1 Corinthians 1 - Chishemanituu Utayimuwin: Kaa Uskaach Testament

¹ Niya Paul, Chishemanituu nichii wiyaapamukw Christ Jesus utapastalimh chechii itaapachihiit. Chiichishaanuu Sosthenes kaye wiya ihtaau utah e ihtaauch.

² Chiyawaau umaamuuayimihaauch anite Corinth kaa ishinihkaatech ihtaawin kaa ihtaayekw chimasinahamaatinaawaau. Aniyuu taan kaa ishi ihtuutamaataakw Jesus Christ ekut kaa uhchi wiyaapamitaakw Chishemanituu chechii utiiniimitutaataakw. Chichii wiyaapamikuwaau chechii utiiniimitutaataakw kaye misiwe aniyuuh kutak aweyuu kaa taapweyimikut chii wiyaapameu. Wiya maak eukw wechimaamiyekw misiwe e tashiyekw.

³ Nitayimihaan Chishemanituu Kuuhtaawiinuu ekw maak chitipeyihchikeminuu Jesus Christ chechii miitaakw shaweyihchichewiniyuu kaye chiyaameyihtamuwiniyuu.

E ishi shaweyimitahkw Chishemanituu Christ uhchi

⁴ Muush nanaaskumaau Chishemanituu taan kaa ishi shaweyimitaakw Jesus Christ uhchi.

⁵ Wesh e wiichewekw Christ misiwe chit ishi miisitisiinaawaau chitishinaakusinaawaau, chimiisitisiiwinaawaau kaye taan e ishi ayimiyekw kaye maak e ishi kachehtaaweyihtamekw.

⁶ Wesh chicheshtinaateyihtamihiikunaawaau misiwe taan kaa ishi aayimuutamaataahch Christ.

⁷ Ekw maak namui mitun chinuuhtepayinaawaau ahchaahkw miiwewinh mekwaach e ashuwaapamekw che ishpish takushinit Chitipeyichikeminuu Jesus Christ.

⁸ Wiya chika wiichihiikuwaau muush chechii suuhchikaapuwekw taapwehtamuwinihch ekw maak namui chika uhchi ihtakun taan che ishi ataameyihtaakusiyekw iskutak utihchipayiche aniyuu e chiishikaayich che takushihk Utipeyihchikeu Jesus Christ.

⁹ Kuiskw ihtuu Chishemanituu. Eukw maak uu kaa tepwaatitaakw chechii wiicheumekw Ukusisa eukw uyuuh Chitipeyihchikeminuuh Jesus Christ.

E paapahkaanipayihutwaau umaamuuayimihaauch

¹⁰ Niichishaanitikw, Chitipeyihchikeminuu Jesus Christ utishinihkaasuwinihch uhchi, chisiihchimitinaawaau maamuu chechii niskumuyekw chekwaan e itweyekw ekaa chechii papahkaanipayekw anit mekwesiinuu e ihtaayekw. Suuhk wii maamuupayihukw peyakunihch e ishi maamituneyihtamekw kaye peyakunihch e ishi nisituhtamekw.

¹¹ Niichishaanitikw, Chloe kaa ishinihkaasuyich iskweu e ihtaayich e uhtuhtetwaau awenichii nichii itaachimushtaakuch e mamachipayekw anit mekwesiinuu e ihtaayekw.

¹² Chichii itaachimikuwaauch pasch anit e tashiyekw kaa ihtaatwaau e itweyekw “Niya Paul e nuushuushkuwiyekw” ekw kutakach anit mekwesiinuu e ihtaawekw kaa ihtaatwaau e itwetwaau Apollos e nuushuushkuwaatwaau, ekw kutakach e itwetwaau Peter e nuushuushkuwaatwaau ekw miin kutakach e itwetwaau Christ e nuushuushkuwaatwaau.

¹³ Mwehch ekaa peyakushit an christ misiwe kaa nuushuushkuwekw ishinaakun uu e ihtiyekw. Niya aa nichii chiistaaskuhukuun chiyawaau uhchi. Iskutak kaa siikahaahtaakuyekw namui uhchi iinaanuu, chit siikahaahtaatan Paul utishinihkaasuwinihch ishi.

¹⁴ Anit e tashiyekw nimiyeyihten mikw Crispus ekw maak Gaius e chii siikahaahtuukwaau.

¹⁵ Namui maak awen chika chii iteu e chii siikahahtuwaakanuut niya chechii pechi nuushuushkuut.

¹⁶ Nichischisin kaye Stephanas e chii siikahaahtuuk eyuu maak aniyuuh anit e ihtaat kaa wiichimikut nichii siikahaahtuwaayuuh. Namui maak miin kutak awen nichischisin chechii siikahaahtuuk.

¹⁷ Taapaa nuuhchi pechi itishahuukw Christ chechii siikahaahtaacheuch. Nichii pechi itishahuukw chechii kacheskweuch e waawiihtamuch miywaachimuwiniyuu. Uu maak e ihtiyaan namui aschiiyuu kachehtaaweyihtamuwin nitaapachihtaan. Wesh uu aapachihtaayaan ekw kiipaa namui chipaa uhchi suuhcheyihtaakun an miywaachimuwin anit yaayimuumaakanuut Christ aashiteyaahtikuhch e chii nipit.

Christ eukw Chishemanituu ukachehtaaweyihtamuwin kaye umaskuusiiwin

¹⁸ Pasch awenich chiishkwe ayimuwin iteyihtamuch e aayimuutaakanuyich Jesus kaa nipiyich aashiteyaahtikuhch chechii uhchi pimaachihuyitwaau umachaatisiyuuh. Eukw maak uchii awenich wanishinuuch uyuu kaa iteyihtahkwaau. Chiyaanuu maak wii kaa pimaachihuyikw, chichischeyihtenaanuu e waawiihtaakanuyich Christ e chii nipit aashiteyaahtikuhch ekut yaapatisiimakaniyich Chishemanituu usuuhkaatisiiwin.

¹⁹ Itashteu Chishemanituu utayimuwinihch, Nika ihtuutamuwaan ekaa mitun wiyesh chechii itaapataniyich ukachehtaaweyihtamuwinawaau anichii kaa kachehtaaweyihtahkwaau, nesht aniyuu e ishi maamituneyihtahkwaau anichii kaa iipwaahkaatwaau ekaa mitun chekwaan chechii iteyihtaakuniyich.

²⁰ Taan maak an awen naashch kaa kachehtaaweyihtahk. Taan an awen naashch mistahii kaa chiskutamuwaakanuut. Kaye maak taan an awen naashch kaa kaschihuuhtaakusit e ayimit. Chii nuukuhtaau Chishemanituu ekaa mitun chechii iipwaahkaahtaakuniyich aniyuu aschiiyuu kachehtaaweyihtamuwiniyuu.

²¹ Ekw maak e ishpish kachehtaaweyihtahk Chishemanituu chii ihtuutam ekaa kachehtaaweyihtamuwinihch chechii uhchi chischeyimikut aweyuuh. Teyakuch chii naheyihtamihiikuu chechii pimaachihaat aniyuu aweyuuh kaa taapwehtamiyich aniyuu chiishkwe ayimuwiniyuu kaa ishinihkaataakanuyich aniyuu wiyaawiihtamuhkw.

²² Anichii Jewa kaa itiskaanesitwaau maamishkaach waapahtiiwewinh nituweyihtamuch chechii waapahtiyaakanuutwaau yaakw chechii taapwehtahkwaau. Ekw anichii Greek kaa itiskaanesitwaau kachehtaaweyihtamuwiniyuu naashch chihchiwe iteyihtamihiikuuch chechii uhchi taapwehtahkwaau.

²³ Chiyaanuu maak wii Christ e chii chiistaaskuhwaakanuut eukw e ishi waawiihtamuhkw e kacheskweyihkw. Mikw maak anichii Jewa kaa itiskaanesitwaau nimaayeyimikunaan iteyihtamuch uyuu e ishi kacheskwaanuyich. Ekw anichii ekaa Jewa kaa itiskaanesitwaau chiishkwe ayimuwin iteyihtamuch uyuu.

²⁴ Chiyaanuu maak wii Chishemanituu kaa wiyaapamitahkw, taapishkun Jewa e itiskaanesiihkw kaye Greek kaa itiskaanesiihkw, chitaapwehtenaanuu uu Christ eukw Chishemanituu usuuhkaatisiiwin kaye ukachehtaaweyihtamuwin.

²⁵ Uyuu maak Chishemanituu kaa ihtuutahk aashiteyaahtikuhch naashch ekaa kaa iipwaahkaaweyihtamiyich aweyuuh etituu kachehtaaweyihtaakuniyuu ishpishaat aniyuu maauch kaa kachehtaaweyihtaakuniyich naapeu ukachehtaaweyihtamuwiniyuu. Ekw aniyuu kaa iteyihtahkwaau awenich naashch ekaa suuhcheyihtaakuniyich etituu suuhcheyihtaakuniyuu Chishemanituu uniyimisiiwin.

²⁶ Kanawaapamisukw maa taan kaa iteyihtaakusiyekw chiyawaau niichishaanitikw iskutak Chishemanituu kaa tepwaatitaakw. Namui mihchetu anit e tashiyekw kuuhchi iteyimikuwaau naapeu e kanawaapamitaakw naashch e iipwaahkaawekw. Namui mihchetu kuuhchi iteyimikunaawaau naashch e uchimaaweyihtaakusiyekw kaye namui mihchetu kuuhchi naashch chihchiweyeyimikunaawaau.

²⁷ Mikw maak Chishemanituu aniyuuh aweyuuh ekaa mitun chekwaan kaa iteyimaakanuyich chii wiyaapameu chechii uhchi waapahtiyaat aniyuuh chihchiwe kaa iteyimaakanuyich ekaa mitun chekwaan iteyihtaakusiyich wiya ishi e ihtaat. Kaye maak aniyuuh ekaa suuhcheyihtaakusiyich kaa iteyimaakanuyich utah aschiihch chii wiyaapameu aniyuu chechii uhchi waapahtiyaat aniyuuh kaa suuhcheyihtaakusiyich ekaa mitun suuhcheyihtaakusiyich wiya ishi e ihtaat.

²⁸ Aniyuuh ekaa mitun kaa chiihkaayeyihtaakuniyikwaauh chekwaayuu kaye ekaa mitun kaa aapateyihtaakanuyikwaauh eukun uyuuh kaa wiyaapahtahk Chishemanituu chechii uhchi ekaa chekwaan iteyihtaakuniyikwaauh aniyuuh chekwaayuuh kaa chisteyihtaakuniyikwaauh.

²⁹ Eukw uyuu kaa ihtit Chishemanituu ekaa waawaach peyakw aweyuu chechii maamihchimuyich wiya anite ishi e ihtaat.

³⁰ Wiya Chishemanituu chii nihiipayihtaau chechii wiicheumekw Jesus Christ. Jesus maak e ihtaat uhchi ekute wehchi ayaayihkw kachehtaaweyihtamuwin, kaye kuiskutaatisiiwin, kaye payehchi pimaatisiiwin, kaye maak pimaachihiikusiiwin.

³¹ Itashteu Chishemanituu utayimuwinihch, “Awen wii maamihchimute mikw aniyuu taan kaa ihtuutamiyich Utipeyihchikeuh chipaa aayimuutam.”