Matteu 9 - Lu Santu Vanghielu di Ghiesù Cristu Secondu Matteiu 1861

CAP. IX.

¹ Ed essendu cullatu sopra una piccula barca, ripassò lu lagu, e si ne venne in la so città.

² Ed eccu che li presentonu un paraliticu, che ghiacia in lettu. E Ghiesù videndu la loru fede, disse a lu paraliticu: Nun dubbià, figliolu, ti so’ perdunati li to’ peccati.

³ E subitu qualchiduni di li Scribi dissinu tra di se: Questu ghiastema.

⁴ E Ghiesù avendu vidutu li so’ penseri, disse: Percosa pensate male in li vostri cori?

⁵ Ch’ è più facile dì: Ti so’ perdunati li to’ peccati: o pure dì: Arrizzati, e marchia?

⁶ Ed affinchè voi sappiate, che u Figliolu di l’ omu ha lu putere sopra la terra di perdunà li peccati: Arrizzati, disse allora a lu paraliticu, piglia lu to lettu, e vaitine in casa toia.

⁷ Ed ellu s’ alzò, e si n’ andò in casa soia.

⁸ E videndu sta cosa lu populu s’ intimurì, e ludò u Signore, che avia datu a l’ omi tantu putè.

⁹ Ed andandusine da quellu locu, Ghiesù vidde un omu, che si ne pusava a lu bancu di le gabelle, e che si chiamava Matteiu. E li disse: Seguiteghiami. Ed ellu alzandusi, lu seguitò.

¹⁰ Ed eccu che essendu in casa a tola, molti pubblicani e peccatori vinianu, e si mittianu a tola cun Ghiesù, e cun li so’ discipuli.

¹¹ Ciò che videndu li Farisei, dicianu a li so’ discipuli: Perchè lu vostru Maestru magna cun li pubblicani e li peccatori?

¹² Ma Ghiesù avendu intesu, li disse: Li sani nun hannu bisognu di lu duttore, ma bensì l’ ammalati.

¹³ Andate e sappiate quellu, che è: Eiu vogliu la misericordia, e non lu sagrifiziu. Perchè nun so’ ghiuntu per chiamà li ghiusti, ma li peccatori.

¹⁴ Allora s’ avvicinonu li discipuli di Ghiuvanni, dicendu: Perchè noi, e li Farisei, dighiunemu a l’ ispessu: e li to’ discipuli nun dighiunanu mica?

¹⁵ E Ghiesù li rispose: Forze sonu l’ amici di lu sposu quelli, che piegnunu, fintantu che lu sposu è cun elli? Ma vinirannu li ghiorni, che u sposu li sarà livatu, ed allora dighiunarannu.

¹⁶ Nissunu mette una pezza di pannu novu ad un vistitu vecchiu: perchè caccia tutta la so forza a lu vistitu, e la stracciatura si face più magghiore.

¹⁷ Nè mancu mettunu vinu novu in otri vecchi; altrimente l’ otri si rompunu, lu vinu si ghietta, e l’ otri si ruinanu. Ma mettunu lu vinu novu in l’ otri novi, e tutti dui si cunservanu.

¹⁸ In lu mentre, ch’ ellu li dicia ste cose, eccu che s’ avvicinò unu di li principali, e l’ adurava, dicendu: Signore, a me figliola è morta pocu fa: ma veni, metti a to manu sopra ad ella, e vivarà.

¹⁹ E Ghiesù alzandusi, lu seguitava cun li so’ discipuli.

²⁰ Quandu eccu una donna, che da poi dodici anni patia di un flussu di sangue, li s’ accustò da daretu, e li tuccò a falda di u so vistitu.

²¹ Dicia tra di se: Basta, ch’ eiu tocchi sulamente lu so vistitu, e saragghiu salva.

²² Ma Ghiesù essendusi vultatu, e videndula, disse: Sta di bon animu, figliola, la to fede t’ ha salvatu. E da quellu mumentu la donna fu risanata.

²³ Ed essendu ghiuntu Ghiesù a la casa di quellu principale, e videndu li sunatori di flautu ed una gran quantità di ghiente, che facia strepitu, disse:

²⁴ Ritirativi: perchè nun è morta la zitella, ma dorme. Ed elli si ne ridianu.

²⁵ E quandu fu mandata fora la ghiente, ellu intrò: e pigliò la manu di la zitella. E la zitella s’ arrizzò.

²⁶ E se ne sparse la nova per tuttu quellu paese.

²⁷ E quandu surtia da culà Ghiesù, dui cechi si missinu a seguitallu, gridandu, e dicendu: Abbi pietà di noi, figliolu di Davidde.

²⁸ Quandu ellu fu arrivatu in casa, s’ avvicinonu li cechi. Ghiesù li disse: Cridite voi, che vi possi guarì? Elli risposinu: Sì, Signore.

²⁹ Allora li tucò l’ ochi, dicendu: Vi sii fattu secondu a vostra fede.

³⁰ E li so’ ochi s’ aprinu: e Ghiesù li minacciò, dicendu: Badate, che nissunu lu sappi.

³¹ Ma elli surtendu, sparsinu la so fama in tutta quella terra.

³² Quandu elli funu fora, li presentonu un omu mutu, che avia un dimoniu.

³³ E lu dimoniu essendu statu scacciatu, lu mutu si misse a parlà, e le ghienti si ne maravigliavanu, dicendu: Nun s’ è mai vistu cosa simile in Isdraellu.

³⁴ Ma li Farisei dicianu: Ellu scaccia li dimonii per mezu di lu principe di li dimonii.

³⁵ E Ghiesù ghirava tutte le città, e li paesi, insignandu in le sinagoghe, e predicandu lu vanghielu di lu regnu, e curandu ogni langore, ed ogni infirmità.

³⁶ Videndu poi tutta quella ghiente, ebbe cumpassione d’ ella: perchè eranu indebuliti, e che ghiacianu come pecure senza pastore.

³⁷ Allora disse a li so’ discipuli: La raccolta è abbundante, ma l’ oparai so’ pochi.

³⁸ Pregate dunque lu patrone di la raccolta, ch’ ellu mandi l’ oparai in la so raccolta.