Matteu 7 - Lu Santu Vanghielu di Ghiesù Cristu Secondu Matteiu 1861

CAP. VII.

¹ Nun ghiudicate, per nun essa ghiudicati.

² Perchè in lu modu, che aurete ghiudicatu, sarete ghiudicati: e sarete misurati secondu la misura, che aurete impiegata per misurà l’ altri.

³ Per cosa vedi tu una lisca di paglia in l’ ochiu di u to fratellu, e nun vedi un burdinà in lu to ochiu?

⁴ O come dirè tu a lu to fratellu: Lascia, che ti cacci da lu to ochiu sta lisca di paglia: mentre tu hai nel’ ochiu un burdinale?

⁵ Ipocrita, caccia prima da lu to ochiu u burdinà, e dopu vidrè a caccià la lisca di paglia da l’ ochiu di lu to fratellu.

⁶ Nun date le cose sante a li cani: nè mancu ghittate di le perle a li porci, perch’ elli nun li calcechinu cun li so’ pedi, e ch’ elli nun si righirinu per sbranavvi.

⁷ Dumandate, e vi sarà datu: circate, e truvarete: pichiate, e vi aprirannu.

⁸ Perchè ugnun, che dumanda, riceve: chi cerca, trova: e a chi pichiarà, si aprirà.

⁹ Qual è fra voi altri l’ omu, che quandu u so figliolu li dumanda di lu pane, li da un sassu?

¹⁰ E se ellu li dumanda un pesce, li purghiarà forze una sarpe?

¹¹ Adunque, se voi, che sete cattivi, sapete dà a li vostri figlioli li beni, che vi sonu stati dati: quantu più lu vostru Babbu, che è in li celi darà li beni a quelli, che li li dumandarannu?

¹² Adunque fate a l’ omini tuttu quellu, che vurriste, che vi fusse fattu. Perchè questu è la legghie, e li prufeti.

¹³ Intrate per la porta stretta: perchè larga è la porta, e spaziosa è la strada, che cunduce a la perdizione, e molti so’ quelli, ch’ entranu per ella.

¹⁴ Quantu è chiuca la porta, e quantu è stretta la strada, che cunduce a la vita: e quantu pochi sonu quelli, che la ritrovanu!

¹⁵ Guardatevi da li falsi prufeti, che vengunu versu di voi cun mantellu di pecura, ma in lu core so’ lupi rapaci.

¹⁶ D’ appressu i loru frutti li cunusciarete. Si coglie mica l’ uva sopra le spine, e li fichi sopra li cardi?

¹⁷ Cusì ogn’ alberu bonu face frutti boni: e l’ alberu cattivu face li frutti cattivi.

¹⁸ Un alberu bonu nun po fà frutti cattivi: nè un alberu cattivu fà li frutti boni.

¹⁹ Ogn’ alberu, che nun fa lu fruttu bonu, si taglia, e si ghietta in lu focu.

²⁰ Adunque voi li ricunusciarete a li so’ frutti.

²¹ Tutti quelli, che mi dicunu, Signore, Signore, nun intrarannu in lu regnu di li celi: ma quellu, che face la vuluntà di lu me Babbu, che è in li celi, quellu intrarà in lu regnu di li celi.

²² In quellu ghiornu molti mi dirannu: Signore, Signore, nun avemu noi prufetizatu in lu to nome, nun avemu noi scacciatu li dimonii in lu to nome, nun avemu fattu molti miraculi in lu to nome?

²³ Ed allora diragghiu ad elli: Eiu nun vi ho mai cunusciuti: ritirativi da me, voi tutti, che cummittite l’ iniquità.

²⁴ Chiunque adunque ascolta e me’ parole, e le mette in pratica, sarà paragunatu a l’ omu saviu, che piantò la so casa su la petra,

²⁵ E cascò l’ acqua, e s’ ingrossonu li fiumi, e suffionu li venti, e tutti culpinu a so casa, ma ella nun cascò: perchè era piantata su la petra.

²⁶ E chiunque ascolta e me’ parole, e nun le mette in pratica, sarà paragunatu a l’ omu scioccu, che fabbricò a so casa su la rena:

²⁷ E cascò l’ acqua, e vensinu li fiumi, e suffionu li venti, e culpinu tutti a so casa, e cascò, e fu una gran ruina per ella.

²⁸ Ed arrivò, che quandu Ghiesù ebbe finitu sti discorsi, la ghiente si maravigliava di la so duttrina.

²⁹ Perchè ellu li struiva come avendune l’ autorità, e mica come i loru Scribi, e Farisei.