Matteu 8 - Lu Santu Vanghielu di Ghiesù Cristu Secondu Matteiu 1861

CAP. VIII.

¹ E scesu ch’ ellu fu da lu monte, lu seguì molta ghiente:

² Ed eccu che venne un leprosu, che l’ adurava, dicendu: Signore, se tu voi, mi poi mundà.

³ E Ghiesù stindendu la manu, lu tuccò, dicendu: Lu vogliu, sii mundatu. E subitu la so lepra fu mundata.

⁴ E Ghiesù li disse: Bada di nun dillu a nissunu: ma vai a fatti veda a lu sacerdote, e offri lu donu prescrittu da Musè, perch’ ellu li servi di prova.

⁵ Quandu ellu intrava in Cafarnau, s’ avvicinò d’ ellu un Centurione, pregandulu,

⁶ E dicendu: Signore, lu me servu è stesu in la me casa paraliticu, ed è malamente turmentatu.

⁷ E Ghiesù li rispose: Viniragghiu, e lu guarisciaragghiu.

⁸ Ma lu Centurione rispundendu, disse: Signore, nun so’ degnu, che tu entri in la me casa: ma dì sulamente una parola, e u me servu sarà guaritu.

⁹ Eiu so’ un omu sottumessu a lu putè, ed agghiu sottu di me di li suldati, e dicu a quessu: Vai, ed ellu va: e ad un altru: Veni, ed ellu vene: ed a lu me servitore: Fa quessu, ed ellu lu face.

¹⁰ Sintendu stu discorsu Ghiesù restò maravigliatu, e disse a li so’ seguaci: Vi dicu in verità, nun agghiu truvatu tanta fede in Isdraellu.

¹¹ E vi dicu, che molti vinirannu da livante, e da punente, e sidirannu cun Abramu, ed Isaccu, e Ghiacobbe in lu regnu di li celi:

¹² Ma li figlioli di lu regnu sarannu ghittati nele tenebre esteriori: e culà ci sarà u piantu, e lu stridu di li denti.

¹³ E Ghiesù disse a lu Centurione: Vai, e che ti sii fattu, secondu che tu hai cridutu. E lu so servu fu sanatu in quellu mumentu.

¹⁴ Ed essendu andatu Ghiesù in la casa di Petru, truvò la sociara, che ghiacia cun la febbre:

¹⁵ E li tuccò la manu, e la febbre si n’ andò, ed ella s’ arrizzò, e si misse a servali.

¹⁶ Versu la sera, li ne purtonu molti, che avianu li dimonii in corpu: ed ellu scacciava cun la so parola li spiriti: e guarì tutti quelli, ch’ eranu malati:

¹⁷ Affinchè fusse adempitu quellu, che dice lu prufeta Isaia, dicendu: Ellu stessu s’ è pigliatu le nostre infirmità: ed ha purtatu li nostri malanni.

¹⁸ Ma Ghiesù videndu una gran quantità di ghiente intornu ad ellu, urdinò a li so’ discipuli, che si passasse a l’ altra banda di lu lagu.

¹⁹ Ed un scriba essendusi avvicinatu, li disse: Maestru, eiu ti seguitaragghiu, unde tu vadi.

²⁰ E Ghiesù li rispose: Le volpi hannu la so tana, e l’ acelli di lu celu li so nidi: ma u Figliolu di l’ omu nun ha duva ripona lu so capu.

²¹ Un altru di li so’ discipuli li disse: Signore, permettimi prima d’ andà a suppellì lu me babbu.

²² Ma Ghiesù li rispose: Seguiteghiami, e lascia li morti suppellì li so’ morti.

²³ Ed essendu cullatu sopra la barca, li so’ discipuli lu seguitonu:

²⁴ Ed eccu che si mosse una gran tempesta in mare, di modu che la barca era tutta cuperta d’ acqua: ellu poi si ne durmia.

²⁵ Allora li so’ discipuli s’ avvicinonu ad ellu, e lu discettonu, dicendu: Signore, salvaci, murimu.

²⁶ E Ghiesù li disse: Per cosa avete paura, ghiente di poca fede? Allora alzandusi, cumandò a li venti ed a lu mare, e si fece una gran calmaria.

²⁷ Allora l’ omi ristonu maravigliati, dicendu: Qual è quessu, a lu quale li venti, e u mare ubbidiscunu?

²⁸ E quandu dopu sbarcatu al di là di lu lagu, fu intratu in la terra di li Ghieraseni, li vensinu incontru dui omi, che avianu li dimonii in corpu, e che surtianu da le sepulture, ed eranu cusì furiosi, che nissunu putia passà per quella strada.

²⁹ Ed eccu che gridavanu, dicendu: Cosa avemu da fà cun te, o Ghiesù figliolu di Diu? Se’ ghiuntu qui prima di lu tempu per turmentacci?

³⁰ C’ era vicinu ad elli una gran banda di porci, che pascia.

³¹ Li dimonii poi lu pregavanu, dicendu: Se ci scacci da quì, mandaci in la banda di porci.

³² Ed ellu li disse: Andate. Ed elli surtendu, si n’ intronu in li porci, ed allora tutta la banda cun impetu si precipitò in lu mare: e s’ annigò in l’ acqua.

³³ Allora li pastori si ne fughinu: ed essendu ghiunti in la città, raccuntonu ogni cosa, e lu fattu di quelli, che avianu li dimonii.

³⁴ Ed eccu che tutta la città surtì a l’ incontru di Ghiesù: ed avendulu vistu, lu pregonu d’ andassine da quelli lochi.