kaye chii niimuuch.

⁸ Kaye maak ekaawii wiinisuu pimaatisiitaau muyaam kaa ishinaakusitwaau pasch anichii iinuuch. Aniyuu maak wiinisuwinihch e chii ishi pimaatisiitwaau, Niishtunuu nishtu chishemitaahtumitanuu chii nipuuch e peyakuniyich e chiishikaayich.

⁹ Nesht ekaawii chika uhchi kakwechihaawaau Utipeyihchikeu muyaam taan kaa ihtitwaau pasch anichii awenichii. Chinepukw maak chii nipahiikuuch.

¹⁰ Kaye ekaawii chika uhchi memehch itwenaanuu muyaam pasch anichii iinuuch kaa ihtitwaau. Enchilh maak kaa nipahiiweyich chii wanaachihiikuuch.

¹¹ Eukw uyuu misiwe kaa ispayitwaau anichii iinuuch chechii uhchi ayaakwaamimikuyihkw ekaa chechii machituutuuhkw Chishemanituu. Chii masinahiikanuuh maak uyuu anit chechii uhchi chischeyihtamihiikuyihkw ekaa chechii ishi pimaatisiihkw taan kaa ishi pimaatisiitwaau. Wesh shaash maahchishtai kaa chiishikaakwaauh chipimaatisiinaanuu.

¹² Yaakwaamiih chiya kaa iteyihtaman muush e suuhchikaapuuyin ekaa chechii pahchishiniyin machihtwaawinihch ishi.

¹³ Misiwe e ishi kakwechihiikuyihkw, ekun e ishi kakwechihaakanuut misiwe awen. Mikw maak Chishemanituu kuiskw ihtuu. Namui chika uhchi pachishtinikunuu paashich chechii ishi kakwechihiikuuhkw ekaa chii ishikaapuushtamuhkw kakwechihiiwewin. Anit aniyuu mekwaach e kakwechihiikuuhkw chika waapahtiikunuu Chishemanituu taanite chechii uhchi shaapushkamihkw an kakwechihiiwewin. Eukw uyuu e ishi wiichihiitahkw ekaa chechii shaakuuchipitikuuhkw aniyuu taan e ishi kakwechihiikuuhkw.

Manituuhkaanich e makushetutawaakanuutwaau kaye Utipeyihchikeu ukuuminiyuuhiiwewin

¹⁴ Ekw maak niwiichewaakanitikw kaa saachihiitakuch, ekaawii wiiskaat nuuchiishtuwaahkuch manituuhkaanich.

¹⁵ Naashch kaa miyu nisituhtahkwaau awenich ekun e ishi ayimihiitakuch. Maamituneyihtamukw maak taan e itweyaan.

¹⁶ An e kuuminiyuyihkw chinanaaskumaanuu Chishemanituu Christ umihkw e chii siikahiikaateyich nesht upimaatisiiwin e chii patishtinahk Christ. Wesh an shuuminaapuu kaa minihkweyihkw nesht an aaihkunaau kaa utinahk ekut nuukuhtaayihkw Christ e chii nipistamaatahkw ati chechii uhchi wepeyihtamaakuyihkw chimachihtwaawinuuh.

¹⁷ Mikw peyakushuu an aaihkunaau misiwe e muuhkw, aat e mihchetiihkw nanaahkuu e iteyihtaakusiihkw. Iskutak maak e muuhkw an peyakw aaihkunaau peyakw miyu chitishinaakusinaanuu.

¹⁸ Maamituneyihtamukw maa taan eshkw e iteyihtaakuhch anite Jewa iinuuch e ihtaatwaau. Misiwe anichii kaa miichitwaau wiyaasiyuu kaa machishtawehamuwaakanuyich Chishemanituuh eukw anichii e maamuu atushkuwaatwaau Chishemanituuh.

¹⁹ Maau e ishi wiihtamaatakuch uu kaa itweyaan. An miichim kaa machishtawehamuwaakanuutwaau manituuhkaanich, namui mitun wiyesh itaapatan. Ekun maak mwehch manituuhkaanich, namui wiyesh itaapatisuuch.

²⁰ Maau kaye e itweyaan. Aniyuu kaa machishtawehamuwaatwaau manituuhkaan, namui Chishemanituu machishtawehamuweuch, machiahchaahkwa eukunh mechishtawehamuwaatwaau. Namui maak chinitaweyimitinaawaau chechii atushkuwekuch machahchaahkuch.

²¹ Namui taapishkun chipaa uhchi minihkwenaawaau an minihkwaakan, an kaa uhchi minihkwaanuuhch e chischisiitutawaakanuut Utipeyihchikeu e chii nipuushtamaatahkw, ekw maak an minihkwaakan kaa aapatahch machahchaahkuch e machishtawehamuwaakanuutwaau. Namui chipaa uhchi kuuminuunaawaau ekw maak kaye chechii miichiyekw taan e ishi machishtawehamuwaakanuutwaau machahchaahkuch.

²² Uu ihtiihkwe, chika chishuwaahaanuu Chishemanituu nesht chika uhteyihtam. Chititeyihtenaanuu aa uste chiyaanuu e suuhchisiihkw ishpishaat Chishemanituu.

Muush chisteyim Chishemanituu

²³ Pasch awenich iteuch mikw waa ihtiihkw chika chii ihtinaanuu. Taapwe kiipaa. Mikw maak namui misiwe chekwaan e ihtuutamuhkw chimiyutuutaakunaanuu. Kaye maak namui misiwe chekwaan e ihtuutamuhkw chimiyu wiichihiikunaanuu chechii yaaichikaapuyihkw.

²⁴ Namui mikw aniyuu wii e miyu wiichihiikut chekwaayuu chipaa uhchi ihtuutam awen. Teyakuch ihtuutamukw chekwaan che miyu wiichihiikutwaau kutakach awenich.

²⁵ E utinaman wiyaas, namui chipaa uhchi kakwechihchemun kaa machishtawehamuwaakanuwaakwenich manituuhkaanich aniyuu wiyaasiyuu. Ekw maak namui chika uhchi iteyihten e machituutaman miichiyine.

²⁶ Wesh itashteu Chishemanituu utayimuwinihch, “Uu aschii nesht misiwe chekwaan kaa ihtakuhch utah aschiihch, Utipeyihchikeu tipiiweusiyuu.”

²⁷ Awen ekaa kaa taapweyimaat Chishemanituu wiisaamaske chechii wiich miichisumat, ituhteyine maak, chika chii miichuwaan aniyuu miichimiyuu e ashamisk. Ekush ekaa kakwechim kaa machishtawehamuwaakanuukwe manituuhkaan aniyuu miichimiyuu. Ekw maak namui chika uhchi iteyihten e machituutaman miichiyine.

²⁸ Itiske awen, “Manituuhkaan aahchin chii machishtawehamuwaakanuu uyuu wiyaasiyuu,” ekaawii chika uhchi miichuwaan aniyuu wiyaasiyuu. Ekw maak ekaa miichuwate chika nuukuhtaan ekaa maayeyimat an kaa wiihtamaask uyuu kaye maak chika nuukuhtaan ekaa maayeyimat aniyuu taan e ishi taapwehtahk wiya.

²⁹ Namayeu an chiya e iteyihtaman ekaa chipaa uhchi miichinaanuu an miichim chipaa uhchi ekaa miichin. E nanaakatuweyihtamut taan e iteyihtahk wiya ekun an che uhchi ekaa miichiyin an miichim. Mikw maak maaskuch chika chii ishi kakwechihchemuu awen, “Chekwaan maak che uhchi nakaawiyaan e ihtuutamaan chekwaan e iteyihtamaan ekaa wiyesh aihch, mikw aniyuu e iteyihtahk kutak awen e machituutaakanuyich aniyuu e ihtinaanuyich.

³⁰ Wesh nanaaskumake Chishemanituu an miichim kaa miichiyaan, chekwaan che uhchi itikuyaan e wanipayaan e miichiyaan an miichim.”

³¹ Maau chipaa ihtinaawaau. Misiwe chekwaan e ihtiyekw, e miichisuyekw maak e minihkweyekw, chipaa ihtuutenaawaau Chishemanituu mikw chechii chisteyimaakanuut.

³² Ishi pimaatisiih maak ekaa chechii ustaweyihtamihiit awen Jewa kaa itiskaanesit maak awen ekaa Jewa kaa itiskaanesit maak kutak awen kaa taapweyimaat Chishemanituuh.

³³ Ekun e ihtiyaan niya, muush niwii nahiiwehaau misiwe awen misiwe taan e ihtiyaan. Nikuchihtaan ekaa mikw niya chechii maamituneyimisuyaan chekwaan an che miyu wiichihiikuwaane. Eyuu aniyuuh chekwaayuuh kutakach awenich che miyu wiichihiikuwaakwenich nimaamituneyihtamihiikuun, ekw maak chechii ishinaakuniyich chechii pimaachihutwaau.