Matteu 28 - Lu Santu Vanghielu di Ghiesù Cristu Secondu Matteiu 1861

CAP. XXVIII.

¹ Ma la sera di lu sabatu, quandu lu primu ghiornu di la simana stava per spuntà, vensinu Maria Matalena, e l’ altra Maria a veda lu sepolcru.

² Ed eccu che si fece un gran terramotu. Perchè un agnulu di lu Signore scese da lu celu: ed avvicinandusi rivultò la petra, e si misse a pusà annantu.

³ La so faccia rilucia come un fulgure, e le so’ veste eranu bianche come la neve.

⁴ E per paura d’ ellu le guardie funu spavintate, e ristonu come morte.

⁵ Ma l’ agnulu rispundendu a le donne disse: Voi nun timete nulla: perchè sò, che sete ghiunte a circà a Ghiesù crucifissu:

⁶ Ellu nun è qui: è risuscitatu, come ellu ha dettu. Vinite, e videte lu locu, induva era postu lu Signore.

⁷ E prestu andate e dite a li so’ discipuli, che ellu è risuscitatu: ed eccu va innanzi a voi in Galilea: culà lu vidirete. Eccu eiu v’ agghiu avvirtitu.

⁸ E si ne surtinu prestu da la tomba cun timore, e cun grande alligria, currendu per annuncià sta nutizia a li so’ discipuli.

⁹ Ed eccu che Ghiesù li venne incontru, dicendu: Vi salutu. Ed elle s’ avvicinonu, ed abbraccionu li so’ pedi, e l’ aduronu.

¹⁰ Allora Ghiesù li disse: Nun timete nulla. Andate, dite a li me’ fratelli, ch’ elli vadinu in Galilea, e culà mi vidirannu.

¹¹ Quandu elle si ne funu andate, qualcune di le guardie andonu in città, ed annuncionu a li principi di li sacerdoti tutte le cose, ch’ eranu accadute.

¹² Ed elli essendusi riuniti cun l’ anziani, tensinu cunsigliu, e dedinu una forte somma di danaru a li suldati,

¹³ Dicendu: Dite, che li so’ discipuli so’ ghiunti la notte, e si lu so’ rubbatu, quandu durmiate.

¹⁴ E se lu presidente vene a sapellu, lu cunvinciaremu, ed in ogni modu vi mittaremu a lu cupertu.

¹⁵ Ed elli avendu ricivutu lu danaru, fecinu quantu l’ era statu insignatu. E sta voce sparsa fra l’ Ebrei ci s’ è mantinuta finu a li ghiorni d’ oghi.

¹⁶ E l’ ondici discipuli si n’ andonu in Galilea sopra lu monte, duve Ghiesù l’ avia dettu di riunissi.

¹⁷ E videndulu l’ aduronu: ma qualchiduni eranu in lu dubbiu.

¹⁸ E Ghiesù essendusi avvicinatu li parlò, dicendu: Mi è statu datu ogni putere in lu celu e in la terra.

¹⁹ Adunque andate, struite tutte le nazioni; battizandule in nome di lu Babbu, e di lu Figliolu, e di lu Spiritu santu:

²⁰ Imparanduli ad usservà tutte quelle cose, ch’ eiu v’ agghiu cumandatu: ed eiu saragghiu cun voi in ogni tempu, sinu a la cunsumazione di li seculi.