Matteu 5 - Lu Santu Vanghielu di Ghiesù Cristu Secondu Matteiu 1861

CAP. V.

¹ Ghiesù videndu tutta sta ghiente, si ne cullò sopra un monte, e quandu si fu messu a pusà, s’ avvicinonu i so’ discipuli,

² Ed aprendu la bocca ellu l’ insignava, dicendu:

³ Beati i povari di spiritu: perchè lu regnu di li celi è per elli.

⁴ Beati i docili: perchè pussidirannu la terra.

⁵ Beati quelli, che piegnunu: perchè sarannu cunsulati.

⁶ Beati quelli, che hannu fame, e sete di la ghiustizia: perchè ne sarannu saziati.

⁷ Beati i misericordiosi: perchè d’ elli si aurà misericordia.

⁸ Beati quelli, che hannu lu core puru: perchè vidrannu Iddiu.

⁹ Beati quelli, che amanu la pace: perchè sarannu chiamati figlioli di Diu.

¹⁰ Beati quelli, che soffrunu la persecuzione per la ghiustizia: perchè u regnu di li celi è lu soiu.

¹¹ Beati sete voi, quandu vi malediciarannu, e vi perseguitarannu, e quandu diciarannu falsamente ogni specie di male di voi, per causa mea:

¹² State allegri, e fatevi animu, perchè la vostra ricumpenza sarà grande in li celi: cusì so’ stati perseguitati i prufeti, che so’ ghiunti prima di voi.

¹³ Voi sete lu sale di la terra. Se u sale diventa dissabitu, cun cosa si salarà? Ellu nun è più bonu da nulla, che da essa ghittatu, e calcicatu da l’ omini.

¹⁴ Voi sete la luce di lu mondu. Nun si po nasconda una città posta su d’ un monte.

¹⁵ Nun s’ accende lu lume per mettalu sottu a lu bacinu, ma per mettalu su lu candelè, perch’ ellu fia luce a tutti quelli, che so’ in casa.

¹⁶ Che la vostra luce risplendi cusì davanti a l’ omini: perch’ elli vedinu le vostre bone opare, e ch’ elli ne rendinu gloria al vostro Babbu, ch’ è neli celi.

¹⁷ Nun andate a creda, che sii ghiuntu per scioglia la legghie, u li prufeti: nun so’ ghiuntu a scioglia, ma per cumpì.

¹⁸ Vi dicu in verità, che se nun passa lu celu e la terra, nun si scansarà nè un iota, nè un puntu di la legghie, fintantu che tuttu nun sii cumpitu.

¹⁹ Quellu, che mancarà a l’ unu di questi cumandamenti anche i più minimi, e cusì insignarà a l’ omini, sarà chiamatu minimu nel regnu di li celi: ma quellu, che aurà oparatu ed insignatu questi cumandamenti, sarà tinutu grande nel regnu di li celi.

²⁰ Eiu dicu a voi, che se la vostra ghiustizia nun è più abbundante che quella di li Scribi e di li Farisei, nun intrarete in lu regnu di li celi.

²¹ Avete intesu, che è statu dettu a l’ antichi: Nun ammazzarè: perchè quellu, che ammazzarà, sarà reiu in ghiudiziu.

²² Ma eiu vi dicu, che chiunque s’ infuria contra lu so fratellu, sarà reiu in ghiudiziu. E quellu, che aurà dettu a lu so fratellu, raca: sarà reiu di cunciliu. E quellu, che li aurà dettu, scioccu: sarà reiu di lu focu di l’ infernu.

²³ Adunque, se standu per fà l’ ufferta a l’ altare, ti rammenti, che tu hai qualche cosa contra di lu to fratellu:

²⁴ Lascia la to ufferta davanti a l’ altare, e vaitine prima a fà la pace cun lu to fratellu: e poi dopu turnandu fa la to ufferta.

²⁵ Accordati prestu cun lu to avversariu, mentre che sei in strada cun ellu: perchè nun accadi per disgrazia, che lu to avversariu nun ti porti dinnanzi a lu ghiudice, e u ghiudice nun ti rimetti a lu ministru: e che tu nun venghi postu in prighiò.

²⁶ Ti dicu in verità, nun surtirè da culà, finchè tu nun abbi pagatu fin a l’ ultimu quattrinu.

²⁷ Avete intesu, che è statu dettu a l’ antichi: Nun farè adulteriu.

²⁸ Ma eiu vi dicu, che chiunque, videndu una donna, la desidera, ha dighià cummessu un adulteriu cun ella in lu so core.

²⁹ Se lu to ochiu drittu ti scandaliza, cavalu, e ghiettalu luntanu da te: perchè ti cunvene, che perischi unu di li to’ membri, piuttostu che tuttu lu to corpu sii ghittatu in l’ infernu.

³⁰ E se a to manu dritta ti scandaliza, tagliala, e ghiettala luntanu da te: perchè ti cunvene, che perischi piuttostu unu di li to’ membri, che tuttu lu to corpu si ne vadi in l’ infernu.

³¹ È statu pure dettu: Chiunque manda via la so moglie, ch’ ellu li dii la carta di lu ripudiu.

³² Ma eiu vi dicu, che chiunque rimanda la so moglie, eccettu per raghione d’ adulteriu, la face diventà adultera: e quellu, che sposa una donna ripudiata, cummette un adulteriu.

³³ Avete ancora intesu, che è statu dettu a l’ antichi: Nun ghiurarè: ma rendi a lu Signore li to’ ghiuramenti.

³⁴ Ma eiu vi dicu di nun ghiurà nè per lu celu, che è lu tronu di Diu:

³⁵ Nè pe la terra, ch’ è lu so sgambellu: nè per Ghierusalemme, perchè è la città di lu gran re:

³⁶ Nun ghiurarè neppure pe u to capu, perchè nun poi fà biancu, o neru unu di li to’ capelli.

³⁷ Ma che lu vostru discorsu sii, sì, sì: no, no: perchè ciò, ch’ è in soprapiù a stu discorsu, vene da cosa mala.

³⁸ Avete intesu, che è statu dettu: Ochiu per ochiu, dente per dente.

³⁹ Ma eiu vi dicu di nun resista a lu male: ma se qualchidunu ti mena su la guancia di dritta, porghili ancu la sinistra.

⁴⁰ Ed a quellu, che ti vo mova lite, e cacciatti a to tunica, dalli anche u to mantellu.

⁴¹ E se unu ti strascina a corra per un migliu, va cun ellu anche dui altri miglia.

⁴² Dà a quellu, che ti dumanda: e nun ti scansà da quellu, che ti vo dumandà imprestitu qualche cosa.

⁴³ Avete intesu, che è statu dettu: Amarè lu to prossimu, ed aurè odiu pe u to nimicu.

⁴⁴ Ma eiu vi dicu: Amate li vostri nimici, fate di lu bene a quelli, che vi odianu: e pregate per quelli, che vi perseguitanu, e vi calunnianu:

⁴⁵ Affinchè siate li figlioli di u vostru Babbu, che è in li celi: che face alzà lu so sole sopra i boni e sopra li cattivi: e fa piova sopra i ghiusti e sopra l’ inghiusti.

⁴⁶ Se voi amarete quelli, che vi amanu, quale sarà la vostra ricumpenza? nun fannu cusì i pubblicani?

⁴⁷ E se voi salutarete sulamente i vostri fratelli, cosa farete di più? i ghientili nun fannu anch’ elli cusì?

⁴⁸ Siate dunque perfetti, come u vostru Babbu celeste è perfettu.